Dielulula 34 - Mukanda wa Nzambi Dihungila Dikulukulu ne Dihungila Dihia-dihia 2003

Lufu lua Mose

¹ Mose wakaya ku mpata ya Moaba ku mukuna wa Nebo, ku mutu kua Pisega, kuakadi kutangilangana ne Yeleko. Yehowa wakamufila buloba buonso bua Gilada tô ne ku Dana,

² ne buloba buonso bua Nafatale, ne bua Efelayima ne Manashe ne buloba buonso bua Yuda tô ne ku mai manene a ku nyima,

³ ne buloba bua ku Sude, ne mpata wa mu tshibanda tshia Yeleko, musoko wa mabue, tô ne ku Soâ.

⁴ Yehowa wakamuambila ne, Ebu mbuloba bunakalaya Abalahama ne Isaka ne Yakoba ne, Nembuhe tunkanunuina tuenu, nakukuleshabu ne mesu ebe, kadi wewe kuena usabukaku.

⁵ Nunku Mose, muinu wa Yehowa, wakafua mu buloba bua Moaba muakamba Yehowa.

⁶ Yehowa wakamujika mu tshibanda tshia buloba bua Moaba tshiakatangilangana ne Bete-peô; kakuena muntu udi mumanye kudi lukita luandi tô ne ku dituku edi.

⁷ Hakafua Mose, yeye wakadi ne bidimu lukama ne makumi abidi: mesu andi kâkadi bileshileshi ne bukole buandi kabuakahua.

⁸ Bena Isalele bakadila Mose matuku makumi asatu mu mpata wa Moaba; nunku matuku a kudila kua Mose akashika.

⁹ Yoshua, muana wa Nuna, wakadi ne lungenyi munda muandi tente bualu bua Mose wakamutentekasha bianza biandi; ne Bena Isalele bakunvua di diandi, bakenza bu muakambila Yehowa Mose.

¹⁰ Ku dituku adi kakuena muprofete mukuabo mubike munkatshi mua Bena Isalele bu Mose, wakadi mumanyangane ne Yehowa ku mesu,

¹¹ mu bimanyinu bionso ne mu malu a kukema akamutumina Yehowa bua kuenzeye mu buloba bua Ejipitu, ne bua kuenzela Palo ne bantu bandi bonso ne buloba buandi buonso,

¹² ne mu tshianza tshikole, ne mu buowa bunene biakenza Mose ku mesu kua Bena Isalele bonso.