Genese 19 - Mukanda wa Nzambi Dihungila Dikulukulu ne Dihungila Dihia-dihia 2003

Dibutuka dia Sodoma ne Âmola

¹ Banjelo aba babidi bakafikaku Sodoma dilolo Lota wakadi ushikama ku tshibi tshia ku Sodoma. Lota wakabamona, wakabika bua kubakidila, wakabakukiula hanshi.

² Yeye wakamba ne, Tangilai, ba kelenge banyi ndi nnusengelela ne Luai kunu, nubuele mu nsubu wa muntu wenu, nulalemu butuku ebu, nuvuwe makasa enu, hashishe, ne nubike dinda dionso, nenuye mu nshila wenu Bobo bakamba ne, Nansha, netuikale mu misesu butuku ebu buonso.

³ Yeye wakabatendekena bikole, bobo bakaya nʼandi bakabuela mu nsubu wandi, yeye wakabalambishila bintu bia bungi ne bidia bidi kabiyi ne luevene ne bobo bakabidia.

⁴ Kadi dia mbedi bobo kabayi banze kulala bena musoko wa Sodoma, ne banso ngalume ne bantu banunu ba nseke yonso bakanyunguluka nsubu,

⁵ ba kabikila Lota, bakamukonka ne Balume aba bakulua kudi butuku ebu badi hanyi? Uluhuke nʼabo, bua tuetu tubamanye.

⁶ Lota waka luhuka kudibo wakinshila tshibi ku nyima kuandi.

⁷ Yeye wakamba ne, Bakuetu, ndi nnusengelela ne kanuenji bualu bubi nunku.

⁸ Tangilai, ndi ne bana bakashi babidi badi kabayi banze kumanya balume, binuitabusha, nendue nʼabo kunudi, nubenzele bu munudi basue, kadi kanuenji balume aba bualu, bualu bua bobo bakulua mu diledi dia nsubu wanyi.

⁹ Bobo bakamba ne, Umuke Bobo bakamba ne, Mulumiana eu, wakahatula bua kushikameye kunoko, ne katataka yeye udi musue kuikala bu mulumbuluishi, nenkuenzele bualu bubi budi butamba bualu butudi tubenzela bobo. Bobo bakamunguila ba bungi, Lota mene mene bakasemena ha buihi bua kuhandabo tshibi.

¹⁰ Kadi bantu bakolola bianza biabo, bakakoka Lota mu nsubu kudibo, ba-kinshila tshibi.

¹¹ Bobo bakafofomesha mesu a balume bakadi bimane ku tshibi tshia nsubu, bakese ne banene, bakateketa, kabakamona tshibi.

¹² Bantu bakakonka Lota ne, Bantu bakuabo badi nʼebe anyi? Baku ne bana bebe balume ne bana bebe bakashi ne bonso baudi nʼabo mu musoko eu, umuke nʼabo mu muaba eu.

¹³ Bualu bua netubutule musoko eu, bualu bua muadi wabo wakulua munene ku mesu kua Yehowa, ne Yehowa wakatutuma bua kûshiha.

¹⁴ Lota wakaluhuka, wakambila baku bakadi babangila bana bandi bakashi ne, Jukai, numuke mu musoko eu, bualu bua Yehowa neashihe musoko Kadi yeye wakadi bu muntu udi wakula biakulakula kudi baku bandi.

¹⁵ Hakatshia butuku banjelo bakenzesha Lota ne, Bika biebe, wangate mukashi webe ne bana bebe bakashi babidi badiku diambedi kanuyi banze kufua mu dikenga dia musoko eu.

¹⁶ Kadi yeye wakajanguluka bantu bakamukuata ku tshianza tshiandi, ne tshianza tshia mukashi wandi, ne bianza bia bana bandi bakashi babidi bualu bua Yehowa wakamufuila luse, bobo bakalua nʼandi, bakamuteka ku butshika bua musoko.

¹⁷ Hakayabo nʼabo ha bule umue wabo wakamba ne Nyema lubilu, bua kuhandisha muoyo webe kutangidi ku nyima kuebe, kushadi ha mpata nyema ku mikuna kufu biebe.

¹⁸ Lota wakabambila ne, Mukelenge wanyi, kuenji nunku,

¹⁹ tangila, muntu webe wakamana kusangana luse ku mesu kuebe, ne wewe wakavudisha luse luebe kundi hawakasungila muoyo wanyi, tshiena mua kunyemena ku mikuna, bua bualu bubi nebunkuate, nenfue bianyi.

²⁰ Tangila musoko eu udi ha buihi bua kunyemenamu, udi mukese, witabushe bua mpandilemu (musoko eu udi mukese nansha?) ne mutshima wanyi newikale ne muoyo.

²¹ Yeye wakamuambila ne, Nakuitabusha bualu ebu kabidi, tshiena nshiha musoko eu uwakulombela.

²² Nyemenamu lubilu, bualu bua tshiena mua kuenza bualu wewe kuyi muanze kufikaku. Nunku bakabikila dina dia musoko au ne, Soâ.

²³ Diba diakadi dimane kubanda mulu hakabuela Lota mu Soa.

²⁴ Hashishe, Yehowa wakamatshisha mu Sodoma ne Amola soufre ne kalua bia mu diulu kudi Yehowa.

²⁵ Yeye wakabutula misoko ai ne mpata yonso, ne bantu bonso ba mu misoko, ne bintu biakadi bidiunda mu buloba.

²⁶ Kadi mukashi wa Lota wakatangila ku nyima kuandi, wakakudimuka dibue dia luehu.

²⁷ Abalahama wakabika ne dinda dionso, wakaya ku muaba wakimaneye ku mpala kua Yehowa;

²⁸ wakatangila ku luseke lua Sodoma ne Amola ne Mpata yonso, ne tangilai, muishi wakadi ubanda bu muishi wa tshikutu.

²⁹ Hakabutula Nzambi misoko ya mu Mpala, yeye wakavuluka Abalahama, wakumusha Lota munkatshi mua dikenga hakabutuleye misoko kuakadi Lota mushikame.

³⁰ Lota wakumuka ku Soâ, wakaya kushikama ku mikuna, yeye ne bana bandi bakashi babidi, wakatshina bua kushikama ku Soâ, wakikala biandi ne bana bandi bakashi babidi mu lubuebue.

³¹ Muanʼa bute wakambila muanʼa mukala ne, Tatu wetu udi mununu, ne kakuena mulume mukuabo udi mua kulua kutudi bu mudi tshilele tshia bonso ba ha buloba.

³² Lua, tunuishe tatu wetu nvinyo, netulale nʼandi, bua tuetu tulelele tatu wetu bana.

³³ Bakanuisha tatu wabo nvinyo butuku abu, ne muaba bute wakabuela, wakalala ne tatu wandi, tatu wandi kakamanya hakalaleye ne hakabikeye.

³⁴ Hakatshiabu muanʼa bute wakambila muanʼa mukala ne, Butuku bua lelu nakulala ne tatu wanyi, tumunuishe nvinyo butuku ebu kabidi, wewe ubuele, ulale bandi, bua tuetu tulelele tatu wetu bana.

³⁵ Bakanuisha tatu wabo nvinyo butuku abu kabidi, ne muanʼa mukala wakabika, wakalala nʼandi, ne tatu wandi kakamanya hakalaleye ne hakabikeye.

³⁶ Nunku bana bakashi ba Lota babidi bakimita mafu kudi tatu wabo.

³⁷ Muanʼa bute wakalela muana mulume, wakamulelela dina ne, Moaba, yeye wakadi nkambua wa Bena Moaba to ne lelu.

³⁸ Muanʼa mukala wakalela muana mulume kabidi, wakamuidika dina ne, Beneami, yeye wakadi nkambua wa Bena Amona tô ne lelu.