Dielulula 15 - Mukanda wa Nzambi Dihungila Dikulukulu ne Dihungila Dihia-dihia 2003

Tshidimu tshia Buhikudi

¹ Hahita bidimu muanda mutekete nenulekelelangane bintu.

² Nenulekelelangane bintu nunku: muena dibanza yonso nealekele bintu biakasombesheye muena mutumba nʼandi; yeye kena wenzesha muena mutumba nʼandi ne muanʼabo mulume bua kuhingishabo bintu ebi; bualu bua etshi ntshidimu tshiakabambila Yehowa bua kulekelelangana bintu.

³ Nudi mua kulombela bantu ba bende bintu ebi; kadi bintu bionso bidi muanʼenu mulume nʼabi, nuenu nenubilekele.

⁴ Kadi bantu bahele kabena bikala munkatshi muenu; (bualu bua Yehowa neanusankishe mu buloba budi Yehowa, Nzambi wenu, munuhe bu buhianyi buenu;)

⁵ binunvua dî dia Yehowa, Nzambi wenu, bua kutumikila mikenji yonso inakunuambila lelu.

⁶ Bualu bua Yehowa, Nzambi wenu, neanusankishe bu muakanulayeye; nuenu nenusombeshe bisamba bia bungi bintu, kadi kanuena nusomba bintu kudibi; nuenu nenukokeshe bisamba bia bungi, kadi bisamba ebi kabiena binukokesha.

Kusombesha Bahele Bintu

⁷ Bikalaku muntu muhele, umue wa bana benu, ku mbelu kua muntu yonso mu buloba budi Yehowa, Nzambi wenu, munuhe, kanukoleshi mitshima yenu, kanubuikidi tshianza tshienu kudi muanʼenu udi muhele;

⁸ kadi nubulule tshianza tshienu kudiye, numusombeshe bintu bidiye musue bua kushikisheye nʼabi malu andi.

⁹ Nudimuke, kanuedianganyi meji mabi mu mitshima yenu ne, Tshidimu tshia muanda mutekete, tshidibo balekelelangana bintu tshikadi ha kulua, ne kanuenzedi muanʼenu muhele bibi, bua kubenga kumuha tshintu; bua kadidi kudi Yehowa bualu buebe, ne bua wewe kushadi ne bubi.

¹⁰ Numuke bintu bulelela; mitshima yenu kayinyingaladi, hanuamuhabi; bua bualu ebu Yehowa, Nzambi wenu, neanuvudishile disanka mu mudimu wonso unudi nuenza ne bianza bienu.

¹¹ Bualu bua bahele nebikale mu buloba buenu matuku onso, nunku nakanuambila ne, Nubulule tshianza tshienu kudi muanʼenu, kudi mukengi ne kudi muhele mu buloba buenu.

Mua Kuenzela Bahika

¹² Biakusumbishabo Muena Ebelu mulume anyi Muena Ebelu mukashi, yeye neakukuatshile mudimu bidimu bisambombo; kadi hafika tshidimu tshia muanda mutekete wewe neumulekele.

¹³ Hawamulekela, kumutumi ne bianza bituhu;

¹⁴ umuhe bintu bia bungi munkatshi mua mikoko yebe, ne bia bintu biwakuhuola ne bia nvinyo; bu mudi Yehowa, Nzambi webe, mukusankishe, wewe neumuhe.

¹⁵ Uvuluke ne wewe wakadi muhika mu buloba bua Ejipitu, ne Yehowa, Nzambi wenu, wakakubikula: ka nunku ndi nkuelela mukenji eu lelu.

¹⁶ Bikaleye mukuambile ne, Tshiena musue kumuka kûdi, bualu bua yeye udi ukunanga ne ba mu nsubu webe, wakabela disanka kûdi,

¹⁷ hashishe wewe newangate nkulonda, neumutuhite ditshu ku tshibi ne yeye neikale muhika webe tshiendelele. Newenzele muhika mukashi muomumue.

¹⁸ Bualu ebu kabuena butamba bakole ku mesu kuebe, hawamulekela, bualu bua yeye wakakuenzela mudimu bidimu bisambombo udi utamba muena mudimu wa difutu misangu ibidi; hashishe Yehowa, Nzambi wenu, neanusankishe mu malu onso anudi nuenza.

Kujidila kua Banʼa Bute

¹⁹ Nenujidile Yehowa, Nzambi wenu, banʼa bute balume ba ngombe ne ba mikoko; kanuenzeshi banʼa bute ba ngombe mudimu, kanukoshi banʼa bute ba mikoko miosa.

²⁰ Wewe ne ba mu nsubu webe nenubadie ku mpala kua Yehowa, Nzambi wenu, ku tshidimu ku tshidimu mu muaba udi Yehowa musungule.

²¹ Bikala umue wabo kayi muakane, udi mulema anyi udi mufofo anyi udi muoneka muaba mukuabo, kanumushihedi Yehowa, Nzambi wenu.

²² Nudi mua kumudia ku mbelu kuenu: muntu udi muakane anyi udi kayi muakane udi mua kumudia bu mudiye udia kabuluku anyi mbashi.

²³ Kadi kanudi mashi andi; nuahongolole hanshi ha buloba bu mai.