Ekesode 22 - Mukanda wa Nzambi Dihungila Dikulukulu ne Dihungila Dihia-dihia 2003

Mikenji ya Kuhingashila Bakuabo Bintu Biabo

¹ Biba muntu ngombe anyi mukoko, biamushiheye anyi biamuhaneye, yeye neahingashe ngombe itanu ku ngombe umue, ne nukoko mai ku mukoko umue.

² Biasanganabo muibi mubuele mu nsubu ne biamukumabo ne biafueye, kabena benze mushiku bualu.

³ Biamukuatabo mu munya, nebamusombuele, yeye neahingashe bintu, ne bikaleye kayi ne bintu, nebamuhane bua buibi buandi.

⁴ Biasanganabo bintu bidi ne muoyo mu tshianza tshiandi, nansha ngombe nansha mpunda nansha mukoko, yeye neahingashe bintu misangu ibidi.

⁵ Bialekela muntu ngombe wandi mu budimi bua muntu mukuabo, ne biadieye mitshi yandi ya tumuma tukese, yeye neamuhingashile bintu bidi bitamba buimpe bia mu budimi buandi ne bia mu budimi buandi bua nvinyo.

⁶ Biosha kahia bisumbu bia luosa anyi luosa lua mu budimi, muntu wakatemesha kahia neafute.

⁷ Biafila muntu argent anyi biuma mu bianza bia mukuandi bua kubilama, ne biabibabo mu nsubu muandi, biasanganabo muibi, yeye neabafute bintu misangu ibidi.

⁸ Kadi bikalabo kabayi basangana muibi, nunku muena nsubu nealue biandi kudi balumbuluishi, bua bobo bajingulule ne yeye wakalenga biuma bia mukuandi tshianza, anyi.

⁹ Biafuilanganabo bua tshintu tshionso, nansha ngombe nansha mpunda nansha mukoko nansha bilulu nansha bintu bikuabo bidi bantu bamba ne, Ebu mbualu bua bantu baye kudi balumbuluishi, muntu udi balumbuluishi bahishe yeye neafute mukuandi bintu misangu ibidi.

¹⁰ Biafila muntu nansha nyama wa mpunda nansha ngombe nansha mukoko nansha nyama mukuabo kudi mukuandi bua kumiamina, ne biafua nyama, anyi biamutahabo mputa, anyi biamuihatabo ne muntu kayi mumutangile,

¹¹ ditshiha dia Yehowa nedikale hankatshi ha bubidi buabo bua kujingulula ne, Yeye kakalenga bintu bia mukuandi tshianza, ne bitabusha mukelenge wa nyama au nunku, mukuandi kena ne bualu bua kumufuta.

¹² Kadi bibabo nyama mu tshianza tshiandi, yeye neafute mukelenge wandi.

¹³ Bikala nyama muhandibue bihese, yeye nealue ne munyinyi wandi bu tshimanymu tshia bualu, ne yeye kena ufuta bua nyama muhandibue.

¹⁴ Biasombesha muntu nansha nyama kai kudi mukuandi, ne biamutahabo mputa anyi biafueye ne muenʼandi kayiku, yeye nealamate bulelela.

¹⁵ Kadi bikalaku muenʼandi, yeye kena ne bualu bua kumufuta. Bikaleye mufutshile nyama au bua kuenza nʼandi mudimu, mushinga wakumufutshileye neukumbane.

Mikenji ya Kunvuangana

¹⁶ Biateya mulume mukashi utshidi kamama, udi kayi muanze kutangila kudi mulume, ne bialaleye nʼandi, yeye neafile biuma bia dibaka bulelela bua yeye kuikaleye mukashi wandi.

¹⁷ Biahidia tatu wa mukashi kumufila kudiye, yeye neafute biuma bu bia dibaka dia bakashi batshidi kamama.

¹⁸ Kuitabushi bua muena milongo mukashi ashale ne muoyo.

¹⁹ Muntu yonso udi ulala ne nyama nebanshihe bulelela.

²⁰ Muntu udi ushihela nzambi mikuabo nyama, kayi uyishihela Yehowa nkayandi, nebamushihe yeye.

²¹ Kuenzedi muenyi bualu bubi, kumukengeshi, bualu bua nuenu nuakadi benyi mu buloba bua Ejipitu.

²² Kanukengeshi bakashi ba mu lufuila anyi bana ba nshiya.

²³ Biwabakengesha ne biadilabo kundi, meme nengunvuile muadi wabo,

²⁴ ne tshiji tshianyi netshitambe bukole, nennushihe ne muele wa nvita, ne bakashi benu nebikale bakashi ba mu lufuila ne bana benu nebikale bana ba nshiya.

²⁵ Biwasombesha mukuabo muhele wa munkatshi mua bantu banyi argent, kumubadi bu muena dibanza, kumulombi tshia kasombelu.

²⁶ Biwangata tshilulu tshia mukuenu bu tshieya, wewe neutshihingashe kudiye diambedi diba kadiyi dianzekubuela,

²⁷ bualu bua tshiotshi tshidi anu tshiandi tshia kudibuikila nʼatshi, yeye nealale tulu munyi? Hadileye kundi, nemmunvuile, bualu bua meme ndi ne luse.

²⁸ Kutedi dina dia Nzambi tshitelatela, kuhendi mukokeshi wa bantu bebe.

²⁹ Kunengi bua kufila bintu bia kunowa kudi Nzambi, ne nvinyo ûdi ukama. Nufile banʼa bute ba balume kundi.

³⁰ Enzai nunku ne ngombe yenu ne mikoko yenu kabidi, muana neikale ne mamu wandi matuku muanda mutekete, kadi numufile kundi dituku dia muanda mukulu.

³¹ Nuenu nenuikale bu bantu bajidila kundi kanudi munyinyi wakahandabo kudi nyama ya mu mpata, nuwele kudi mbua.