Genese 42 - Mukanda wa Nzambi Dihungila Dikulukulu ne Dihungila Dihia-dihia 2003

Bana Babo ne Yosefe Badi Balua mu Ejipitu bua Kusumba bia Kudia

¹ Hakamanya Yakoba ne, Bintu bia kudia biakashala mu Ejipitu, yeye wakambila bana bandi balume ne, Nudi batangilangana muaku bua tshinyi?

² Yeye wakamba kabidi ne, Monai, nakunvua lumu ne, Bintu bia kudia biakashala mu Ejipitu, yai bienu kuakua, nutusumbileku bia kudia, bua tuetu tuhanduke, katufu.

³ Bana babo ne Yosefe dikumi bakaya mu Ejipitu bua kusumbabo bia kudia.

⁴ Kadi Yakoba kakatuma Benyamina, muakunyi wa Yosefe, ne bana babo, wakamba ne, Bumue bualu bubi nebumukuate.

⁵ Bana balume ba Isalele bakalua mu tshisumbu tshia bantu bua kusumbabo bia kudia, bualu bua tshiole tshiakadi mu buloba bua Kanana.

⁶ Yosefe wakadi mukokeshi wa mu buloba, nyeye mene wakadi uhanyisha bantu bonso bintu, bana babo ne Yosefe bakalua, bakamukukuila hanshi.

⁷ Yosefe wakamona bana babo, wakabamanya, kadi yeye wakadivuisha bu muntu mukuabo kudibo, wakabambila mei makole, wakabakonka ne, Nuakufuma kudi kunyi? Bakamukudimuna di ne, Mu buloba bua Kanana, tuakuluila bua kusumba bia kudia.

⁸ Yosefe wakamana bana babo, kadi bobo kabakamumanya.

⁹ Yosefe wakavuluka bua bilota biandi biakabaloteleye, yeye wakabambila ne, Nudi batentekedi, nuakuluila bua kutangila ne buloba budi butuhu.

¹⁰ Bobo bakamuambila ne, Nansha, mukelenge wetu, bantu bebe bakuluila anu bua kusumbabo bia kudia.

¹¹ Buonso buetu tudi bana ba muntu umue, tudi bambe mei a bushuwa, katuena batentekedi.

¹² Kadi yeye wakabambila ne, Nansha, nuakuluila anu bua kutangila ne buloba budi hatuhu.

¹³ Bobo bakamuku dimuna ne, Tuetu, bantu bebe, tudi bana dikumi ne babidi ba muntu umue wa mu buloba bua Kanana, ne mona, muana wa mukala udi mushale ne tatu wetu katataka, ne mukuabo kenaku.

¹⁴ Yosefe wakabambila ne, Adi ndi dinakunuambila ne, Nudi batentekedi,

¹⁵ nennutete ku bualu ebu, ndi nditshiha ku muoyo wa Palô ne, Kanuena numuka kunoko anu hanualua ne muanʼenu, muanʼa mukala kunoko.

¹⁶ Nutume umue wa munkatshi muenu, alue biandi ne muanʼenu, muanʼa mukala kunoko, netunusuike mionshi buonso buenu, netutete mei enu, bua kumanya ne, Nudi nuamba mei malelela, anyi bualu bunakuditshiha ku muoyo wa Palo ne, Nudi batentekedi, nebuikale bulelela.

¹⁷ Yeye wakababuesha buonso buabo mu nsubu wa lukanu to matuku asatu.

¹⁸ Hakahita matuku asatu, Yosefe wakabambila ne, Enzai nunku nushale ne muoyo, bualu bua meme ndi ntshina Nzambi.

¹⁹ Binuamba mei malelela, nuitabushe bua: umue wenu ashale musuikibue mu nsubi wa lukanu, kadi bakuabo benu baye kuenu ne bia kudia bualu bua tshiole tshidi mu nsubu yenu.

²⁰ Nu hingane ne muanʼenu, muanʼa mukala kundi, nunku mei enu neajalame, kanuena nufue. Bobo bakitabusha.

²¹ Bakambilangana ne, Tuetu tuakudihisha bulelela mu bualu bubi butuakenzela muanʼetu hatuakatangila kanyinganyinga ka mutshima wandi hakadiye utusengelela, kadi tuetu katuakamunvuila, bua bualu ebu dikenga diakatukuata.

²² Lubena wakabambila ne Tshiakanuambila ne, Kanuenzedi muana bualu bubi, kadi nuenu kanuakangunvuila, anyi? Nunku mashi andi adi ashala ha bilamba bienu.

²³ Bobo kabakamanya ne, Yosefe wakadi ujingulula mei akadibo bambilangana, bualu bua muandamunyi wa miaku wakadiku.

²⁴ Yeye wakabakoma nyima, wakadia, ne yeye wakatshinguluka kudibo, wakayikila nʼabo, wakakuata Shimeona, wakamusuika ku mesu kuabo.

²⁵ Hashishe Yosefe wakambila ba ntu bandi ne, Nubushile bibombi biabo tente ne bia kudia, nuhingashe argent wa muntu ne muntu mu tshibombi tshiandi, nubahe bintu bia kudiabo mu nshila, bakenza nunku.

²⁶ Bakateka bintu bia kudia ha nyima ha mpunda yabo bakaya.

²⁷ Hakafikabo ku nsubu wa tshilala benyi, umue wabo wakasulula tshi bombi tshiandi bua kudisheye mpunda wandi, wakatangila argent yandi ba mutu ha tshibombi tshiandi.

²⁸ Yeye wakambila bana babo ne Bakumpingashila argent yanyi, idi mu tshibombi, mitshima yabo ya kahandika, bakazakala, bakambila ngana ne, Bualu ebu buakutuenzela Nzambi budi tshinyi?

²⁹ Bakalua kudi Yakoba, tatuʼabo, mu buloba bua Kanana, bakamuambila malu onso akabakuata ne,

³⁰ Muntu au mukelenge wa mu buloba, wakatua mbila mei makole, wakatuenzela bu batentekedi ba buloba.

³¹ Tuetu tuakamuambila ne, Tudi bambe mei malelela, katuena batentekedi,

³² tudi bana dikumi ne babidi ba tatu umue, umue wetu kenaku, ne mua nʼetu, muanʼa mukala udi mushale ne tatu wetu mu buloba bua Kanâna.

³³ Muntu au, mukelenge wa buloba, wakabambila ne, Ku bualu ebu nemmanye ne, Nudi nuamba mei malelela, nushiye umue wenu kundi, bakuabo benu bangate bia kudia bia kumana nʼabi tshiole tshidi mu nsubu yenu, yai bienu.

³⁴ Nuhingane kundi ne muanʼenu, muan a mukala, hashishe nemmanye ne, Kanuena batentekedi nudi bantu ba mei a bushuwa nunku nempingashe muan enu mu bianza bienu, nenumanye mua kuendulula mushinga mu buloba.

³⁵ Hakahongololabo bintu biakadi mu bibombi biabo, bakasangana argent ya muntu ne muntu mu tshibombi tshiandi, hakamonabo, bobo ne tatu wabo argent yabo bakatshina.

³⁶ Yakoba, tatu wabo, wakabambila ne, Nuenu nuakunjimishila bana banyi Yosefe kenaku, ne Shimeona kenaku, ne nudi nuamba kuya ne Benyamina, malu au onso adi mantonde.

³⁷ Lubena wakambila tatu wandi ne, Udi mua kushiha bana banyi balume babidi, binahanga kumuhingasha kudi umufile mu tshianza tshianyi, ne meme nemmuhingashe kûdi kabidi.

³⁸ Yakoba wakamba ne Muan anyi kena uya nʼenu, mukuluʼandi udi mufue ne anu yeye umuehele udi mushale, biamukuata bualu bubi mu nshila unuaya, hashishe, nenuvuishe nsuki yanyi mitoke to ne kanyinganyinga mu Muaba wa Bafue.