Dielulula 22 - Mukanda wa Nzambi Dihungila Dikulukulu ne Dihungila Dihia-dihia 2003

¹ Binuatangila nansha ngombe nansha mukoko bia mukuenu bihambuka, kusokoki bualu ebu kudiye, kadi ubihingashe kudi mukuenu.

² Bikala mukuenu kayi ha buihi nʼenu, anyi biwikala kuyi mumumanye, hashishe nuye nʼabi ku nsubu kuenu, nushale nʼabi tô ne halua mukuenu bua kubikeba, nuenu nubihingashe kudiye.

³ Nenuenzele nyama wandi wa mpunda nunku kabidi, ne bilulu biandi; nenuenzele bintu bionso bia mukuenu biakajimisheye ne wewe wakabiangula, kanubisokoki.

⁴ Binuatangila nansha mpunda nansha ngombe bia mukuenu biakahona hanshi mu nshila, kanubisokoki, kadi numukuatshishe bua kubibisha kabidi.

⁵ Mukashi kaluatshi bilulu bia mulume, ne mulume kaluatshi bilulu bia bakashi: muntu yonso udi wenza malu au nunku udi bu tshintu tshibi ku mesu kua Yehowa, Nzambi wenu.

⁶ Binuasangana disua dia nyunyu mu nshila ku mutshi anyi ha buloba, ne bana ba nyunyu anyi makela bidimu, ne mukashi wa nyunyu udi ushikama ha bana anyi ha makela, kanuangatshi mukashi wa nyunyu ne bana bandi kabidi;

⁷ nulekele mukashi wa nyunyu tshianana, kadi nudi mua kudiangatshila bana ba nyunyu; nunku malu enu neikale mimpe, nenuvudishe matuku enu.

⁸ Hanuasa nsubu muhia-muhia, nenuenze kabidi lumbu tukese ku mutu kua nsubu, nunku muntu kahonyi hanshi, ne mashi andi kaikadi ku nsubu yenu.

⁹ Kanukunyi ntete ya mishindu ibidi mishilangane mu budimi bua tumuma tukese, anyi nebajidile bintu bionso biakadiundamu ne ntete inuakukuna ne tumuma tukese tudi mitshi ei ikuama.

¹⁰ Kanusuiki ngombe ne mpunda ku mutshi wa tshikokedi umue.

¹¹ Kanuluatshi tshilulu tshiakakumabo ne miosa ya mikoko misambakasha ne buanda bua lin.

¹² Nudienzele bisele ku mpenga inai ya bilulu bienu binudi baluata.

Mikenji Idi Ikandika Masandi

¹³ Biabaka mulume mukashi, adi ulala nʼandi ne udi umukina,

¹⁴ udi wambila bakuabo mei a bundu, udi wona lumu luandi, udi wamba ne, Nakabaka mukashi eu ne hanakasangila nʼandi bulalu, tshiakasangana bimanyinu bu mukashi utshidi kamama;

¹⁵ hashishe tatu wa mushikankunde eu ne mamu wandi nebaluhuke ne bimanyinu biandi bu bia mukashi utshidi kamama kudi bakulu ba mu musoko ne ku tshilumbuluidi tshia ku tshibi tshia musoko.

¹⁶ Tatu wa mushikankunde neambile bakulu ne, Nakafila muanʼanyi kudi mulume eu bu mukashi wandi, ne yeye udi umukina;

¹⁷ yeye wakambila bakuabo mei a bundu ne, Tshiakasangana bimanyinu bu bia mukashi utshidi kamama kudi muana webe; kadi ebi mbimanyinu biandi bu bia mukashi utshidi kamama. Nebavungulule tshilulu ku mesu kua bakulu ba mu musoko.

¹⁸ Bakulu ba mu musoko au nebakuate muntu au, nebamukengeshe;

¹⁹ ne bobo nemmuambile ne, Ufute lukama lua nshekele ya argent ne yeye neayifile kudi tatu wa mushikankunde eu, bualu bua yeye wakuona lumu lua mukashi utshidi kamama mu Isalele: yeye neikale mukashi wandi, yeye kena mua kumuhidia tô matuku andi onso.

²⁰ Kadi bikala bualu ebu bulelela, kabakamusangana ne bimanyinu bu bia mukashi utshidi kamama,

²¹ hashishe nebalue ne mushikankunde eu ku tshibi tshia nsubu wa tatu wandi, ne balume ba mu musoko nebamukume ne mabue tô ne hafileye, bualu bua yeye wakuenza bualu bua tshikama mu Isalele, wakuenza bu mukashi wa masandi mu nsubu wa tatu wandi: nunku nenûmushe malu mabi munkatshi muenu.

²² Biasanganabo mulume mulale ne mukashi wa muntu mukuabo, nebashihe bubidi buabo, ne mulume wakadi ulala ne mukashi eu ne mukashi kabidi: nunku nenumushe malu mabi munkatshi mua Isalele.

²³ Bikalaku mushikankunde utshidi kamama, udi mubangila kudi mulume, ne muntu mukuabo udi usangakena nʼandi mu musoko, udi ulala nʼandi;

²⁴ hashishe nebalue nʼabo bubidi buabo ku tshilumbuluidi tshia ku tshibi tshia musoko au, nenubakume ne mabue tô ne hafuabo; mushikankunde, bualu bua yeye kakadila hakadiye mu musoko, ne mulume, bualu bua yeye wakanyanga mukashi wa muena mutumba nʼandi: nunku nenumushe malu mabi munkatshi muenu.

²⁵ Kadi bikala mulume usangakena ne mushikankunde udi mubangila kudi mulume mukuabo mu budimi, udi umuakuata ku bukole, udi ulala nʼandi, anu mulume wakalala nʼandi neafue biandi;

²⁶ kadi kanuenji mushikankunde bualu; yeye kena muenze bualu bubi budibo mua kumushihela; bualu ebu budi bu muntu udi uhika ku mpala kua muena mutumba nʼandi udi umushiha;

²⁷ bualu bua yeye wakasangakena nʼandi mu budimi; ne mushikankunde mubangila kudi mukuabo wakadila, ne kakuakadi muntu bua kumusungila.

²⁸ Biasangakena mulume ne mushikankunde utshidi kamama, kayi mubangila kudi mukuabo, biamukuateye ku bukole bua kulala nʼandi, ne bantu badi babasangana;

²⁹ hashishe mulume wakalala nʼandi, neafute tatu wa mushikankunde nshekele ya argent makumi atanu, ne yeye neikale mukashi wandi, bualu bua yeye wakamunyanga, kena mua kumuhidia matuku andi onso.

³⁰ Muntu kabaki mukashi wa tatu wandi: muntu kavudi tshilulu tshia tatu wandi.