Genese 38 - Mukanda wa Nzambi Dihungila Dikulukulu ne Dihungila Dihia-dihia 2003

Yuda ne Tamâ

¹ Mu matuku au Yuda wakumuka kudi bana babo, wakaya ku di Muena Adulama dina diandi Hila.

² Yuda wakamonaku muana wa bakashi wa muena Kanana, dina diandi Shua, yeye wakamuangata, wakalala nʼandi.

³ Yeye wakimita difu, wakalela muana wa balume, wakamuidika dina ne, Ele.

⁴ Wakukuta difu dikuabo, wakalela muana wa balume, wakamuidika dina ne, Onana.

⁵ Wakimita difu dikuabo, wakalela muana wa balume, wakamuidika dina ne, Shela, hakamuleleleye wakadi mu musoko wa Keziba.

⁶ Yuda wakangatshila Ele muanʼandi, muan a bute, mukashi dina diandi Tama

⁷ Ele, muanʼa bute wa Yuda wakadi muntu mubi ku mesu kua Yehowa, Yehowa wakamushiha.

⁸ Yuda wakambila Onana ne, Uye kudi mukashi wa mukulu ebe, umuangate bu mukashi webe, yeye nealelele mukuluʼebe bana.

⁹ Onana wakamanya ne bana aba kabena bikala bu bana banyi ne hakayeye kudi mukashi wa mukulu andi, wakalela hanshi, bua yeye kaleledi mukuluʼandi bana.

¹⁰ Bualu buakenzeye buakadi bubi ku mesu kua Yehowa, ne yeye wakamushiha kabidi.

¹¹ Hashishe Yuda wakambila Tama maʼmue nʼandi ne, Ushale bu mukashi wa mu lufuila mu nsubu wa tatuʼebe to ne hadiunda muanʼanyi Shela. Yeye wakatshina ne, Yeye neafue bu muakafua bana babo. Tama wakaya, wakashikama mu nsubu wa tatu andi.

¹² Dituku dikuabo, muana wa bakashi wa Shua, mukashi wa Yuda, wakafua, Yuda wakasambibua, wakaya kudi bakoshi ba miosa ya mikoko yandi ku Timena, kudi mulunda wandi Hila, Muena Adulama.

¹³ Bakambila Tamâ ne, Tatuʼebe-muenu uyaya ku Timena bua kukoseye mikoko yandi miosa.

¹⁴ Yeye wakavula bilulu bia mu lufuila, wakaluata bilulu bikuabo, wakadibuikila ne tshilulu tshikudika, wakashikama ku tshibi tshia ku Enayima, hehi ne nshila wa ku Timena, bualu bua yeye wakamona ne, Shela wakamana kudiunda ne kabena banze kumbakisha kudiye.

¹⁵ Hakamutangila Yuda, yeye wa kelangana meji ne, Yeye udi mukashi wa masandi, bualu bua yeye wakabuikila mpala wandi ne tshilulu.

¹⁶ Yeye wakahuka kudiye hakadiye mu nshila, wakamuambila ne, Ndi nkusengelela ne, Lua biebe, ndi musue kulala nʼebe, yeye kakamanya ne yeye udi maʼmuenʼandi Mukashi wakamukonka ne, Neumpe tshinyi hawalua kundi?

¹⁷ Yeye wakamuambila ne, Nenkutumine muanʼa mbushi wa mu tshisumbu tshinyi. Mukashi wakamuebesha ne, Wewe neungeyeke tshieya to ne hawamutuma, anyi?

¹⁸ Yeye wakamuebesha ne, Nenkueyeke tshieya kai? Mukashi wakamukudimuna ne, Umpe kakanu ka ku munu webe ne mionshi misuika ku maboko ebe ne tshibangu tshiebe tshiudi nʼatshi mu tshianza tshiebe. Yeye wakamuhabi, wakaya kudiye, ne mukashi wakimita difu kudiye.

¹⁹ Mukashi wakabika, wakaya mu nshila wandi, wakavula tshilulu tshiandi tshikudika, wakaluata bilulu bia mu lufuila kabidi.

²⁰ Yuda wakatuma muana wa mbushi mu tshianza tshia mulunda wandi, Muena Adulama, bua kuangateye tshieya tshia keyekeye mu tshianza tshia mukashi, kadi yeye kakamusangana.

²¹ Hashishe, yeye wakebesha balume ba mu musoko ne, Mukashi au wa masandi wakadi ku Enayima udi kudi kunyi? Bobo bakamukudimuna di ne, Kakuakadi mukashi wa nasandi kunoko.

²² Yeye wakalukila kudi Yuda, wakamuambila ne, Tshiakumusangana, ne balume ba musoko bakungambila ne, Mukashi wa masandi kakadiku.

²³ Yuda wakamba ne, Yeye ashale nʼatshi, bua bundu kabutukuatshi, mona, nakamutumina muana wa mbushi eu, ne wewe kuakamusangana.

²⁴ Hakahita ngondo isatu, bakambila Yuda ne, Tamâ ma muenʼebe wakandamuka bu mukashi wa masandi, ne yeye wakimita difu kabidi ku masandi. Yuda wakamba ne, Balue nʼandi kunoko, bamuoshe mu kalua.

²⁵ Hakaluabo nʼandi, yeye wakatumina tatuʼandi-muenu dî ne, Nakimita difu kudi muena bintu ebi, ujingulule nfumu wa bintu ebi, kakanu ka ku munu, ne mionshi ya ku maboko ne tshibangu.

²⁶ Yuda wakabimanya, wakamba ne, Yeye udi muntambe meme buakane, bualu bua meme tshiakamubakisha kudi muanʼanyi mulume Shela. Yeye kakamumanya kabidi tshiendelele.

²⁷ Hakakumbana ngondo yandi, mona, bana ba mahasa bakadi munda muandi.

²⁸ Hakatantamaneye, muana umue wakahatula tshianza, ne muleleshi wakasuika muonshi mukunze ku tshianza tshiandi, wakamba ne, Yeye wakaluhuka diambedi.

²⁹ Kadi yeye wakahingasha tshianza tshiandi, ne mona, muana mukuabo wakaluhuka. Muleleshi wakamba ne, Mona tshihatukidi tshiwakuhatuka! Nunku bakamuidika dina ne Pelese

³⁰ Ne ku nyima muanʼabo wakadi ne muonshi mukunze musuika ku tshianza tshiandi wakahatuka, bakamuidika dina ne, Zela.