Ekesode 40 - Mukanda wa Nzambi Dihungila Dikulukulu ne Dihungila Dihia-dihia 2003

Badi Basa Tshitendelelu

¹ Yehowa wakambila Mose ne,

² Halua dituku dia kumudilu dia ngondo wa kumudilu, ushimike ntenta wa kusambakena.

³ Ubueshemu mushete wa tshihungidi tshia mei a Nzambi, ubuikile mushete ne tshilulu tshia mu nsubu.

⁴ Uluemu ne mesa, ulongolole bintu bidihu, uluemu ne bitekelu bia minda, utekemu minda.

⁵ Uteke tshioshelu tshia or tshia musenga wa manananshi ku mpala kua mushete, ukudike tshilulu ku mbelu kua nsubu wa tshitendelelu.

⁶ Uteke tshioshelu tshia mulambu wa kuosha ku mbelu kua nsubu wa tshitendelelu.

⁷ Uteke tshiowelu hankatshi ha ntenta wa kusambakena ne tshioshelu tshia milambu, welemu mai.

⁸ Ushimike luhangu lua tshilulu lunyunguluke, ukudike tshilulu tshia ku mbelu kua luhangu.

⁹ Wangate manyi adibo bela ha mutu, wamiamine ha nsubu wa tshitendelelu ne ha bintu bionso bidimu, ujidile nsubu ne bintu biandi bionso, neikale mujidila.

¹⁰ Umuamine manyi ha tshioshelu tshia mulambu wa kuosha, ne ha bintu biatshi bionso, ujidile tshioshelu tshioshelu netshikale tshijidila.

¹¹ Umiamine manyi ha tshiowelu ne ha mesa atshi, utshijidile.

¹² Ulue ne Alona ne bana bandi balume ku mbelu kua ntenta wa kusambakena, uboweshe mai.

¹³ Uluatshishe Alona bilulu bijidila, umuele manyi, umujidike, bua angenzele biandi mudimu wa buakuidi.

¹⁴ Ulue ne bana bandi balume kabidi, ubaluatshishe bikowelu,

¹⁵ ubele manyi bu muwakela tatuʼabo bua kukuatshilabo mudimu wa buakuidibualu ebu nebubajidile mu mudimu wa buakuidi bua tshiendelele mu bikondo biabo bionso.

¹⁶ Mose wakenza nunku, wakenza malu onso akamuambila Yehowa.

¹⁷ Bakashimika nsubu wa tshitendelelu mu dituku dia kumudilu dia ngondo wa kumudilu mu tshidimu tshibidi.

¹⁸ Mose wakashimika nsubu, wakalongolola nkanu ne mabaya, wakabueshamu mitshi, wakajadika makunshi a nsubu.

¹⁹ Wakabikila nsubu ne tshilulu tshia ha mutu ha nsubu, wakateka tshilulu tshikuabo ha mutu hatshi, bu muakambila Yehowa Mose.

²⁰ Wakabuesha mabue a mikenji mu mushete, wakateka mitshi ya kutuala nʼai mushete, wakateka tshibuikilu ha mutu ha mushete.

²¹ Wakalua ne mushete mu nsubu wa tshitendelelu, wakakudika tshilulu, wakajibikila mushete bu muakambila Yehowa Mose.

²² Wakateka mesa mu nsubu wa tshitendelelu ku luseke lua ku nôde, ku mpala kua tshilulu.

²³ Wakalongolola mampa ha mesa ku mpala kua Yehowa, bu muakambila Yehowa Mose.

²⁴ Wakateka bitekelu bia minda mu nsubu wa tshitendelelu ku mpala kua mesa ku luseke lua nsubu lua ku sude.

²⁵ Wakatemesha minda ku mpala kua Yehowa bu muakambila Yehowa Mose.

²⁶ Wakateka tshioshelu tshia or mu nsubu wa tshitendelelu ku mpala kua tshilulu,

²⁷ wakoshahu musenga wa manananshi, bu muakambila Yehowa Mose.

²⁸ Wakakudika tshilulu ku mbelu kua nsubu.

²⁹ Wakateka tshioshelu tshia mulambu wa kuosha ku mbelu kua nsubu wa tshiendelele wakoshahu mulambu wa bukula bua manvua bu muakambila Yehowa Mose.

³⁰ Wakateka tshiowelu hankatshi ha ntenta wa kusambakena ne tshioshelu tshia mulambu ya kuosha, wakelamu mai a kuowa,

³¹ akadi Mose ne Alona ne bana bandi balume bowesha nʼau bianza ne makasa.

³² Hakadibo babuela mu nsubu wa tshiendelele ne hakaluabo hehi ne tshioshelu, bakowa mai, bu muakambila Yehowa Mose.

³³ Wakashimika luhangu ludi lunyunguluka nsubu wa tshitendelelu ne tshioshelu tshia milambu ya kuosha, wakakudika tshilulu ku mbelu kua luhangu. Mose wakashikisha mudimu wonso nunku.

Difutu Didi Dibuikila Tshitendelelu

³⁴ Hashishe ditutu diakabuikila ntenta wa kusangakena, ne butumbi bua Yehowa buakûla nsubu tente.

³⁵ Mose kakamanya mua kubuela mu ntenta bualu bua difutu diakimana ha mutu ha nsubu, ne butumbi bua Yehowa buakula nsubu tente.

³⁶ Mu ngendu yabo yonso, hakabandishibua difutu ha mutu ha nsubu, Bena Isalele bakadi babanga luendu.

³⁷ Kadi hakadi difutu kadiyi dibandishibua, kabakaya mu luendu tô ne ku dituku diakabandishibua difutu.

³⁸ Bualu bua difutu dia Yehowa diakadi ha mutu ha nsubu mu munya, ne mu butuku kahia kakadihu, ku mesu kua Bena Isalele bonso mu ngendu yabo yonso.