Genese 13 - Mukanda wa Nzambi Dihungila Dikulukulu ne Dihungila Dihia-dihia 2003

Abalama ne Lota Badi Bahanduluka

¹ Abalama wakumuka mu Ejipitu ne mukashiʼandi ne bintu biandi bionso ne Lota, wakaya mu luseke lua ku Sude.

² Abalama wakadi ne bubanji be bua bimuna ne argent ne or.

³ Wakatshidi uya ku Sude to ne ku Betele kuakashimikeye ntenta wandi diambedi, hankatshi ha Betele ne Ai.

⁴ Wakaya kuakenzeye tshioshelu diambedi, ne Abalama wakahitaku dina dia Yehowa.

⁵ Lota wakaya ne Abalama, ne yeye wakadi ne mikoko ne bimuna ne ntenta.

⁶ Muaba wakadi mukese bua bobo kushikama hohamue, bualu bua bintu biabo biakadi bia bungi, kabakamanya mua kushikama hohamue.

⁷ Balami ba bimuna bia Abalama ne balami ba bimuna bia Lota bakatandangana. Bena Kanâna ne Bena Pelese bakadi mu buloba tshikondo atshi.

⁸ Abalama wakambila Lota ne, Ndi nkutendekena ne, Katutandanganyi, balami ba bintu bietu kabatandanganyi, bualu bua tudi bana ba muntu umue.

⁹ Buloba buonso kabuena ku mpala kuebe, anyi? Ndi nkutendekena ne, Tahuluka kundi bi waya ku tshianza tshia bakashi, nenye bianyi ku tshianza tshia balume ne biwaya ku tshianza tshia balume, nenye bianyi ku tshianza tshia bakashi.

¹⁰ Lota wakabanduluka, wakamona mpata ne bibanda bia musulu wa Yadene, ne tusulu tuakadi kuonso diambedi Yehowa kayi muanze kushiha Sodoma ne Amola, mpata au wakadi bu tshibundu tshia Yehowa, wakadi bu buloba bua Ejipitu, hawaya mu nshila wa ku Soa.

¹¹ Nunku Lota wakasungula mpata wonso wa Yadene, wakaya biandi ku esete, bakaha ndulukangana nunku.

¹² Abalama wakikala mu buloba bua Kanana, Lota wakashikama mu misoko ya mu mpata, wakashimika ntenta yandi tô ne ku Sodoma.

¹³ Bantu ba mu Sodoma bakadi babi, bakatamba kuhidia Yehowa.

¹⁴ Hakahanduluka Lota, Yehowa wakambila Abalama ne, Bandisha mesu ebe ha muaba ûdi muimane, utangile ku nôde ne ku sude ne ku esete ne ku wesete,

¹⁵ buloba buonso bûdi umona nenkuhebu ne tunkanunuina tuebe tshiendelele.

¹⁶ Nenkuvudishile tunkanunuina tuebe, netuikale bu dinfuenkenya dia buloba, nunku biamanya muntu mua kubala dinfuenkenya dia buloba, hashishe, tunkanunuina tuebe netubadibue kabidi.

¹⁷ Bika biebe, wendakana mu buloba buonso, mu bule buabu ne mu butshiama buabu, bualu bua nenkuhebu.

¹⁸ Abalama wakatula ntenta yandi, wakamuangala, wakaya kushikama hehi ne nu tshi ya telebinta ya Mamale idi mu Hebelone, wakenzelaku Yehowa tshioshelu.