Genese 11 - Mukanda wa Nzambi Dihungila Dikulukulu ne Dihungila Dihia-dihia 2003

Tshibumba tshia Babela

¹ Bantu bonso ba ha buloba bakadi ne muaku umue ne mei amue.

² Hashishe hakamuangalakabo ku esete, bakasangana mpata munene mu buloba bua Shinâ, bakashikamaku.

³ Bakambilangana ne, Tuyai bietu, tuenzai tushola, tutuoshe mu kalua Bakadi ne tushola bu mabue, ne bitume bu tshimama.

⁴ Bakambilangana ne, Tuyai kuasa musoko ne tshibumba tshile, musonga watshi neufike mulu mu matutu tuikale ne dina dia butumbi, bua katutangadiki ha buloba buonso.

⁵ Yehowa wakahuka hanshi bua kumona musoko ne tshibumba biakasa bana ba bantu.

⁶ Yehowa wakamba ne, Tangilai, bantu bonso badi bantu bamue, bonso badi ne muaku umue, au mmalu akabangabo kuenza, ne katataka kakuena bualu budibo basue kuenza budi mua kubakolela.

⁷ Tuyai bietu hanshi, tutompakashe muaku wabo, nunku kabena mua kunvuangana muaku wabo kabidi.

⁸ Nunku Yehowa wakabamuangalasha ha buloba buonso, bakalekela kuasa musoko.

⁹ Ka dina dia musoko diakadi Babela, bualu bua Yehowa wakatompakashaku muaku wa ba ha buloba bonso, ne Yehowa wakabamuangalashaku ha buloba buonso.

Tunkanunuina tua Sheme

¹⁰ Ei idi ndelanganyi ya tunkanunuina tua Sheme Hakadi Shema ne bidimu lukama, wakalela Âpakashada, bidimu bibidi ku nyima kua nvula munene.

¹¹ Hakalela Sheme Âpakashada, yeye wakashala ne muoyo bidimu nkama itanu, wakalela bana balume ne bana bakashi.

¹² Âpakashada wakashala ne muoyo bidimu makumi asatu ne bitanu, wakalela Shela

¹³ Hakalela Âpakashada Shela, yeye wakashala ne muoyo bidimu nkama mai ne bidimu bisatu, wakalela bana balume ne bana bakashi.

¹⁴ Shela wakashala ne muoyo bidimu makumi asatu, wakalela Ebê.

¹⁵ Hakalela Shela Ebê, yeye wakashala ne muoyo bidimu nkama mai ne bisatu, wakalela bana balume ne bana bakashi.

¹⁶ Ebê wakashala ne muoyo bidimu makumi asatu ne binai, wakalela Pelege.

¹⁷ Hakalela Ebê Pelege, yeye wakashala ne muoyo bidimu nkama mai ne makumi asatu, wakalela bana balume ne bana bakashi.

¹⁸ Pelege wakashala ne muoyo bidimu makumi asatu, wakalela Leu.

¹⁹ Hakalela Pelege Leu, yeye wakashala ne muoyo bidimu nkama ibidi ne tshitema, wakalela bana balume ne bana bakashi.

²⁰ Leu wakashala ne muoyo bidimu makumi asatu ne bibidi, wakalela Seluga.

²¹ Hakalela Leu Seluga, yeye wakashala ne muoyo bidimu nkama ibidi ne muanda mutekete, wakalela bana balume ne bana bakashi.

²² Seluga wakashala ne muoyo bidimu makumi asatu, wakalela Nahô.

²³ Hakalela Seluga Nahô, yeye wakashala ne muoyo bidimu nkama ibidi, wakalela bana balume ne bana bakashi.

²⁴ Nahô wakashala ne muoyo bidimu makumi abidi ne tshitema, wakalela Tela.

²⁵ Hakalela Nahô Tela, yeye wakashala ne muoyo bidimu lukama ne dikumi ne tshitema, wakalela bana balume ne bana bakashi.

²⁶ Tela wakashala ne muoyo bidimu makumi muanda mutekete, wakalela Abalama ne Nahô ne Halana.

Tunkanunuina tua Tela

²⁷ Ei idi ndelanganyi ya tunkanunuina tua Tela. Tela wakalela Abalama ne Nahô ne Halana, Halana wakalela Lota.

²⁸ Halana wakafua hakadi tatu wandi Tela ne muoyo mu buloba buakakulelabo bua Ula wa Bena Kasada.

²⁹ Abalama ne Nahô bakabaka bakashi, dina dia mukashi wa Abalama diakadi Salai, ne dina dia mukashi wa Nahô diakadi Mileka, muana wa Halana, tatu wa Mileka ne tatu wa Yiseka.

³⁰ Salai wakadi nkumba, kakadi ne muana nansha.

³¹ Tela wakangata Abalama, muanʼandi mulume ne Lota, muana wa Halana, muikulu wandi, ne Salai, ma muenʼandi, mukashi wa muanʼandi mulume Abalama, bakamuangala mu buloba bua Ula wa Kasada bua kuya ku buloba bua Kanâna, bakafika ku Halana, bakashikamaku.

³² Matuku a Tela akadi bidimu nkama ibidi ne bitanu, Tela wakafua mu Halana.