Genese 37 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bahanyisha Yosefe Badi Baya nʼAndi mu Ejipitu

¹ Yakoba wakashikama mu buloba buakadi tatuʼandi mushikame mu buloba bua Kanâna.

² Eku nkulondolola kua malu a Yakoba Hakadi Yosefe ne bidimu dikumi ne muanda mutekete, yeye wakadi udisha bimuna ne bana babo Yeye wakadi nsongalume wakadi ne bana ba balume ba Bileha ne Zilepa, bakashi ba tatuʼandi, Yosefe wakalua ne lumu luabo lubi kudi tatu abo.

³ Dinanga dia Isalele kudi Yosefe diakatamba dinanga diandi kudi bana bandi bonso, bualu bua yeye wakadi muana wakaleleye ku bununu buandi, wakamulelela tshikowelu tshia maboko male.

⁴ Bana babo bakamona ne dinanga dia tatu wabo kudiye diakatamba dia kudi buonso buabo, bobo bakadi nʼandi lukuna, kabakamanya mua kuyikila nʼandi talala.

⁵ Yosefe wakalota tshilota, wakatshiawila bana babo, bobo bakatamba kuikala nʼandi lukuna.

⁶ Yeye wakabambila ne, Unvuai, ndi nnusengelela, tshiota tshinakulota,

⁷ bualu bua monai, biakadi basuika bisumbu bia blé mu budimi, ne monai, tshisumbu tshianyi tshiakabika, tshiakimana, ne bisumbu bienu biakela tshianza munkatshi, biakatshikukuila.

⁸ Bana babo bakamuambila ne, Wewe newikale mukelenge wetu, anyi? Neutukokeshe, anyi? Bakatamba kuikala nʼandi lukuna bualu bua bilota biandi ne bua mei andi.

⁹ Yeye wakalota tshilota tshikuabo, wakatshiawila bana babo, wakabambila ne, Monai, nakulota tshilota tshikuabo, nakumona diba ne ngondo ne mitoto dikumi ne umue, biakunkukuila.

¹⁰ Wakatshiawila tatu wandi ne bana babo, tatu wandi wakamukuhulula ku di diandi ne, Etshi ntshilota kai tshiwakulota? Meme ne mamuʼebe ne bana benu netulue bua kukukukuila hanshi, anyi?

¹¹ Bana babo bakadi nʼandi mukau, kadi tatu wandi wakateka mei au mu mutshima wandi.

¹² Bana babo bakaya ku Shekeme bua kudishabo bimuna bia tatu abo

¹³ Isalele wakebesha Yosefe ne, Bana benu kabena badisha bimuna ku Shekeme, anyi? Lua biebe, nenkutume kudibo Yeye wakamuambila ne, Ndiku.

¹⁴ Yeye wakamuambila ne Ya biebe, umone ne bana benu badi bakole ne bimuna bidi bimpe, anyi, walukila ungambile. Wakamutuma ku tshibanda tshia Hebelone, ne yeye wakalua ku Shekeme

¹⁵ Mulumiana wakamusangana ne, mona, wakadi wendakana mu tshisuku, wakamuebesha ne, Udi ukeba tshinyi?

¹⁶ Yeye wakamuitaba ne Ndi nkeba bana betu, ndi nkusengelela ne, undeshe kudibo badisha mikoko.

¹⁷ Muntu wakamuambila ne, Bakumuka kunoko, nakabunvua bamba ne Tuyai ku Dotana Yosefe wakalonda bana babo, wakabasangana mu Dotana.

¹⁸ Bobo bakamumona kule kuakua, ne diambedi yeye kayi muanze kufika ha buihi nʼabo, bakamuelela tshifufu bua kumushiha.

¹⁹ Bakambilangana ne, Monai, muena bilota njowa ulua.

²⁰ Tuye kumushiha, tumuele mu mukela mukuabo, netuambe ne, Nyama mubi wakamudia, netumone tshiavuisha bilota biandi.

²¹ Lubena wakunvua tshifufu tshiabo, wakamusungila mu bianza biabo, wakamba ne, Kabamushihi.

²² Lubena wakabambila ne, Kanumatshishi mashi andi hanshi, tumuele mu mukela eu udi mu tshihela, kadi kanumulengi tshianza nansha, yeye wakamba nunku bua kumusungileye mu bianza biabo ne bua kumuhingasheye kudi tatu wandi.

²³ Hakalua Yosefe kudi bana babo, bakamukohola tshikowelu tshiandi, tshikowelu tshiandi tshia maboko male tshiakadiye muluate,

²⁴ bakamukuata, bakamuela mu mukela, mukela wakadi mûme, kamuakadi mai.

²⁵ Bakashikama bua kudiabo bidia, bakabanduluka, bakamona Bena Yishemaele bafume ku Gilada, ne tumelo tuabo tutuala manananshi ne bintu bia muhuya muimpe ne mula, bakadi bahueka mu Ejipitu.

²⁶ Yuda wakambila bana babo ne, Hatuashiha muanʼetu, ne hatuasokoka mashi andi, netushale ne tshintu kai?

²⁷ Tuye kumuhana kudi Bena Yishemaele, katumulengi tshianza, bualu bua yeye udi muanʼetu, udi musunyi wetu Bana babo bakamunvuila.

²⁸ Bena Midiyana, bendi ba mushinga bakahita, ba kahatula Yosefe mu mukela, bakamuhanyisha Bena Yishemaele ku bituha bia argent makumi abidi. Bakaya ne Yosefe mu Ejipitu.

²⁹ Lubena wakahingana ku mukela, ne Yosefe kakadimu, yeye wakahanda tshivualu tshiandi.

³⁰ Wakahingana kudi bana babo, wakamba ne, Nsongalume kenaku, ne meme nenye kudi kunyi?

³¹ Bakangata tshikowelu tshia Yosefe, bakashiha mbushi, bakina tshikowelu mu mashi,

³² bakatuma tshikowelu tshia maboko male kudi tatu wabo, bakamba ne, Tuakutshisangana hanshi, umanye ne ntshikowelu tshia muanʼebe, anyi?

³³ Yeye wakatshimanya wakamba ne, Etshi ntshikowelu tshia muanʼanyi, nyama mubi wakamudia, bulelela, Yosefe udi muhandibue bihese bihese kudi nyama.

³⁴ Yakoba wakahanda bivualu biandi, wakaluata tshilulu tshikayabala mu tshimono, wakajinga muanʼandi matuku a bungi.

³⁵ Bana bandi ba balume bonso ne bana bandi ba bakashi bonso bakabika bua kumusamba, kadi yeye wakahidia bamusambe, wakamba ne, Nenye bianyi mu Muaba wa Lufu, njinga muanʼanyi. Tatu wandi wakamudila.

³⁶ Bena Midiyana bakahana Yosefe mu Ejipitu kudi Potifâ, kamanda ka masalayi a Palô.