Didimanyisha 7 - Mukanda wa Nzambi Dihungila Dikulukulu ne Dihungila Dihia-dihia 2003

Badi bamanye mua kushindama dituka diadia

¹ Ku nyima kua bualu ebu nakatangila banjelo banai bimana ku matengu anai a buloba, bakuate mpehele mai ya buloba, bua luhehele kaluhehi ha buloba, anyi ha mai manene, anyi ha mutshi.

² Nakatangila muanjelo mukuabo ubanda mulu, ufuma kudi kubanda diba, muikale ne tshimanyishilu tshia Nzambi udi ne muoyo; ne wakela dî dikole kudi banjelo banai bakadi baheshibua bukole bua kunyangabo buloba ne mai manene,

³ wamba ne, Kanunyangi buloba, nasha mai manene, nasha mitshi, tô ne hatuamana kuteka tshimanyishilu ha mpala ha bahika ba Nzambi wetu.

⁴ Nakunvua bungi bua bakatekabo tshimanyishilu, tshishikula tshimue ne mbombo mai ne binunu binai, bakatekabo tshimanyishilu ba mu tshisamba tshionso tahia bana ba Isalele.

⁵ Ba mu tshisamba tshia Yuda, bantu lubombo ne binunu bibidi bakatekibua tshimanyishilu; Ba mu tshisamba tshia Lubena, lubombo ne binunu bibidi; Ba mu tshisamba tshia Gada, lubombo ne binunu bibidi;

⁶ Ba mu tshisamba tshia Ashê, lubombo ne binunu bibidi: Ba mu tshisamba tshia Nafatale, lubombo ne binunu bibidi; Ba mu tshisamba tshia Manashe, lubombo ne binunu bibidi;

⁷ Ba mu tshisamba tshia Simeona, lubombo ne binunu bibidi; Ba mu tshisamba tshia Lewi, lubombo ne binunu bibidi; Ba mu tshisamba tshia Yisakâ, lubombo ne binunu bibidi;

⁸ Ba mu tshisamba tshia Zebulona, lubombo ne binunu bibidi; Ba mu tshisamba tshia Yosefe, lubombo ne binunu bibidi; Ba mu tshisamba tshia Benyamina, lubombo ne binunu bibidi bakatekibua tshimanyishilu.

⁹ Ku nyima kua malu a nakatangila, ne mona, tshisumbu tshinene tshia bantu tshiakadi muntu kai mua kubala, munkatshi mua ditunga dionso, ne munkatshi mua bisamba bionso, ne bantu bonso, ne miaku yonso, bimana ku mpala kua nkuasa wa butumbi ne ku mpala kua Muana wa Mukoko, baluatshishibue maye, ka matoke, bikale ne malala a mabue mu bianza biabo.

¹⁰ Ne badi bela di dikole, bamba ne, Luhandu ndua kudi Nzambi wetu udi ushikama mu nkuasa wa butumbi, ne kudi Muana wa Mukoko.

¹¹ Ne banjelo bonso bakadi bimana banyunguluka nkuasa wa butumbi, ne bakulu ne bifukibue binai bidi ne muoyo; ne bakahona ku mpala kua nkuasa wa butumbi ha mpala habo, ne bakatendelela Nzambi,

¹² bamba ne, Amen, disanka ne butumbi ne meshi ne disakidila ne buneme ne bukokeshi ne bukole bikale kudi Nzambi wetu tô ne tshiendelele; Amen.

¹³ Ne umue wa bakulu wakangandamuna dî ungambila ne, Aba badi baluatshisha ne mayeka matoke badi banganyi ne bakafuma kudi kunyi?

¹⁴ Nakamuambila ne, Mukelenge wanyi, wewe udi mumanye. Wakangambila kabidi ne, Aba mbantu badi bumuka mu dikenga dinene, ne bakuvua mayeka abo, ne bakâtokesha mu mashi a Muana wa Mukoko.

¹⁵ Bua bualu ebu badi ku mpala kua nkuasa wa butumbi wa Nzambi, ne badi bamukuatshila mudimu mu nya ne butuku mu ntempelo wandi; ne udi ushikama mu nkuasa wandi wa butumbi neashimike nsubu wandi wa tshilulu ha mutu habo.

¹⁶ Kabena hikala ne nsala kabidi, kabena bikala ne nyota kabidi, ne diba kadiena dibosha, nasha luiya lukese;

¹⁷ bualu bua Muana wa Mukoko udi munkatshi mua nkuasa wa butumbi neikale mulami wabo, ne neabalombole ku mishimi ya mai a muoyo; ne Nzambi neakuhule tshinsonshi tshionso ku mesu kuabo.