Dielulula 14 - Mukanda wa Nzambi Dihungila Dikulukulu ne Dihungila Dihia-dihia 2003

¹ Nuenu nudi bana ba Yehowa, Nzambi wenu: kanuditahi nsalu, kanubeyi makiki enu bualu bua bantu bafue.

² Bualu bua nuenu nudi bantu ba tshijila kudi Yehowa, Nzambi wenu; Yehowa wakanusungula munkatshi mua bantu bonso ba ha buloba bua nuenu nuikale bantu ba buhianyi buandi.

Bia Kudia Bimpe ne Bidi Kabiyi Bimpe

³ Kanudi bintu bidi kabiyi biakane.

⁴ Ei idi nyama mudi mua kudia: ngombe ne mukoko ne mbushi,

⁵ mbashi ne kabuluku ne ntole ne mbushi wa ha mpata, ne lusumbi, ne ngulungu ne mukoko wa mu mikuna.

⁶ Bimuna bionso bidi ne mikono mihanduluke, bidi bihingishilula bintu mukana: nudi mua kudia nyama ei.

⁷ Kadi kanudi nyama mikuabo idi mihingishilula bintu mukana anyi idi ne mikono mihanduluke: kamelo, ne nsenji, ne kabundi ka ku mputu; bualu bua nyama ei idi mihingishilula bintu mukana, kadi kayena ne mikono mihanduluke, kayena miakane kunudi.

⁸ Ngulube kena muakane kunudi bualu bua yeye udi ne mikono mihanduluke kadi kena uhingishilula bintu mukana; kanudi munyinyi wa nyama ei, kanulengi tshianza hamʼbidi ha bitalu biai.

⁹ Ebi mbintu bionso bia mu mai binudi mua kudia: bintu bionso bidi ne mialala ne mabamba nudi mua kudia;

¹⁰ kanuena mua kudia bintu bidi kabiyi ne mialala ne mabamba; kabiena biakane kunudi.

¹¹ Nudi mua kudia nyunyu yonso idi miakane.

¹² Kadi ei nyunyu mudi kanuyi mua kudia: nyunyu wa mukanku, ne nyunyu wa gypaete, ne nyunyu wa orfraie, ne nyunyu wa faucon,

¹³ ne nyunyu wa milan mufike ne wa milan mukunze,

¹⁴ ne mushindu wonso wa tshikololo,

¹⁵ ne nyunyu wa nfiondo, ne nyunyu wa chat-huant ne nyunyu wa mouette ne wa nkumbi-kumbi,

¹⁶ ne nyunyu wa tshihungulu ne nyunyu wa chouette, ne nyunyu wa ibis,

¹⁷ ne nyunyu wa pêlican, ne nyunyu mutoke utu wadia bintu bibole, ne nyunyu wa cormoran,

¹⁸ ne nyunyu wa cigogne, ne nyunyu wa hêron ne nyunyu wa huppe ne nyunyu ya mudima.

¹⁹ Bintu bionso bidi ne mahuahua ne bidi bidikoka hanshi kabiena biakane kunudi; kanubidi.

²⁰ Nudi mua kudia nyunyu yonso idi miakane.

²¹ Kanudi tshintu tshidifuile: nudi mua kuha muenyi udi ku mbelu kuenu tshintu atshi, yeye atshidie; anyi nudi mua kutshihanyisha muntu wa bende; bualu bua nuenu nudi bantu ba tshijila kudi Yehowa, Nzambi wenu. Kanulambi muana wa mukoko mu mabele a mamu wandi.

Mukenji wa Tshia Dikumi

²² Nufile kudi Yehowa tshintu tshia dikumi tshia bintu bionso binudi nuhuola ku tshidimu ku tshidimu.

²³ Nudie tshintu tshia dikumi tshia manvua enu ne tshia nvinyo yenu mihia-mihia ne tshia manyi enu ne tshia banʼa bute ba ngombe yenu ne tshia ba mikoko yenu ku mpala kua Yehowa, Nzambi wenu, mu muaba udiye Usungula bua kujadikamu dina diandi; nunku nenubale bualu bua kutshina Yehowa, Nzambi wenu, matuku onso.

²⁴ Hakuvudishila Yehowa, Nzambi webe, disanka, bikala nshila mutambe kule, ne wewe kuena mua kutuala bintu biebe bualu bua muaba udi Yehowa neusungule bua kujadikamu dina diandi udi utamba kule,

²⁵ hashishe neubihane ku argent: wangate argent mu tshianza tshiebe, uye biebe ku muaba udi Yehowa, Nzambi webe, musungule;

²⁶ neudisumbile bintu bidi mutshima webe musue, nansha ngombe nansha mikoko nansha mioyo nansha maluvu makole nansha bintu bionso biudi musue; neubidie ku mpala kua Yehowa, Nzambi webe, neusanke, wewe ne ba mu nsubu webe.

²⁷ Kanuhu Muena Lewi udi ku mbelu kuenu muoyo; bualu bua yeye kena ne tshituha tshiandi ne buhianyi buandi kunudi.

²⁸ Haleha bidimu bisatu nuenu nempatule tshintu tshia dikumi tshia bintu bionso biakakumbana tshidimu atshi, nenutshiteke ku mbelu kuenu;

²⁹ ne Bena Lewi, bualu bua bobo kabena ne tshituha anyi buhianyi kunudi, ne benyi ne bana ba nshiya ne bakashi ba mu lufuila badi ku mbelu kuenu nebalue, nebadie, nebukute; nunku Yehowa, Nzambi wenu, neanuvudishile disanka mu mudimu wonso unudi nuenza ne bianza bienu.