Genese 26 - Mukanda wa Nzambi Dihungila Dikulukulu ne Dihungila Dihia-dihia 2003

Isaka Udi Ku Gelâ

¹ Tshiole tshiakadi mu buloba ku nyima kua tshiole tshia diambedi tshiakadiku mu matuku a Abalahama Isaka wakaya kudi Abimeleke, mukelenge wa Bena Peleshete, mu Gelâ.

² Yehowa wakamueneka kudiye, wakamba ne, Kuyi mu Ejipitu, ushikame mu buloba bundi nkuambila.

³ Ushale mu buloba ebu, nengikale bebe, nenkusankishe, bualu bua nenkuhe wewe ne tunkanunuma diebe buloba ebu buonso, nenjadike nʼebe tshihungidi tshinakahunga ne Abalahama, tatuʼebe.

⁴ Nenvudishangane tunkanunuina tuebe bungi bu mitoto ya mulu, nempe tunkanunui na tuebe buloba ebu buonso bisamba bionso bia ha buloba nebisankishibue bua tunkanunuina tuebe.

⁵ Bualu bua Abalahama wakitabusha dî dianyi, wakanemekela kudimusha kuanyi, ne mikenji ne mikandu yanyi ne mei anyi.

⁶ Isaka wakashikama mu Gelâ.

⁷ Bena musoko bakamukonka bua mukashi wandi, ne yeye wakabambila ne, Yeye udi muanʼetu wa bakashi Bualu bua yeye wakatshina mua kuamba ne, Yeye udi mukashi wanyi, bua bena musoko kabamushihi bua Lebeka, bualu bua yeye wakadi miumpe kumona.

⁸ Hakashikameye mu musoko au musangu mule, dituku dikuabo Abimeleke, mukelenge wa Bena Peleshete, wakatangila ha disoso dia mu nsubu wandi, wakamona ne, Isaka wakadi usaba ne Lebeka, mukashi wandi.

⁹ Abimeleke Wakabikila Isaka, wakamuambila ne, Bulelela, yeye udi mukashi webe, bualu kai wewe wakuamba ne, Yeye udi muanʼetu wa bakashi? Isaka wakamuambila ne, Nakatshina ne, Nebanshihe bua bualu buandi.

¹⁰ Abimeleke wakamuebesha ne, Bualu buwakutuenzela budi tshinyi? Bikala muena musoko mulale ne mukashi webe, wewe wakadi kutuvuisha mu mulau.

¹¹ Abimeleke wakadimusha bantu bandi bonso ne, Bialenga muntu mulume eu anyi mukashi wandi tshianza, nebamushihe.

¹² Isaka wakakuna bintu mu buloba abu, ne tshidimu atshi wakahuola lukama lukama, Yehowa wakamusankisha.

¹³ Yeye wakalua muntu munene be, wakatamba kudiunda bunene,

¹⁴ wakadi ne bisumbu bia mikoko ne bia ngombe ne bantu ba bungi ku nyima kuandi. Bena Peleshete bakadi nʼandi mukau.

¹⁵ Mena onso a mai akimbabo kudi bahika ba Abalahama, tatu wandi, Bena Peleshete bakajibikila, bakelamu buloba.

¹⁶ Abimeleke wakambila Isaka ne, Umuka kutudi, bualu bua wewe udi ututamba bukole.

¹⁷ Isaka wakumukaku, wakashimika ntenta yandi mu tshibanda tshia Gelâ, wakashikamamu.

¹⁸ Isaka wakumbula kabidi mena a mai akimbabo mu matuku a tatu wandi Abalahama, bualu bua Bena Peleshete bakelamu buloba bakafua Abalahama, Isaka wakayidika mena akidika Abalahama.

¹⁹ Bantu ba Isaka bakimba dina mu tshibanda, bakasanganamu mushimi wa mai.

²⁰ Balami ba bimuna bia Bena Gelâ bakatandangana ne balami ba bimuna bia Isaka, bakamba ne, Dina dia mai edi ndietu. Wakidika dina dia mai ne, Eseke; bualu bua bobo bakatandangana nʼandi.

²¹ Bakimba dina dia mai dikuabo, bakaditandila kabidi. Wakadidika ne, Sitena.

²² Wakumukaku, wakimba dina dia mai dikuabo, kabakaditandila, yeye wakadidika ne, Lehobota. Yeye wakamba ne, Katataka Yehowa wakutuenzela muaba, netukumbane mu buloba.

²³ Wakumukaku, wakaya ku Bê-sheba

²⁴ Yehowa wakamueneka kudiye butuku abu mene, wakamba ne, Ndi Nzambi wa tatu webe Abalahama, kutshinyi, bualu bua meme ndi nʼebe, nenkusankishe, nenkumbashile tunkanunuina tuebe bualu bua muntu wanyi Abalahama.

²⁵ Yeye wakenzaku tshitendelelu, Wakabikila dina dia Yehowa, waka shimikaku ntenta yandi, ne bahika ba Isaka bakimbaku dina dia mai.

²⁶ Abimeleke ne Ahuzata, muanda wandi, ne Pikola, kamanda ka masalayi andi, bakumuka ku Gelâ, bakaya kudiye.

²⁷ Isaka wakabambila ne, Nudi nʼanyi lukuna, nuakungihata munkatshi muenu, nunku nuakuluila kundi bua tshinyi?

²⁸ Bobo bakamba ne, Bulelela, tuakutangila ne Yehowa udi nʼebe, nunku tuakuambilangana ne, Tutshihangane nʼebe, tuhunge nʼebe tshihungidi,

²⁹ bua wewe kutuenzedi bualu bubi, bu mutuakadi katuyi tukulenga tshianza, tuakukuenzela anu malu mimpe; tua-kukumusha talalâ, ne katataka wewe udi musankishibue kudi Yehowa.

³⁰ Yeye wakabalambishila bidia bia disanka, bakadia, bakanua.

³¹ Bakabika ne dinda, bakahingana, Isaka wakabatuma kuabo, bakaya talala.

³² Ku dituku adi mene bahika ba Isaka bakalua kudiye, bakamuambila bua dina dia mai diakimbabo ne, Tuakusangana mai.

³³ Yeye wakadidika ne, Shiba, nunku badi babikila dina dia musoko au ne, Be-sheba to ne ku dituku edi.

³⁴ Hakadi Esau ne bidimu makumi anai, wakangata Yudita, muana mukashi wa Bêli, Muena Hiti, ne Basemata, muana mukashi wa Elone, Muena Hiti, bu bakashi bandi.

³⁵ Bobo bakanyingalasha mutshima wa Isaka ne wa Lebeka.