Ekesode 28 - Mukanda wa Nzambi Dihungila Dikulukulu ne Dihungila Dihia-dihia 2003

Bivualu bia Bakuidi

¹ Ubikile Alona mukuluʼebe kûdi, ne bana bandi balume balue nʼandi ba munkatshi mua Bena Isalele, yeye ankuatshile mudimu wa buakuidi, Alona mene ne Nadaba ne Abihu, Eleazâ ne Itamâ, bana balume ba Alona.

² Wewe neutelele Alona, mukuluʼebe, bilulu bia tshijila, bidi bitambe buimpe.

³ Wewe neubikile bantu bonso badi ne mitshima ya lungenyi, bantu banakûsha ne lungenyi tente, bua bobo batelele Alona bilulu bia kumujidila, bua yeye ankuatshile mudimu wa buakuidi.

⁴ Ebi mbilulu bidibo ne bua kutela tshintu tshia kuteka ha tshiadi, ne efoda, ne tshikowelu, ne kazaku ka bibaka bibaka, ne tshilulu ne mukaba, bobo nebatelele Alona ne bana bandi bilulu bia tshijila, bua yeye ankuatshile mudimu wa buakuidi.

⁵ Bobo bangate or ne bilulu bia bleu ne bikunzubile ne bikunze-kunzû ne bia lin mutambe buimpe.

⁶ Bobo nebatele efoda ne bintu bia or ne bilulu bia bleu ne bukunzubile ne bikunze-kunzû ne bia lin mutambe buimpe, bintu bidibo benzesha kudi bantu badi ne lungenyi lule.

⁷ Batele bilulu bikese ha maha bua kutuangasha bituha bia efoda bibidi.

⁸ Bobo nebenze mukaba wa efoda bu mudibo benza efoda, newikale tshituha tshimue tshia ku efoda, ne bintu bia or ne bilulu bia bleu ne bikunzubile ne bikunze-kunzû ne bia lin mutambe buimpe.

⁹ Wewe newangate mabue abidi a onyx, ufundehu mena a Bena Isalele,

¹⁰ mena asambombo ha dibue dimue ne mena asambombo adi ashala ha dibue dikuabo, balondangane bu mudi kuledibua kuabo.

¹¹ Wenzeshe mabue â kudi muntu udi ne lungenyi lule lua kufunda mateta bimpe, yeye neafundehu mena a Bena Isalele, babueshe mabue mu masoso a mu bintu bia or.

¹² Wewe neuteke mabue abidi ha bilulu bia ha maha ha efoda; mabue au neikale bu tshivulukidi tshia Bena Isalele, Alona neatuale mena abo ku mesu kua Yehowa ha maha andi abidi bu tshivulukidi.

¹³ Wewe newenze bitubuidi bia or,

¹⁴ ne tukanu tua or tubidi, tudi tuhindakasha bu muonshi, uteke tukanu ku bitubuidi.

¹⁵ Wewe newenzeshe tshilulu tshia dilumbulula tshia ha tshiadi kudi bantu badi ne lungenyi lule, bobo nebenze tshilulu etshi bu muakenzabo efoda, ne bintu bia or ne bilulu bia bleu ne bikunzubile ne bilulu bikunze-kunzû ne bia lin mutambe buimpe.

¹⁶ Utshidikishe nseke mai mikosolola hankatshi bua kuikala nseke ibidi ya bunene bumue, buludi buatshi nebuikale bu ntanta wa tshianza, ne butshiama buatshi bu ntanta wa tshianza.

¹⁷ Uteke milongo ya masoso mai a kubueshamu mabue, mulongo wa kumudilu wa mabue a sardoine ne topaze ne émeraude,

¹⁸ mulongo muibidi wa mabue a escarboucle ne saphir ne calcédoine,

¹⁹ mulongo muisatu wa mabue a opale ne agate ne améthyste,

²⁰ ne mulongo muinai wa mabue a chrysolithe ne onyx ne jaspe ubueshe mabue a mu masoso.

²¹ Mabue neikale dikumi ne abidi bu bungi bua mena a Bena Isalele, nebafunde dina dia tshisamba ne tshisamba tshia Bena Isalele ha dibue ne ha dibue.

²² Newenze tukanu tua or mutambe buimpe tudi tuhindakasha bu mionshi.

²³ Wewe newenze nkanu ya or ibidi, uteke nkanu ei ku nseke ibidi ya tshilulu tshia ha tshiadi.

²⁴ Uteke tukanu tua or tuhindakasha ku nkanu idi ku nseke ya tshilulu.

²⁵ Uteke nsonga ibidi ya tukanu tuhindakasha ku bilulu bia efoda bidi ha maha, ku mpala kuabi.

²⁶ Enza biebe nkanu ya or ibidi, uyiteke ku luseke lua tshilulu tshia ha tshiadi tshituangane ne efoda.

²⁷ Enza biebe nkanu ya or ibidi, uyiteke muinshi mua bilulu bia efoda bia ha maha, ku mpala kuabi ne ku mutu kua mukaba wa efoda.

²⁸ Nebasuike tshilulu tshia ha tshiadi ku nkanu yatshi ku nkanu ya efoda ne muonshi wa bleu muhindakasha, tshilulu tshia ha tshiadi netshikale hamʼbidi ha mukaba muluka bilengele wa efoda, kabasulule tshilulu tshia ha tshiadi ku efoda.

²⁹ Alona neatuale mena a Bena Isalele ha tshilulu tshia dilumbulula tshidi ha mutshima wandi, hayeye ku muaba wa tshijila, bu tshivulukidi tshia tshiendelele ku mesu kua Yehowa.

³⁰ Ubueshe mabue a Ulima ne Tumima mu masoso a mu tshilulu tshia dilumbulula tshia ha tshiadi, a neikale ha mutshima wa Alona hayeye ku mpala kua Yehowa, Alona neatuale kulumbulula kua malu a Bena Isalele ku mpala kua Yehowa matuku onso.

³¹ Wewe neutele tshikowelu tshia efoda ne bilulu bia bleu.

³² Ushiye disoso ku mutu kua tshikowelu bua kubueshamu mutu, nyungulula disoso ne muonshi muhindakasha, bu mudibo benza tshikowelu tshia nvita tshikowelu katshihandiki nansha.

³³ Neufunde bifuanyikishi bia tumuma tua grenade ne buanda bua bleu ne bukunzubile ne bukunzekunzû kuinshi kua tshikowelu tshionso, neuteke ndibu ya or hankatshi ha tumuma,

³⁴ neuteke kadibu ka or ne kamuma, ne kadibu ka or ne kamuma to ne kuinshi kua tshikowelu tshionso.

³⁵ Alona nealuate tshikowelu henzeye mudimu, nebunvue tshiona tshia ndibu hayeye mu muaba wa tshijila ku mesu kua Yehowa, ne haluhukeye kabidi, bua yeye kafu nansha.

³⁶ Wewe newenze tshikololo tshia tshiamu tshia or, neufundehu ne, TSHIA TSHIHE A KUDI YEHOWA.

³⁷ Neutshiteke ha muonshi wa bleu muhindakasha, utshisuike ku mpala kua tshilulu.

³⁸ Netshikale ha mpala ha Alona, ne Alona neatuale mahambuka a Bena Isalele mu muaba wa tshijila hayeye bua kubajidila ne bintu bidibo bafila kudi Nzambi, netshikale ha mpala handi matuku onso bua Yehowa abitabushe.

³⁹ Wewe newenze tshikowelu bikeshe bikeshe ne buanda bua lin muimpe, ne wewe newenze tshilulu tshia lin muimpe ne mukaba muimpe mutambe.

⁴⁰ Wewe neutelele bana balume ba Alona bikowelu ne mikaba ne bifulu bia butumbi ne buimpe.

⁴¹ Wewe neubiluatshishe Alona muanʼenu ne bana bandi balume badi nʼandi, wewe neubele manyi ha mutu, ubalengeshe, ubajidile, bua bobo bankuatshile mudimu wa buakuidi.

⁴² Ubatelele mihanu ya lin ya kubuikila butaka buabo, mihanu neyikale ku tshimono mifike to ne ku bibelu.

⁴³ Alona ne bana bandi balume nebaluate mihanu ei hayabo mu tshitendelelu anyi hayabo hehi ne tshioshelu bua kuenza mudimu wabo mu muaba wa tshijila, bobo kabatuadi mahambuka, kabafu. Mukenji eu newikale kudiye ne kudi bana bandi badi banulonda ku nyima tô ne tshiendelele.