Dibadika 31 - Mukanda wa Nzambi Dihungila Dikulukulu ne Dihungila Dihia-dihia 2003

Isalele Udi Usombuela Midiyana

¹ Yehowa Wakambila Mose ne,

² Usombuele Bena Isalele bualu bua Bena Midiyana, ku nyima wewe neusangakene ne bankambua bebe.

³ Mose wakambila bantu ne, Bena nvita badi munkatshi muenu bangate bintu bia nvita bualu bua kushikisha dikenga didi Yehowa musue kusombuela nʼadi Bena Midiyana.

⁴ Tshisamba ne tshisamba tô ne bisamba bionso bia Bena Isalele nebitume bantu tshinunu ku nvita.

⁵ Nunku bakasangisha ku bisamba bionso bia Bena Isalele bantu tshinunu ku tshisamba, bantu tshinunu ku tshisamba, bena nvita binunu dikumi ne bibidi.

⁶ Mose wakabatuma ku nvita, bantu tshinunu ku tshisamba ku tshisamba, Pinehasa, muana mulume wa Eleazâ muakuidi, wakaya nʼabo ne bintu bikuabo bia mu nsubu wa tshitendelelu ne mpungi ya kuela nʼai dî dikole mu tshianza tshiandi.

⁷ Bakaluangana ne Bena Midiyana bu muakambila Yehowa Mose, bakashiha balume bonso.

⁸ Bakashiha bakelenge ba mu Midiyana kabidi: Evi ne Lekeme ne Sû ne Hû ne Leba bakelenge batanu ba Midiyana bakashiha Belama, muana mulume wa Beô, ne muele wa nvita kabidi.

⁹ Bena Isalele bakaya ne bakashi ba Bena Midiyana ne bana babo bakese, bakangata kabidi bimuna biabo ne bisumbu bia mikoko ne bintu biabo bionso.

¹⁰ Bakosha misoko yabo yakadibo bashikamamu ne bitudilu biabo ne kahia.

¹¹ Bakangata bintu bionso bia bantu ne bia bimuna kabidi.

¹² Bakalua ne bantu bakakuatabo ne bintu biabo bionso kudi Mose ne kudi Eleazâ muakuidi ne kudi tshisumbu tshionso tshia Bena Isalele, ku tshitudilu tshiakadi mu mpata ya Moaba, hehi ne Yadene ku Yeleko.

¹³ Mose ne Eleazâ muakuidi ne bakelenge bonso ba mu tshisumbu bakaya bua kusangakena nʼabo ku butshika bua tshitudilu.

¹⁴ Mose wakadi ne tshiji kudi ba ku mutu kua bena nvita, tuhita tua binunu binunu ne tuhita tua nkama nkama, bakahingana ku nvita.

¹⁵ Mose wakabambila ne, Nuakushiya bakashi bonso ne muoyo, anyi?

¹⁶ Monai, bobo bakenzesha Bena Isalele bua kuenzabo malu mabi kudi Yehowa bualu bua dî dia Belâma mu bualu bua Peô, nunku dikenga dikole diakadi munkatshi mua bantu ba Yehowa.

¹⁷ Nunku nushale bana ba balume bakese bonso badi munkatshi muabo ne mukashi yonso ukadi mumanyibue kudi mulume.

¹⁸ Kadi bana ba bakashi badi kabayi banze kumanyibua kudi balume nubashiye ne muoyo bualu buenu.

¹⁹ Nushikame ku butshika bua tshitudilu matuku muanda mutekete, muntu yonso wakashiha mundi mukuabo, anyi wakalenga muntu mufue tshianza, adilengeshe ku dituku disatu ne dituku dia muanda mutekete ne nuenu ne bantu banuakukuata.

²⁰ Bualu bua bilulu, ne bintu bionso biakenzabo ne biseba, ne bintu bionso biakenzabo ne miosa ya mbushi, ne bintu bionso biakenzabo ne mabaya, nenudilengeshe bua bintu ebi.

Badi Babanyangana Biakanyengabo

²¹ Eleazâ muakudi wakambila bena nvita bakaya mu nvita ne, Eu udi mukenji wakela Yehowa kudi Mose:

²² kadi or ne argent ne tshiamu tshia mitaku ne tshiamu tshifike ne tshiamu tshia étain ne tshia plomb

²³ ne tshintu tshionso tshidi katshiyi tshitua mu kahia, nenutshiteke mu kahia bua kutshilengesha, kadi nenutshilengeshe ne mai adibo balengesha nʼau bintu, bintu bionso bidi bihia mu kahia nenubilengeshe mu mai.

²⁴ Nenuvuwe bilulu dituku dia muanda mutekete, nenubale bakane, ku nyima nenuhingane mu tshitudilu.

²⁵ Yehowa wakambila Mose ne,

²⁶ Ubale bungi bua bintu biakangatabo ne bia bantu ne bia bimuna, ne wewe ne Eleazâ muakuidi ne ba ku mutu kua nsubu ya batatuʼabo mu Isalele.

²⁷ Nutahulule bintu bituha bibidi, tshituha kudi bena nvita bakaya mu nvita ne tshikuabo kudi tshisumbu tshionso tshia Bena Isalele.

²⁸ Nuangate kabidi mulambu wa Yehowa kudi bantu bakaya mu nvita mundi umue ku bantu nkama itanu, ne umue wa ngombe ne wa nyama wa mpunda ne wa mikoko kabidi,

²⁹ nutshiangate kudi tshituha tshiabo, nutshine kudi Eleazâ muakuidi bu mulambu udibo banyukula kudi Yehowa.

³⁰ Mu tshituha tshia Bena Isalele nenuangate umue kudi makumi atanu, wa bantu ne wa ngombe ne wa nyama wa mpunda ne wa mikoko, nubifile kudi Bena Lewi badi balama nsubu wa Yehowa.

³¹ Mose ne Eleazâ bakenza muakambila Yehowa Mose.

³² Bintu bionso biakangatabo kudi bena nvita biakadi mikoko binunu nkama isambombo ne makumi muanda mutekete ne bitanu,

³³ ne ngombe binunu makumi muanda mutekete ne bibidi,

³⁴ ne nyama ya mpunda binunu makumi asambombo ne tshinunu tshimue,

³⁵ ne bakashi binunu makumi asatu ne bibidi badi kabayi banze kumanyibua kudi balume.

³⁶ Tshituha tshiakaheta bantu bakaya ku nvita tshiakadi mikoko binunu nkama isatu ne makumi asatu ne muanda mutekete ne nkama itanu,

³⁷ ne mulambu wa Yehowa wakadi mikoko nkama isambombo ne makumi muanda mutekete ne itanu.

³⁸ Ngombe yakadi binunu makumi asatu ne bisambombo, ne mulambu wa Yehowa wakadi makumi muanda mutekete ne ibidi.

³⁹ Nyama ya mpunda yakadi binunu makumi asatu ne nkama itanu, ne mulambu wa Yehowa wakadi makumi asambombo ne umue.

⁴⁰ Bantu bakadi binunu dikumi ne bisambombo, ne mulambu wa Yehowa wakadi bantu makumi asatu ne babidi.

⁴¹ Mose wakatua mulambu wa Yehowa kudi Eleazâ bu mulambu udibo banyukula, bu muakambila Yehowa Mose.

⁴² Tshituha tshia Bena Isalele tshiakabatahuluila Mose, tshiakashilangana ne tshia bena nvita,

⁴³ (tshituha tshiabo tshiakadi mikoko binu nu nkama isatu ne makumi asatu ne muanda mutekete ne nkama itanu,

⁴⁴ ne ngombe binunu makumi asatu ne bisambombo,

⁴⁵ ne nyama ya mpunda binunu makumi asatu ne nkama itanu,

⁴⁶ ne bantu binunu dikumi ne bisambombo.)

⁴⁷ Mose wakangata umue wa makumi atanu wa bintu bia Bena Isalele, ne wa bantu ne wa bimuna wakabifila kudi Bena Lewi bakadi balama nsubu wa Yehowa, muakambila Yehowa Mose.

⁴⁸ Bakadi ku mutu kua binunu bia bena nvita ne tuhita tua binunu ne binunu ne tuhita tua nkama ne nkama, bakalua kudi Mose,

⁴⁹ bakambila Mose ne, Bantu bebe bakabala bungi bua bena nvita badi ku nyima kuetu, nansha umue wetu udi mushale.

⁵⁰ Tuetu tuakulua ne mulambu wa Yehowa, bintu biakangatabo kudi mundi ne mundi, bintu bia or ne nkanu ya ku mikolo ne nkanu ya ku maboko ne tukanu tua ku munu, lukanu tua ku matshu ne tukanu tua ku nshingu, bualu bua kubuikidila nʼabi bubi buetu ku mesu kua Yehowa.

⁵¹ Mose ne Eleazâ muakuidi bakangata bintu bia tshiamu tshia or tshiakatulabo ku bianza biabo.

⁵² Or yonso ya tuhita tua binunu ne binunu yakanyukulabo kudi Yehowa yakadi nshekele binunu dikumi ne bisambombo ne nkama muanda mutekete ne makumi atanu.

⁵³ (Bualu bua bena nvita bonso bakadiangatshila bintu mundi ne mundi.)

⁵⁴ Mose ne Eleazâ muakuidi bakangata or ya tuhita tua binunu ne binunu ne tuhita tua nkama ne nkama, bakalua nʼai mu ntenta wa kusambakena bu tshivulukidi tshia Bena Isalele ku mesu kua Yehowa.