Genese 50 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yosefe wakadiela ha mpala wa tatu wandi, wakadila, wakatuangana nʼandi mishiku.

² Yosefe wakela bantu bandi mukenji bua kulongololabo tshitalu tshia tatu wandi, banganga buka bakalongolola tshitalu tshia Isalele.

³ Matuku makumi anai akashika, matuku adibo balongolola tshitalu akakumbana, Bena Ejipitu bakamujinga matuku makumi muanda mutekete.

⁴ Hakashika matuku a madilu, Yosefe wakambila ba mu nsubu wa Palo ne, Bingikala ne luse ku mesu kuenu, ndi nnusengelela ne, Nuambile Palô ku matshu andi ne,

⁵ Tatu wanyi wakuntshihisha ne, Hanafua unjike mu muaba unakasumba mu buloba bua Kanâna. Nunku witabushe bua meme kuya bua kujika tatu wanyi, nempingane kûdi kabidi.

⁶ Palô wakamba ne, Ya, ujike tatu webe, bu muakukutshihisheye.

⁷ Yosefe wakaya kujika tatu wandi, ne bena mudimu bonso ba mu nsubu wa Palô, ne bakulu ba mu nsubu wandi, ne bakulu bonso ba mu buloba bua Ejipitu,

⁸ ne bantu bonso ba mu nsubu wa Yosefe ne bana babo bonso, ne bonso ba mu nsubu wa tatu wandi, bakaya nʼandi, anu bana bakese ne mikoko ne bimuna biakashala mu buloba bua Goshene.

⁹ Bantu bakadi benda mu makalu ne ha nyima ha tubalu bakaya nʼandi, tshisumbu tshinene be.

¹⁰ Hakafikabo ku tshituilu tshia Atada, tshidi dishiya dia Yadene, bakadila muadi mukole, baka jinga tatu wandi to matuku muanda mutekete.

¹¹ Hakatangila bena buloba, Bena Kanana mene, madilu makole a ku tshituilu tshia Atada, bakambilangana ne, Â mmadilu makole a Bena Ejipitu, nunku bakidika muaba au ne, Abele-miselayima, udi dishiya dia Yadene.

¹² Bana ba Yakoba bakamuenzela bu muakabambileye,

¹³ bualu bua bobo bakamutuala mu buloba bua Kanana, bakamujika mu lubuebue lua mu budimi bua Makepela, luakasumba Abalahama hamue ne budimi, kudi Efelona, Muena Hiti, bu muaba wa kujikamu bafue, ku mpala kua Mamale.

¹⁴ Hakamanabo kumujika, Yosefe ne bana babo ne bantu bakaya nʼandi bua kujika tatu wandi bakahingana mu Ejipitu.

Yosefe Udi Ukolesha Mitshima ya Bano Babo

¹⁵ Hakatangila bana babo ne Yosefe ne, Tatu wetu wakafua bakambilangana ne, Hashishe Yosefe neikale nʼetu lukuna, neatusombuele bua malu mabi onso atua kamuenzela.

¹⁶ Bakatuma dî kudi Yosefe ne, Tatu webe wakamba diambedi yeye kayi muanze kufua ne,

¹⁷ Nuenu nuambile Yosefe ne, Ulekelele bana benu mibi yabo ne malu mabi akakuenzelabo Hashishe tuetu tudi tukusengelela ne, Utubuikidile matomboka a bena mudimu ba Nzambi wa tatu webe Yosefe wdkadila hakamuambilabo mei a.

¹⁸ Bana babo bakaya kudiye kabidi bakafua mpala yabo hanshi ku mesu kuandi, bakamba ne, Mona, Buonso buetu tudi bahika bebe.

¹⁹ Yosefe wakabambila ne, Kanutshinyi, bua meme ndi mu muaba wa Nzambi, anyi?

²⁰ Bua bualu buenu nuenu nuakasua kungenzela bibi, kadi Nzambi wakasua kuenza bimpe, wakakudimuna malu bua kusungileye bantu bu muakuenzeleye lelu.

²¹ Nunku kanutshinyi, nennudishe ne bana benu bakese Yeye wakabasamba, wakabambila mei a kalolo.

Lufu lua Yosefe

²² Yosefe wakashikama mu buloba bua Ejipitu ne bantu bonso ba mu nsubu wa tatu wandi, Yosefe wakikala ne muoyo bidimu lukama ne dikumi.

²³ Yosefe wakamona bana ba Efelayima to ne ku bikondo bisatu, bakalela bana ba Mala, muana wa Manashe, ha binu bia Yosefe kabidi.

²⁴ Yosefe wakambila bana babo ne, Nfuafua, kadi Nzambi neikale nʼenu, neanumushe mu buloba ebu, neanuhingashe ku buloba buakalayeye Abalahama ne Isaka ne Yakoba

²⁵ Yosefe wakatshihisha bana ba Isalele wakabambila ne, Nzambi neikale nʼenu, ne nuenu nenuye ne mifuba yanyi.

²⁶ Nunku Yosefe wakafua, wakadi ne bidimu lukama ne dikumi bakalongolola tshitalu tshiandi, bakatshiteka mu mushete mu Ejipitu.