Dielulula 17 - Mukanda wa Nzambi Dihungila Dikulukulu ne Dihungila Dihia-dihia 2003

¹ Kanushihedi Yehowa, Nzambi wenu, ngombe anyi mukoko bidi kabiyi biakane, anyi tshintu tshikuabo tshidi tshibi; bualu ebu budi bundu ku mesu kua Yehowa, Nzambi wenu.

² Binuasangana muntu mu misoko idi Yehowa, Nzambi wenu, unuha, nansha mulume nansha mukashi udi wenza bualu bubi ku mesu kua Yehowa, Nzambi wenu, udi ushiha tshihungidi tshia Yehowa,

³ wakaya bua kukuatshila nzambi mikuabo mudimu, ne wakayitendelela, nansha diba nansha ngondo, nansha bintu bikuabo bia mu diulu bindi muhidie;

⁴ bikalabo banuambile dî edi anyi binuikala bunvue lumu lua bualu ebu ku matshu, nenukebakebe tô ne bikala bualu ebu bua bundu buenjibue bulelela mu Isalele,

⁵ hashishe nenulue ne muntu wakenza bualu bubi ebu ku bibi bia musoko, nansha mulume nansha mukashi, nenubakume ne mabue, nenubashihe.

⁶ Numushihe anu ku mei a bamonyi babidi anyi basatu; kanumushihi anu ku dî dia mumonyi umue.

⁷ Bamonyi ba bualu nebolole bianza kudiye diambedi bua kumushiha, ne ku nyima bantu bonso nebolole bianza biabo. Nunku nenumushe malu mabi munkatshi muenu.

⁸ Bikala tshilumbu tshinuhite bukole, nansha hankatshi ha bashihianganyi, nansha hankatshi ha muntu ne muntu badi badiakuilangana, nansha hankatshi ha muntu ne muntu badi batutangana, mmalu adibo batandangana nʼau mu misoko yenu; hashishe nenubike, nenuye ku muaba udi Yehowa, Nzambi wenu, usungula;

⁹ nenulue kudi bakuidi, Bena Lewi, ne kudi mulumbuluishi munene wa mu matuku au; nenubakonke, ne bobo nebanukosele tshilumbu.

¹⁰ Nenuenze bu mudibo bamba ha muaba udi Yehowa, Nzambi wenu, usungula; nuenu nenutumikile mei onso adibo banuyisha:

¹¹ nenuenze bu mudi mikenji idibo banuyisha, ne bu dilumbulula didibo banuambila; kanusesuki ku tshianza tshia balume anyi ku tshianza tshia bakashi mu dî didibo banuambila.

¹² Muntu udi ne tshitshu, udi uhidia kunvua dî dia muakuidi udi muimane ku mesu kua Yehowa, Nzambi wenu, bua kumukuatshia mudimu, anyi dî dia mulumbuluishi, nebashihe muntu eu: nunku nenumushe malu mabi munkatshi mua Bena Isalele.

¹³ Bantu bonso nebunvue mei abo, nebatshine, kabena benza malu a tshitshu kabidi.

Malu a Mukelenge Wabo

¹⁴ Hanuabuela mu buloba budi Yehowa, Nzambi wenu, unuha, hanuabuhiana, bakashikamamu, hanuamba ne, Tudisunguile mukelenge bua kuteka ku mutu kuetu bu bisamba bikuabo bidi bituela munkatshi;

¹⁵ nenutekele mukelenge ku mutu kuenu anu yeye udi Yehowa, Nzambi wenu, Usungula; nutekele anu wa munkatshi mua bana benu bu mukelenge wenu; kanuteki muenyi udi kayi muanʼenu ku mutu kuenu.

¹⁶ Kadi yeye kena ne bualu bua kudikumbashila tubalu tua bungi, anyi bua kuhingisha bantu mu Ejipitu bua kuheteye tubalu tua bungi; bualu bua Yehowa wakamana kunuambila ne, Kanuhinganyi mu nshila au kabidi.

¹⁷ Yeye kena ne bualu bua kudiangatshila bakashi ba bungi bua kukudimuneye mutshima wandi; yeye kena ne bualu bua kudikumbashila biamu bia argent ne bia or.

¹⁸ Hashikameye ha nkuasa wandi wa bukelenge, yeye neadifundile mukanda wa mikenji idi mifunda mu mukanda au udi mu bianza bia bakuidi ba mu Bena Lewi;

¹⁹ yeye neashale ne mukanda eu, neaubale matuku andi onso; nunku yeye neamanye mua kutshina Yehowa, Nzambi wandi, ne mua kutumikila mei onso ne mikenji yonso bidi bifundamu, bua kubienza;

²⁰ nunku mutshima wandi kaudibandishi ku mutu kua bana babo, nunku yeye kasesuki mu nshila wa mikenji nansha ku tshianza tshia balume nansha ku tshianza tshia bakashi; nunku nebavudishe matuku a bukelenge buandi, ne a bana bandi mu Isalele.