Genese 48 - Mukanda wa Nzambi Dihungila Dikulukulu ne Dihungila Dihia-dihia 2003

Yakoba Udi Uvudishila Efelayima ne Manashe Disanka

¹ Hakashika malu a bakambila Yosefe ne, Mona tatu webe udi usama; yeye wakaya kudiye ne bana bandi ba balume babidi, Manashe ne Efelayima.

² Bakambila Yakoba ne, Mona muan ebe Yosefe ulua lua kûdi Isalele wakadikolesha, wa kashikama ha bulalu.

³ Yakoba wakambila Yosefe ne, Nzambi wa Bukole Buonso wakamueneka kundi ku Luze mu buloba bua Kanâna wakansankisha,

⁴ wakangambila ne, Mona, nenkuvuishe tshisamba tshinene, nenkukumbashe, neulue tshisumbu tshinene tshia bantu, nempe tunkanunuina tuebe buloba ebu tshiendelele.

⁵ Bana babidi bakakulelelabo mu Ejipitu diambedi tshiyi muanze kulua mu Ejipitu mbana banyi, Efelayima ne Manashe badi banyi bu Lubena ne Shimeona.

⁶ Biwalela bana bakuabo ku nyima kuabo, nebikale bana bebe kabidi nebabidike dina dia bana babo mu buhianyi buabo.

⁷ Hanakadi nfuma ku Padana, Lakele wakafua mu nshila wa ku buloba bua Kanâna diambedi katuyi banze kufika ku Efelata, nakamujika kuakua mu njila wa ku Efelata (eu udi Beteleheme).

⁸ Isalele wakamona bana babidi ba Yosefe, wakamukonka ne, Aba mbanganyi?

⁹ Yosefe wakambila tatu wandi ne, Aba mbana bakumpa Nzambi kunoko Yeye wakamba ne, Ulue nʼabo kundi, nembavudishile disanka.

¹⁰ Mesu a Isalele akadi bileshileshi bualu bua bununu buandi, yeye kakamanya mua kumona bimpe Yeye wakalua nʼabo ha buihi nʼandi, yeye wakatuangana nʼabo mishiku, wakabuhukila.

¹¹ Isalele wakambila Yosefe ne Tshiakuelangana meji kua kumona mpala webe, kadi mona, Nzambi wakundesha bana bebe kabidi.

¹² Yosefe wakabumusha hankatshi ha binu biandi, wakatua mpala wandi hanshi.

¹³ Yosefe wakabangata bubidi buabo, Efelayima ku tshianza tshiandi tshia balume ne mpala wandi mutangile ku tshianza tshia bakashi tshia Isalele, ne Manashe ku tshianza tshiandi tshia bakashi mutangile ku tshianza tshia balume tshia Isalele, wakabasemesha ha buihi nʼandi.

¹⁴ Isalele wakolola tshianza tshiandi tshia balume, wakatshitentekasha ha mutu ha Efelayima, wakadi muanʼa mukala wakatentekasha tshianza tshiandi tshia bakashi ha mutu ha Manashe wakashintakasha bianza biandi bu muakasueye, bualu bua Manashe wakadi muanʼa bute

¹⁵ Yeye wakavudishila Yosefe disanka, wakamba ne, Nzambi wakadi batatuʼanyi Abalahama ne Isaka bendakena ku mesu kuandi, Nzambi wakandisha matuku anyi onso tô ne ku dituku edi,

¹⁶ muanjelo wakampikula ku malu mabi onso, avudishile bansongalume aba disanka, dina dianyi ne dina dia batatuʼanyi, Abalahama ne Isaka, ashale kudibo, bakumbane ba bungi mu buloba.

¹⁷ Hakatangila Yosefe ne tatu wandi wakatentekasha tshianza tshiandi tshia balume ha mutu ha Efelayima, bualu ebu kabuakamusankisha, ne yeye wakabisha tshianza tshia tatu wandi, wakamba kutshiumusha ku mutu wa Efelayima, wakamba kutshiteka ku mutu wa Manashe.

¹⁸ Yosefe wakambila tatuʼandi ne, Nansha, tatuʼanyi, kuenji nunku, bualu bua eu udi muanʼa bute, utentekashe tshianza tshiebe tshia balume ha mutu handi.

¹⁹ Kadi tatu wandi wakabenga ne, Ndi mumanye bualu ebu, muanʼanyi, yeye nealue bantu ba bungi, nealue muntu munene kabidi, kadî muakunyʼandi neamutambe bunene, ne tunkanunuina tuandi netuikale tshisamba tshinene.

²⁰ Yeye wakabavudishila disanka dituku adi, wamba ne, Isalele neavudishile bakuabo disanka bualu buenu, neambe ne, Nzambi anuvuishe disanka dia Efelayima ne dia Manashe, yeye wakateka Efelayima ku mpala kua Manashe.

²¹ Isalele wakambila Yosefe ne, Nfuafua, kadi Nzambi neikale nʼenu neanuhingashe mu buloba bua batatuʼetu.

²² Nakukuha wewe tshituha tshikuabo tshia buloba ku mutu kua bana benu, tshinakanyenga mu bianza bia Bena Amole ne muele wanyi wa nvita ne buta buanyi.