Dielulula 23 - Mukanda wa Nzambi Dihungila Dikulukulu ne Dihungila Dihia-dihia 2003

Badi Kabayi Mua Kubuela mu Masangisha

¹ Muntu udi mutaha mputa ku mihesa yandi anyi udi ne mihesa mikosoke kabuedi mu disangisha dia bantu ba Yehowa.

² Muana wa masandi kabuedi mu disangisha dia bantu ba Yehowa; ne tunkanuniuna tuandi kaubuedi mu disangisha dia bantu ba Yehowa tô ne hahita bikondo dikumi.

³ Muena Amona anyi Muena Moaba kababuedi mu disangisha dia bantu ba Yehowa; ne tunkanunuma tuabo kaubuedi mu disangisha dia bantu ba Yehowa tô ne hahita bikondo dikumi tshiendelele;

⁴ bualu bua bobo kabakanuha bia kudia ne mai a kunua mu nshila hanuakaluhuka mu Ejipitu; ne bualu bua bobo bakahita Belâma, muana mulume wa Beô ku Petô wa mu Mesopotamia, bua kunueleye mulau.

⁵ Kadi Yehowa, Nzambi wenu, kakunyua mei a Belâma; kadi Yehowa, Nzambi wenu, wakakudimuna mulau ulua disanka dienu, bualu bua Yehowa, Nzambi wenu, wakanusua.

⁶ Kanukebi mua kubalesha ditalala ne malu makane tô matuku enu onso.

⁷ Kanuikadi ne Muena Edome lukuna, bualu bua yeye udi muanʼenu; kanuikadi ne Muena Ejipitu lukuna, bualu bua nuenu nuakadi benyi mu buloba buandi.

⁸ Bana hadibo balela mu tshikondo tshisatu badi mua kubuela mu disangisha dia Yehowa.

Mikenji ya Mankenda

⁹ Hanuaya kuluangana ne badi nʼenu lukuna, hashishe nudikande mu malu mabi onso.

¹⁰ Bikala muntu munkatshi muenu udi kayi muakane bua malu akamukuata butuku, hashishe yeye neaye ku mpenge kua tshitudilu, kabuedi mu tshitudilu;

¹¹ kadi hafika dilolo, yeye neowe mai, ne habuela diba, yeye neahingane mu tshitudilu.

¹² Nunku nudisunguile muaba ku mpenge kua tshitudilu bua nuenu nuye ha bule bua kuhuya munda.

¹³ Muntu yonso aditekele kakasu mu bintu biandi bia nvita, ne hayeye mu tshisuku, neaumbule dina, neahingashe buloba ha mutu ha bintu biakahuyeye;

¹⁴ bualu bua Yehowa, Nzambi wenu, udi wendakana munkatshi mua tshitudilu bua kunusungila, ne bua kufila badi nʼenu lukuna mu bianza bienu; nunku tshitudilu netshikale tshia tshijila. Yehowa katangidi tshintu tshibi munkatshi muenu, kasesuki kunudi.

Mikenji ya Kusombangana Talalâ

¹⁵ Kanuhingashi muhika wakunyemena kunudi munyeme mu bianza bia mukelenge wandi;

¹⁶ yeye ashikame nʼenu mu muaba udiye usungula mu umue wa misoko yenu udi utamba kumusankisha; kanumuenzedi bibi.

¹⁷ Mukashi wa masandi kikadi munkatshi mua bana bakashi ba mu Isalele, ne muena Sodoma kikadi munkatshi mua bana balume ba mu Isalele.

¹⁸ Kanulu ne difutu dia mukashi wa masandi anji dia muntu udi bu mbua, mu nsubu wa Yehowa, Nzambi wenu, bua kushikisha diditshiha dienu; bualu bua bubidi buabo badi bu tshintu tshibi ku mesu kua Yehowa, Nzambi wenu.

¹⁹ Kanulombi mukuenu bintu bia kasombela ka bintu biwakamusombesha: kasombela ka argent ne ka bia kudia ne ka bintu bionso biwakamusombesha.

²⁰ Nudi mua kuamba muntu wa bende kasombela; kadi kanulombi mukuenu kasombela; bua Yehowa, Nzambi wenu, anuvudishile disanka mu malu onso anudi nuenza ne bianza, mu buloba bunudi nuya bua kubuhiana.

²¹ Hanuaditshiha ku mesu kua Yehowa, Nzambi wenu, kanuhangi kushikisha mitshihu yenu; bualu bua Yehowa, Nzambi wenu, nealombe bua nuyishikishe; ne bualu ebu nebuikale bubi kunudi binuahanga kuyisbikisha.

²² Kadi binuikala kanuyi baditshiha, bualu ebu kabuena bubi kunudi.

²³ Mei onso akaluhuka mukana muena nuenze bu munuakuditshiha kudi Yehowa, Nzambi wenu, bintu bidi mitshima yenu misue kufila, binuakumulaya mukana muenu.

²⁴ Hanuabuela mu budimi bua tumuma bua mukuenu, nudi mua kudia tumuma kukuta tente, kadi kanuangatshi tumuma mu tshisaka.

²⁵ Hanuabuela mu budimi bua manvua bua mukuenu, nudi mua kutula manvua mu tshianza, kadi kanutahi manvua a mukuenu ne muele.