Dibadika 27 - Mukanda wa Nzambi Dihungila Dikulukulu ne Dihungila Dihia-dihia 2003

Dilomba dia Bana Bakashi ba Selofehada

¹ Bana bakashi ba Selofehada, muana mulume wa Hefê, muana mulume wa Gilada, muana mulume wa Mala, muana mulume wa Manashe, wa meku a Manashe, muana mulume wa Yosefe, au mmena a bana bakashi: Mahala ne Noa ne Hogela ne Mileka ne Tîsa.

² Bobo bakimana ku mpala kua Mose ne kua Eleazâ, muakuidi ne ku mpala kua bakelenge ba mu tshisumbu, ku mbelu kua ntenta wa kusambakena, bakamba ne,

³ Tatu wetu wakafua mu tshihela, yeye kakadi munkatshi mua tshisumbu tshia Kola tshiakadisangisha kudi Yehowa, kadi yeye wakafua anu bualu bua mibi yandi, yeye kakadi ne bana ba balume nansha.

⁴ Bualu kai nebajimishe dina dia tatu wetu munkatshi mua diku diandi bualu bua yeye kakadi ne muana wa balume? Utuhe bietu buhianyi munkatshi mua bana babo ne tatu wetu.

⁵ Mose wakaya ne bualu ebu ku mpala kua Yehowa.

⁶ Yehowa wakambila Mose ne,

⁷ Bana ba bakashi ba Selofehada badi bamba dî dilelela: Ubahe buhianyi munkatshi mua bana babo ne tatuʼabo, buhianyi bua tatuʼabo nebulue kudibo.

⁸ Wewe newambile Bena Isalele ne, Biafua muntu udi kayi ne muana wa balume, nunku yeye neaheshe muanʼandi wa bakashi buhianyi buandi.

⁹ Bikaleye kayi ne muana wa bakashi, yeye neaheshe bana babo buhianyi buandi.

¹⁰ Bikaleye kayi ne bana babo, yeye neaheshe bana babo ne tatuʼandi buhianyi buandi.

¹¹ Bikala tatuʼandi kayi ne bana babo, yeye neaheshe muanʼabo udi umulonda mu diku diandi buhianyi buandi, yeye mene neabuhete, eu udi mukenji wa tshiendelele kudi Bena Isalele, bu muakambila Yehowa Mose.

Mose Udi Usungula Yoshua bu Muenampala Wandi

¹² Yehowa wakambila Mose ne, Banda biebe ku mukuna wa Abalima, utangile buloba bundi mpa Bena Isalele.

¹³ Hawabutangila, wewe neusangakene ne bankambua bebe bu muakenza Alona mukuluʼebe,

¹⁴ bualu bua nuenu nuakahidia dî dianyi mu tshihela tshia Sina, hakatontolola bantu bualu bua mai, kanuakanjidila ku mesu kuabo. (Au mmai a Meliba mu Kadesha mu tshihela tshia Sina.)

¹⁵ Mose wakambila Yehowa ne,

¹⁶ Yehowa, Nzambi wa mioyo ya bantu asunguile bantu bandi muntu

¹⁷ udi mumanye mua kuya ku mpala kuabo, udi mumanye mua kulua kudibo, udi mumanye mua kubalombola, udi mumanye mua kulua nʼabo mu buloba, bantu ba Yehowa kabikadi bu mikoko idi kayiyi ne mulami.

¹⁸ Yehowa wakambila Mose ne, Wangate Yoshua, muana mulume wa Nuna, udi ne Nyuma munda muandi, utentekashe tshianza tshiebe ha mutu nʼandi,

¹⁹ umushikike ku mpala kua Eleazâ muakuidi ne ku mpala kua bantu bonso, umuambile dî ku mesu kuabo.

²⁰ Wewe neumuvuishe butumbi buebe, bua Bena Isalele bonso batumikile dî diandi.

²¹ Yeye neimane ku mpala kua Eleazâ muakuidi, yeye neamukonkele kulumbulula kua Ulima ku mpala kua Yehowa, ku dî diandi bobo nebaluhuke, ne ku dî diandi bobo nebabuelemu, ne yeye ne Bena Isalele bonso badi nʼandi.

²² Mose wakenza bu muakamuambila Yehowa, wakangata Yoshua, wakamushikika ku mpala kua Eleazâ ne kua tshisumbu tshionso,

²³ wakatentekasha bianza biandi ha mutu nʼandi, wakamuambila dî, muakambila Yehowa Mose.