Didimanyisha 2 - Mukanda wa Nzambi Dihungila Dikulukulu ne Dihungila Dihia-dihia 2003

Dî diakafundileye ekelesia wa ku Efeso

¹ Fundila muanjelo wa ekelesia wa ku Efeso ne, Udi ukuata mitoto muanda mutekete mu tshianza tshiandi tshia balume, udi wenda munkatshi mua bitekelu bia minda muanda mutekete, udi wamba malu â ne,

² Ndi mumanye bienzedi biebe, ne mudimu webe mukole, ne ditantamana diebe, ne kuena mua kuitabusha bantu babi, ne wakateta badi badiamba ne, Tudi bapostolo, kadi kabena bapostolo, ne wakabasangana bena mashimi.

³ Ne udi ne ditantamana, ne wakatuala majitu bua dina dianyi, ne kuakuhungila.

⁴ Kadi ndi nʼebe bualu ebu ne, wakalekela dinanga diebe dia kumudilu.

⁵ Nunku, uvuiuke kuwakuhona, ukudimune mutshima webe, ne enza midimu ya kumudilu, anyi nendue kûdi, nengumushe tshitekelu tshiebe tshia muinda mu muaba watshi, biwikala kui ukudimuna mutshima webe.

⁶ Kadi udi ne bualu ebu, bua udi ne bienzedi bia Bena Nikalao lukuna, bindi nʼabi lukuna kabidi.

⁷ Udi ne matshu unvue budi Nyuma wambila ekelesia. Kudi udi uhita bukole, kudi yeye mene, nemuhe bua kudieye mutshi wa muoyo udi mu Paladiso wa Nzambi.

Dî diakafundileye ekelesia wa ka Semuna

⁸ Fundila muanjelo wa ekelesia wa ku Semuna ne, Wa Kumudilu ne Wa Kunshikidilu, wakadi mufue ne udi muikale ne muoyo kabidi, udi wamba malu â ne,

⁹ Ndi mumanye dikenga diebe ne buhele buebe (kadi wewe udi mubanshi) ne bihendu bia badi badiamba ne, Tudi Bena Yuda, ne kabena Bena Yuda; kadi badi nsunagoga wa Satana.

¹⁰ Kutshinyi malu audi wamba kukenga nʼau. Mona, diabolo udi wamba kuela bakuabo ba munkatshi muenu mu lukanu bua nuenu nutetshibue, ne nenuikale ne dikenga dia matuku dikumi. Wikale biebe ne dieyemena tô ne ku lufu, nunku nenkuhe tshifulu tshia butumbi tshia muoyo.

¹¹ Udi ne matshu unvue budi Nyuma wambila ekelesia. Udi uhita bukole kena ukengeshibua ku lufu luibidi.

Dî diakafundileye ekelesia wa ka Pêgamo

¹² Fundila muanjelo wa ekelesia wa ku Pêgamo ne, Udi ne muele wa nyiha mutue mutuisha nseke ibidi udi wamba malu â ne,

¹³ Ndi mumanye kûdi wikala, kudi nkuasa mene wa bukelenge bua Satana; ne udi ulama dina dianyi bikole, ne kuakahidia ditabusha dianyi, nasha mu matuku a Antipa, mumanyishi wanyi, wanyi wa kueyemena, wakashihibua munkatshi muenu, kudi Satana wikala.

¹⁴ Kadi ndi nʼebe malu manya-manya, bualu bua udi ne bakuabo aha badi balamata diyisha dia Belama, wakayisha Balaka bua kutekeye tshilenduishi ku mpala kua Bena Isalele, bua kudiabo bintu bishihela mpingu ne bua kuendabo masandi.

¹⁵ Nunku kabidi, udi ne bakuabo badi balamata diyisha dia Bena Nikalao muomumue.

¹⁶ Nunku, ukudimune mutshima webe; anyi nendue kûdi lubilu, ne nenduangane nʼabo nvita ne muele wa nvita wa mukana muanyi.

¹⁷ Udi ne matshu unvue budi Nyuma wambila ekelesia. Kudi udi uhita bukole, nemuhe tshituha tshia mana masokoka, ne nemuhe dibue ditoke, ne ha dibue dina dihia-dihia difundahu didi muntu kai mudimanye, anu yeye udi udiangata.

Dî diakafundileye ekelesia wa ma Tuatila

¹⁸ Fundila muanjelo wa ekelesia wa ku Tuatila ne, Muana wa Nzambi udi ne mesu andi mafuana ludimi lua kahia, ne makasa andi adi bu tshiamu tshia mitaku tshidi tshibalakana, udi wamba malu â ne,

¹⁹ Ndi mumanye midimu yebe, ne dinanga diebe ne ditabusha diebe, ne dikuatshilangana diebe dia mudimu, ne ditantamana diebe, ne midimu yebe ya kunshikidilu idi ihita ya diambedi bungi.

²⁰ Kadi ndi nʼebe bualu ebu ne, udi witabusha mukashi au Izebele, udi udibikila muprofete mukashi; ne udi uyisha ne udi uhambuisha bahika banyi bua kuendabo masandi ne bua kudiabo bintu bishihela mpingu.

²¹ Nakamuha musangu bua kukudimuneye mutshima wandi, ne kena musue kukudimuna mutshima bua masandi andi.

²² Tangila, ndi muela mu bulalu, ne ndi ngela badi benda nʼandi masandi mu dikenga dikole, bikalabo kabai bakudimuna mitshima yabo bua bienzedi biabo.

²³ Nenfuishe bana bandi ne lufu, ne ekelesia yonso neimanye ne meme nyeye udi uteta meshi ne mitshima; ne nempe kudi muntu ne muntu wa munkatshi muenu difutu bu mudi midimu yandi.

²⁴ Kadi ndi ngambila nuenu, badi bashala mu Tuatila, kudi bungi buenu badi kabai ne diyisha edi, badi kabai bamanye malu male a Satana, mbu mudibo bamba ne, Tshiena nteka bujitu bukuabo hamʼbidi henu.

²⁵ Kadi tshinudi nʼatshi, nutshikuate bikole tô ne hanalua.

²⁶ Udi uhita bukole ne udi ulama midimu yanyi tô ne kunshikidilu, nemuhe bukokeshi ha mutu ha bisamba bia bende;

²⁷ ne yeye neabakokeshe ne dikombo dia tshiamu tshifike, bu mudi bifuadi bia mufumbi bidi bitshibuluka bihesa bihesa; bu munakangata kabidi bukokeshi kudi Tatu wanyi.

²⁸ Ne nemuhe mutoto wa nkesha.

²⁹ Udi ne matshu unvue budi Nyuma wambila ekelesia.