Dibadika 20 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Ubaha Mai ku Dibue

¹ Bena Isalele bonso bakalua mu tshihela tshia Sina mu ngondo wa kumudilu, bakashikama mu Kadesha, Mîyama wakafua, bakamujikamu.

² Bantu kabakadi ne mai a kunua, bakadisangisha kudi Mose ne kudi Alona.

³ Bantu bakatandangana ne Mose, bakamba ne, Biakadi bimpe bua tuetu kufua bu muakafua bana betu ku mesu kua Yehowa!

⁴ Nuakulua ne bantu ba Yehowa mu tshihela etshi bualu bua kubishiha ne nyama yetu munyi?

⁵ Bualu kai nuakatuhatula mu Ejipitu bua kulua nʼetu mu muaba eu mubi? Kimoko kakuena bintu bia kukuna nansha mamuma a nfigi nansha tumuma tukese nansha mamuma a grenade, kakuena mai a kunua.

⁶ Mose ne Alona bakumuka ku mesu kua bantu, bakaya ku mbelu kua ntenta wa kusambakena, bakatua mpala yabo hanshi. Butumbi bua Yehowa buakamueneka kudibo.

⁷ Yehowa wakambila Mose ne,

⁸ Angata mulangala, usangishe bantu bonso ne wewe ne Alona mukuluʼebe, wewe wambile dibue didi ku mesu kuabo, dihatule mai, wewe neubahatuile mai ku dibue, wewe neubanuishe mai ne bimuna biabo.

⁹ Mose wakangata mulangala ku mpala kua Yehowa bu muakamuambileye.

¹⁰ Mose ne Alona bakasangisha bantu bonso ku mpala kua dibue, ne yeye wakabambila ne, Unvuai, bena kutomboka, netunuhatuile mai ku dibue edi, anyi?

¹¹ Mose wakabandisha tshianza tshiandi, wakakuma dibue ne mulangala wandi misangu ibidi, mai a bungi akabuluka, ne bantu bonso bakanua, ne bimuna biabo.

¹² Yehowa wakambila Mose ne Alona ne, Bualu bua nuenu kanuakungitabusha bua kunjidila ku mesu kua Bena Isalele, nunku kabuena nulua ne bantu aba mu buloba bunakubaha.

¹³ Au adi mai a Meliba, bualu bua Bena Isalele bakatanda ne Yehowa, ne yeye wakajidibua ku mesu kuabo.

Edome Udi Uhidia bua Bena Isalele Bahite

¹⁴ Mose wakatuma miloho ku Kadesha kudi mukelenge wa Edome ne, Muanʼenu Isalele udi wamba ne, Wewe udi mumanye makenga onso akutukuata:

¹⁵ bankambua betu bakaya mu Ejipitu, ne tuetu tuakashikama mu Ejipitu musangu mule, Bena Ejipitu bakadienzela bibi ne bankambua betu kabidi:

¹⁶ ne hatuakadila kudi Yehowa, yeye wakumpa dî dietu, wakatuma muanjelo wakatuhatula mu Ejipitu, ne tangila, tudi mu Kadesha, musoko udi ku butshika bua buloba buenu mene.

¹⁷ Ndi nkusengelela ne, Nuitabushe bua tuetu tuhite ku buloba buenu, katuena tuhita mu madimi anyi mu madimi a tumuma, katuena tunua mai a mena a mai anuakumbula, netuye anu mu musesu wa mukelenge, katuena tusesuka ku tshianza tshia balume anyi ku tshianza tshia bakashi tô ne hakahita butshika buenu.

¹⁸ Mukelenge wa Edome wakamuambila ne, Nansha, kanuena nuhita, nendue kusangana nʼebe ne muele wa nvita.

¹⁹ Bena Isalele bakamuambila ne, Netuye anu mu musesu munene, bituanua mai ebe nansha tuetu nansha bimuna bietu, netukufute, anji kuitabusha bua tuetu tuhite anu ha makasa etu, katuena bienza bualu bukuabo.

²⁰ Yeye wakamba ne, Kanuena mua kuhita. Mukelenge wa Edome wakalua ne bantu ba bungi, ne tshianza tshikole.

²¹ Nunku mukelenge wa Edome wakahidia bua Bena Isalele bahite butshika buandi, nunku Bena Isalele bakasesuka kuakadiye.

Lufu lua Alona ku Mukuna wa Hô

²² Bakabisha luendu luabo mu Kadesha, ne Bena Isalele bonso bakalua ku mukuna wa Hô.

²³ Yehowa wakambila Mose ne Alona mu mukuna wa Hô, hehi ne butshika bua buloba bua Edome ne,

²⁴ Alona neadisangishe kudi bankambua bandi, yeye kena ubuela mu buloba bunakalaya Bena Isalele, bualu bua nuenu nuakuhidia dî dianyi ku mai a Meliba.

²⁵ Wangate Alona ne Eleaza, muanʼandi mulume, ulue nʼabo ku mukuna wa Hô,

²⁶ uvule Alona bilulu biandi, ubiluatshishe Eleazâ, muanʼandi mulume, Alona neasangakene ne bankambua bandi, neafue biandi.

²⁷ Mose wakenza muakamba Yehowa, bakaya ku mutu kua mukuna wa Hô ku mesu kua bantu bonso.

²⁸ Mose wakavula Alona bilulu biandi, wakabiluatshisha Eleazâ, muanʼandi mulume, ne Alona wakafua biandi ha mutu ha mukuna, ne Mose ne Eleazâ bakahueka mu tshibanda.

²⁹ Hakatangila bantu bonso ne Alona wakafua, Bena Isalele bonso bakamujinga tô matuku makumi asatu.