Genese 44 - Mukanda wa Nzambi Dihungila Dikulukulu ne Dihungila Dihia-dihia 2003

Luhanza Lujimina

¹ Yosefe wakambila mulami wa nsubu wandi ne, Ûshe bibombi bia balume ne bia kudia tente, bungi bua bujitu budibo mua kutuala, teka argent ya muntu ne muntu munda mua tshîbombi tshiandi.

² Teka luhanza luanyi lua argent mu tshibombi tshia muana muakunyi ne argent yandi kabidi Yeye Wakenza bu dî dia Yosefe.

³ Hakatshia butuku bakatuma balume aba ne mpunda yabo kuabo.

⁴ Hakumukabo mu musoko, kabayi banze kuya kule, Yosefe wakambila mulami wandi ne, Bika biebe, ulonde balume aba ne hawabaheta, ubakonke ne, Bualu kai nuakashintakasha malu mabi ku malu mimpe?

⁵ Luhanza alu kaluena luhanza lua mukelenge wanyi ludiye unua nʼalu ne ludiye utempa nʼalu matempu anyi? Nuakuenza bibi mu bualu ebu.

⁶ Yeye wakabaheta, wakabambila mei au.

⁷ Bobo bakamuambila ne, Mukelenge wetu udi wamba mei au munyi? Bantu bebe kabena mua kuenza bualu bubi nunku.

⁸ Monai argent ituakasangana mu bibombi bietu, tuakulua nʼai kûdi kabidi hatuakafuma ku buloba bua Kanana. Tuetu tuakadi tuiba argent anyi or mu nsubu wa mukelenge webe munyi?

⁹ Biwasangana luhanza alu kudi muntu kai wa munkatshi muetu udi nʼalu, afue biandi, ne tuetu kabidi netuikale bahika ba mukelenge webe.

¹⁰ Yeye wakamba ne, Bualu ebu nebuenjibue bu mu mei enu, muntu utuasangana nʼalu, yeye neikale muhika wanyi, ne bakuabo benu nebahanduke.

¹¹ Bakadila bibombi biabo hanshi lubilu, ne muntu ne muntu bakasulula bibombi biabo.

¹² Bakabangila kukeba ku muanʼa bute to ne ku muanʼa mukala, bakasangana luhanza mu tshibombi tshia Benyamina.

¹³ Hashishe bakahanda bilulu biabo, bakahingasha majitu ha nyima ha mpunda yabo, bakahingana mu musoko.

¹⁴ Yuda ne bana babo bakalua ku nsubu wa Yosefe, yeye wakadiku, bakadikuma hanshi ku mpala kua ndi.

¹⁵ Yosefe wakabakonka ne, Bualu ebu bunuakuenza budi munyi? Kanuena bamanye ne muntu bu meme udi mua kutempa matempu, anyi?

¹⁶ Yuda wakamba ne, Netuandamune mukelenge wetu dî manyi? Netuambe tshinyi? Netudibingishe munyi? Nzambi wakasokolola bubi bua bantu bebe, tangila, buonso buetu tudi bahika bebe, ne tuetu ne muntu wakasanganabo ne luhanza.

¹⁷ Yosefe wakabambila ne Tshiena mua kuenza nunku anu muntu wakasanganabo ne luhanza mu tshianza tshiandi neikale muhika wanyi kadi bakuabo benu nuhingane kudi tatu wenu talala.

Yuda Udi Wakuila Benyamina

¹⁸ Hashishe Yuda wakalua ha buihi nʼandi, wakamba ne, Mukelenge wanyi, witabushe, ndi nkutendekena, bua muntu webe ambile di ku matshu a mukelenge wanyi kunakadi ne tshiji kudi muntu webe, bualu bua wewe udi bu Palo mene.

¹⁹ Mukelenge wanyi wakakonka bantu bebe ne Nudi ne tatu, anyi muanʼenu mukuabo, anyi?

²⁰ Tuetu tuakakudimuna mukelenge wetu di ne, Tudi ne tatu muntu mununu, ne muan etu mukuabo wakamulelabo ku bununu buandi utshidi mukese, muan abo mukuabo wa difu dimue wakafua, ne anu yeye muana umuehele kua mamu wandi udi mushale ne tatu wandi udi umunanga.

²¹ Wewe wakambila bantu bebe ne, Luai nʼandi kundi, bua meme kumonangana nʼandi ku mesu.

²² Tuetu tuakambila mukelenge wetu ne, Nsongalume eu kena mua kushiya tatu Wandi, biamushiyeye, tatu wandi neafue.

²³ Wewe wakambila bantu bebe ne, Binuikala kanuyi balue ne muakunyʼenu, kanuena numonangana nʼanyi ku mesu.

²⁴ Nunku hatuakahingana kudi muntu webe, tatu wetu, bakamuambila mei a mukelenge wanyi.

²⁵ Tatu wetu wakatuambila ne, Yai bienu kabidi, nutusumbile tuntu tua kudia tukese.

²⁶ Tuetu bakamba ne, Kabena mua kuyaku, bikala muakunyʼetu kayi muye nʼetu, bualu bua katuena mua kumonangana ne muntu au ku mesu bikala muakunyʼetu kayi nʼetu.

²⁷ Muntu webe, tatu wetu wakabambila ne, Nudi bamanye ne mukashi wanyi wakundelela bana balume babidi,

²⁸ umue wabo wakumuka kundi, nakamba ne, Nyama mubi wakamuhandulula, ne ku dituku adi tshiakamutangila kabidi,

²⁹ binumusha muana eu mukuabo kundi, ne biakuatshishibueye bualu bubi, nennubueshe nsuki yanyi mitoke to mu Muaba wa Bafue ne kanyinganyinga kakole

³⁰ Nunku hanaya kudi muntu webe, tatu wanyi, ne nsongalume eu kayi nʼetu, bualu bua muoyo wandi udi musuikakana ne muoyo wa nsongalume eu,

³¹ hashishe, hatangileye ne nsongalume kena nʼetu, yeye neafue, ne tuetu, bantu bebe, netubueshe nsuki ya muntu webe, tatu wetu, mu Muaba wa Bafue ne kanyinganyinga kakole.

³² Bualu bukuabo kabidi, meme, muntu webe nakadieyeka bu tshieya tshia nsongalume eu kudi tatu wanyi. Nakamuambila ne, Binahanga kuhingana nʼandi kûdi, hashishe nendituadile bujitu bua bualu ebu tshiendelele.

³³ Nunku ndi nkutendekena ne, Witabushe bua muntu webe ashale kunoko bu muhika webe mu muaba wa nsongalume, ne nsongalume ahingane ne bana babo.

³⁴ Ndi mua kuya kudi tatu wanyi bikala nsongalume kayi nʼanyi munyi? Bua tshitangidi bualu ebu bubi budi bulue kudi tatu wanyi.