Ekesode 30 - Mukanda wa Nzambi Dihungila Dikulukulu ne Dihungila Dihia-dihia 2003

Tshioshelu tshia Musenga wa Manananshi

¹ Wewe newenze tshioshelu tshia musenga wa manananshi ne mutshi wa acacia.

² Buludi buatshi nebuikale coudée umue, ne butshiama buatshi nebuikale coudée umue, utshidikishe ne luidi lumue, bule buatshi bua mulu nebuikale coudées ibidi; wenze nsengu yatshi ne mutshi au umue.

³ Ulamike tshiamu tshia or mutambe buimpe ha mutu hatshi ne ku nseke yatshi ne ku nsengu yatshi, nyungulula mubangu watshi ne or ku nseke yonso.

⁴ Enza biebe nkanu ya or ibidi, uyiteke ku nseke ibidi kuinshi kua mutu watshi; neyikale bu miaba ya kubueshamu mitshi ya kutshituadila.

⁵ Enza mitshi ya acacia ibidi, ulamike or ku nseke yonso.

⁶ Utshiteke hehi ne tshilulu tshidi ku mushete wa Nzambi, ku mpala kua tshibuikilu tshidi ha mutu ha mushete, kundi nsangakena nʼebe.

⁷ Alona neoshileku musenga wa manananshi dinda ne dinda hayeye kulongolola minda.

⁸ Hatemesha Alona minda dilolo, yeye neoshe musenga wa manananshi bu tshintu tshidi tshitua dihembu kudi Yehowa ku bikondo bienu bionso.

⁹ Kuoshi musenga wa manananshi udi kauyi mujidila ha tshioshelu, nansha mulambu wa nyama idiho bosha, nansha mulambu wa bukula, nansha mulambu wa nvinyo idiho banua.

¹⁰ Alona neamiamine mashi a nyama mishiha ha nsengu ya tshioshelu etshi bua kubuikidila bantu mibi yabo, yeye nênze bualu ebu musangu umue ku tshidimu ku tshidimu bikondo bienu bionso, tshidi tshia tshijila tshitambe kudi Yehowa.

Argent wa Buhikudi

¹¹ Yehowa wakambila Mose ne,

¹² Hawabala bungi bua Bena Isalele, muntu ne muntu afile bintu bia kuhikula nʼabi muoyo wandi kudi Yehowa; bua makenga makole kâbakuatshi hawababala.

¹³ Muntu ne muntu udibo babala neafile tshituha tshia nshekele bu mudibo bafila mu nsubu wa tshiendelele tshituha tshia nshekele bu kuha kuabo kudi Yehowa.

¹⁴ Muntu ne muntu udibo babala wakabita bidimu makumi abidi neafile kuha kua Yehowa.

¹⁵ Muntu mubanji kena ne bualu bua kufila tshintu tshidi tshilamba tshituha tshia nshekele bunene, ne muntu muhele kena ne bualu bua kufila tshintu tshidi tshilamba tshituha tshia nshekele bukese, hanuafila kuha kua Yehowa bua kuhikula mioyo yenu.

¹⁶ Wewe newangate argent ya dihikula dia Bena Isalele, uyiteke bua kukuatshisha mudimu wa mu ntenta wa kusangakena, neyikale bu tshiyulukidi tshia Bena Isalele ku mesu kua Yehowa bua kuhikula kua mioyo yenu.

Tshiowelu

¹⁷ Yehowa wakambila Mose ne,

¹⁸ Wewe newenze tshiowelu tshia tshiamu tshia mitaku ne tshitaku tshiatshi tshia tshiamu tshia mitaku kudibo bowa mai. Neutshiteke hankatshi ha tshitendelelu ne tshioshe lu, newelemu mai.

¹⁹ Alona ne bana bandi balume neboweshe bianza biabo ne makasa abo ne mai mu tshiowelu,

²⁰ hayabo mu ntenta wa kusangakena, nebowe mai bua bobo kabafu nansha, anyi hayabo ku tshioshelu bua kuosha nyama ha kahia kudi Yehowa.

²¹ Nunku bobo neboweshe bianza biabo ne makasa abo ne mai, bua bobo kabafu, etshi ntshilele tshiabo tshiendelele kudiye ne bana bandi badi banulonda ku nyima ku bikondo biabo bionso.

Manyi a Tshijila ne Manananshi

²² Yehowa wakambila Mose kabidi ne,

²³ Angata bintu bia manananshi bidi bitambe buimpe myrrhe bujitu bua nshekele nkama itanu, ne cinnamone bujitu bua nshekele nkama ibidi ne makumi atanu, ne canne aromatique bujitu bua nshekele nkama ibidi ne makumi atanu,

²⁴ ne nkashia bujitu bua nshekele nkama itanu bu idiho bafila mu tshitendelelu ne tshihiminu tshia manyi a olive.

²⁵ Wewe newenze manyi a tshijila adibo bela ha mutu ne bintu ebi, manyi adi atua dihembu bu mudibo benza kudi benyi ba manananshi, manyi au neikale manyi a tshijila adibo bela ha mutu.

²⁶ Wewe newamiamine ntenta wa kusangakena ne mushete wa Nzambi,

²⁷ ne mesa ne malonga onso a mesa, ne muinda ne malonga onso a muinda, ne tshioshelu tshia musenga wa manananshi,

²⁸ ne tshioshelu tshia kahia ne malonga onso a tshioshelu, ne tshiowelu ne tshitaku tshia tshiowelu.

²⁹ Wewe neubilengeshe, neubijidile, muntu yonso udi ubilenga tshianza neikale wa tshijila.

³⁰ Wewe newele Alona ne bana bandi balume manyi ha mutu, neubajidile, bua bobo bankuatshile mudimu wa buakuidi.

³¹ Wewe newambile Bena Isalele ne, Manyi au neikale ku mesu kuanyi bu manyi a tshijila adibo bela ha mutu ku bikondo bienu bionso.

³² Kuedi manyi au hamʼbidi ha bantu, kabena manyi mafuanangane nʼau, wowo adi a tshijima, neikale a tshijila kunudi.

³³ Muntu yonso udi usangisha manyi bu au, anyi udi waela muenyi, nebamumushe munkatshi mua bana babo.

³⁴ Yehowa wakambila Mose ne, Angata bintu bia manananshi a mushinga mukole bia stacte ne onyx ne gabanum, bintu bia manananshi matambe buimpe, widikishe bintu bionso ne tshihiminu tshimue.

³⁵ Ubisangishe bu manananshi adi atua dihembu kudi benyi ba manananshi, ubisangishe ne luehu lutambe buimpe ne lua tshijila.

³⁶ Wewe neuboteshe tshituha, utshiteke ku mpala kua mushete wa Nzambi mu ntenta wa kusangakena kundi nsangakena nʼebe, netshikale tshilamba tshia tshima kunudi.

³⁷ Kanudisangishidi manananshi adi atua dihembu nunku ne bintu ebi, manananshi au neikale a tshijila kudi Yehowa.

³⁸ Muntu yonso udi usangisha bintu ebi bua kudienzela manananshi, nebamumushe munkatshi mua bana babo.