Dibadika 21 - Mukanda wa Nzambi Dihungila Dikulukulu ne Dihungila Dihia-dihia 2003

Bena Kanâna Badi Baluangana ne Bena Isalele

¹ Atada, mukelenge wa Bena Kanâna, wakadi ushikama ku luseke lua ku Sude, wakunvua lumu ne, Bena Isalele badi baya mu nshila wa ku Atalima, yeye wakaluangana ne Bena Isalele, wakaya ne bakuabo mu lukanu.

² Bena Isalele bakaditshiha kudi Yehowa ne, Biwafila bantu aba mu bianza bietu, netushihe misoko yabo yonso.

³ Yehowa wakulua dî dia Bena Isalele, wakafua Bena Kanâna mu bianza biabo, bakabashiha ne misoko yabo yonso, ne dina dia muaba au diakadi Hôma.

Nyoka Idi Isuma bu Kahia

⁴ Bakumuka ku mukuna wa Hô, bakaya mu nshila wa ku Dishiba Dikunze bualu bua kunyunguluka ku nyima kua buloba bua Edome, mitshima ya bantu yakahanga bualu bua nshila.

⁵ Bantu bakajiana Nzambi ne Mose kabidi ne, Nuakatuluhuila mu Ejipitu bua kutufuisha mu tshihela nunku bua tshinyi? Kakuena bia kudia, kakuena mai, ne bidia ebi bia tshianana biakututonda.

⁶ Yehowa wakatuma nyoka idi isuma bu kahia kosha munka tshi mua bantu, yakasuma bantu, bantu ba bungi ba Isalele bakafua.

⁷ Bantu bakalua kudi Mose, bakamba ne, Tuakuenza bibi bualu bua tuetu tuakujiana Yehowa ne wewe kabidi, ulombe Yehowa atumushile nyoka munkatshi muetu Mose wakalombela bantu Nzambi.

⁸ Yehowa wakambila Mose ne, Enza biebe nyoka ne mubidi bu kahia, umuteke kulu kua mutshi, nunku hamutangila mundi musumibue, neikale ne muoyo.

⁹ Mose wakenza nyoka ne tshiamu tshia mitaku, wakamuteka kulu kua mutshi, hashishe bakatangila mundi musumibue nyoka wa tshiamu tshia mitaku, wakadi ne muoyo kabidi.

Bena Isalele Badi Banyunguluka Buloba bua Moaba

¹⁰ Bena Isalele bakaya, bakashikama mu Oboto.

¹¹ Bakumuka mu Oboto, bakashikama mu Iye-habalima, mu tshihela tshidi ku mpala kua Moaba, kudi diba dihatuka.

¹² Bakumukamu, bakashikama mu tshibanda tshia Zalede.

¹³ Bakumukamu, bakashikama dishiya dia mai a Ânona, mu tshihela tshidi ku butshika bua buloba bua Bena Amole, mai a Ânona adi ku butshika bua Moaba, hankatshi ha Moaba ne Bena Amole.

¹⁴ Nunku bakafunda mu mukanda dina diau Nvita ya Yehowa ne, Waheba wa mu Sufa ne tshibanda tshia Ânona,

¹⁵ buloba budi busendama mu tshibanda ku musoko wa Ala hehi ne butshika bua Moaba.

¹⁶ Bakumukamu, bakaya ku Bê, ku mpokolo wa mai, wakambila Yehowa Mose ne, Usangisheku bantu, nembanuishe mai.

¹⁷ Hashishe Bena Isalele bakimba musambu eu ne, Mai abande, nuenu nuimbile musambu;

¹⁸ mpokolo wa mai wakumbulabo kudi bakelenge, ne kudi miloho ya bantu ne dikombo dia bukelenge ne milangala yabo. Bakumuka mu tshihela, bakaya ku Matana:

¹⁹ bakumuka ku Matana, bakaya ku Nahaliele, bakumuka ku Nahaliele, bakaya ku Bamota,

²⁰ bakumuka ku Bamota, bakaya mu tshibanda tshia mu buloba bua Moaba tô ne ku mutu kua mukuna wa Pisega, kuakatangilabo tshihela.

Bena Isalele Badi Bahita Sifiona Bukole

²¹ Bena Isalele bakatuma miloho kudi Sihona, mukelenge wa Bena Amole, ne,

²² Witabushe bua tuetu tuhitshile ku buloba buebe, katuena tusesuka mu madimi anyi mu madimi a tumuma, katuena tunua mai a mena a mai anuakumbula, netulonde anu mu musesu wa mukelenge tô ne hatuahita ku butshika bua buloba buebe.

²³ Sihona wakahidia bua Bena Isalele bahite ku buloba buandi, kadi Sihona wakasangisha bantu bandi bonso, wakaya kudi Bena Isalele mu tshihela tô ne ku Yahasa; wakatuangana nvita ne Bena Isalele.

²⁴ Bena Isalele bakamushiha ne muele wa nvita, bakanyenga buloba buandi ku mai a Ânona tô ne ku mai a Yaboka ku butshika bua buloba bua Bena Amona, bualu bua butshika bua buloba bua Bena Amona buakadi bukole.

²⁵ Bena Isalele bakanyenga bimenga ebi bionso Bena Isalele bakashikama mu bimenga bionso bia Bena Amole, mu Heshebona ne mu misoko ei yonso.

²⁶ Heshebona wakadi tshimenga tshia Sihona, mukelenge wa Bena Amole, wakadi uluangana ne mukelenge mukuabo wa Moaba, wakanyenga buloba buandi buonso mu tshianza tshiandi to ne ku mai a Ânona.

²⁷ Nunku badi belangana nsumuinu ne, Luai bienu ku Heshebona, musoko wa Sihona wikale muibakibue,

²⁸ Bualu bua kahia kakumuka ku Heshebona, ludimi lua kahia ku musoko wa Sihona, luakosha Ala wa Moaba ne bakelenge ba ku mikuna ya mai a Ânona.

²⁹ Mulau ukukuate, Moaba! Nuenu, Bena Kamoshe, nudi bajimine! Bakatua bana babo balume bu banyemi, ne bana babo bakashi bu bena lukanu kudi Sihona, mukelenge wa Bena Amole.

³⁰ Tuakabasa mikete, musoko wa Heshebona udi muhaula tô ne ku Dibona, tuakunyanga buloba tô ne ku Nofa ne ku Medeba.

Bena Isalele Badi Bahita Oga wa ku Bashana Bukole

³¹ Nunku Bena Isalele bakashikama mu buloba bua Bena Amole.

³² Mose wakatuma bantu bua kutentekelabo buloba bua Yazê, ne bakanyenga misoko ei kabidi, bakihata Bena Amole bakadimu.

³³ Bakasesuka, bakaya mu nshila wa ku Bashana, ne Oga, mukelenge wa Bashana, wakaya ne bantu bandi bonso bua kusangana nʼabo nvita ku Edelei.

³⁴ Yehowa wakambila Mose ne, Kumutshinyi nansha, bualu bua nakamufila mu tshianza tshiebe, ne bantu bandi bonso ne buloba buandi, wewe neumuenzele bu muwakuenzela Sifiona, mukelenge wa Bena Amole, wakadi ushikama mu Heshebona.

³⁵ Nunku bakamushiha ne bana bandi balume ne bantu bandi bonso, nansha mundi umue wakashala, bakanyema buloba buandi.