Dibadika 16 - Mukanda wa Nzambi Dihungila Dikulukulu ne Dihungila Dihia-dihia 2003

Kutomboka kua Kola

¹ Kola, muana mulume wa Yiseha, muana mulume wa Kohata, muana mulume wa Lewi, ne Datana ne Abilama, bana balume ba Eliaba, ne Ono, muana mulume wa Pelete, bana balume ba Lubena,

² bakabika ne Bena Isalele bakuabo ne bakelenge ba mu tshisumbu bu nkama ibidi ne makumi atanu, bantu bakadi ne lumu lunene,

³ bakadisangisha bua kufuilangana ne Mose ne Alona, bakabambila ne, Nudi nutamba kudienzela malu, bualu bua bantu bonso mbantu ba tshijila ne Yehowa udi munkatshi muabo nuenu nudi nudibandisha ku mutu kua bantu ba Yehowa munyi?

⁴ Hakunvua Mose dî edi, yeye wa kakuma mpala hanshi,

⁵ wakambila Kola ne bakadiye habo ne, Dinda Yehowa neadileshe bantu bandi, ne nganyi udi wa tshijila, neamubikile ku mpala kuandi, neabifile wasunguleye ku mpala kuandi.

⁶ Nuenze bienu nunku Kola ne bantu hadiye habo bangate malonga a kahia,

⁷ batekemu kahia, batekehu musenga wa manananshi ku mpala kua Yehowa makelela, ne muntu udi musungudibue kudi Yehowa neikale muntu wa tshijila, nuenu bana balume ba Lewi nudi nutamba kudienzela malu.

⁸ Mose wakambila Kola ne, Unvuai, bana balume ba Lewi:

⁹ nudi nuelangana meji ne bualu ebu budi bukese bua Nzambi wa Isalele wakamujidila munkatshi mua Bena Isalele, bua nuenu nulue ha buihi nʼandi kumukuatshia mudimu mu nsubu wa Yehowa, ne bua kukuatshila tshisumbu tshonso mudimu kabidi,

¹⁰ yeye wakanuhatula ne bana benu bonso ba Lewi ha buihi nʼandi, nuenu nudi nudikebela mudimu wa buakuidi kabidi, anyi?

¹¹ Wewe ne bantu baudi nʼabo nuakudisangisha bua kuelangana ne Yehowa! Alona udi nganyi bua nuenu nudi numutontolola?

¹² Mose wakabikila Datana ne Abilama, bana balume ba Eliaba, ne bobo bakamba ne, Katuena tulua,

¹³ bualu budi bukese bua wewe wakumuka nʼetu mu buloba budi bûle tente ne mabele ne buitshi bua kubishiha mu tshihela, udi musue kudibandisha bu mukelenge wetu kabidi, anyi?

¹⁴ Bualu bukuabo, wewe kuena muanze kulua nʼetu mu buloba budi bûle tente ne mabele ne buitshi, kuena mutuhe buhianyi bua madimi ne madimi a tumuma, udi musue kuvuisha bantu aba bafofo, anyi? Katuena tulua.

¹⁵ Mose wakadi ne tshiji tshikole ne yeye wakambila Yehowa ne, Kuitabusha milambu yabo nansha, meme tshiakunyenga umue wabo nyama wandi wa mpunda, tshiakuenzela umue wabo bibi.

¹⁶ Mose wakambila Kola ne, Wewe ne bantu bonso baudi habo nuikale ku mpala kua Yehowa ne kua Alona makelela:

¹⁷ mundi yonso angate dilonga diandi dia kahia, atekehu musenga wa manananshi, bantu bonso balue ne malonga nkama ibidi ne makumi atanu ku mpala kua Yehowa, ne wewe ne Alona, mundi ne dilonga diandi mundi ne dilonga diandi.

¹⁸ Muntu yonso wakangata dilonga diandi, wakatekamu kahia, wakatekahu musenga wa manananshi, bakimana ne Mose ne Alona ku mbelu kua nsubu wa tshitendelelu.

¹⁹ Kola wakabikila tshisumbu tshonso tshia batomboki ku mbelu kua nsubu wa tshitendelelu, ne butumbi bua Yehowa buakamueneka kudi tshisumbu tshonso.

²⁰ Yehowa wakambila Mose ne Alona ne,

²¹ Umukai bienu munkatshi mua tshisumbu etshi, nembashihe mu tshituha tshikese.

²² Bobo bakadikuma hanshi, bakamba ne, Nzambi, Nzambi wa mioyo ya bantu, wewe newikale ne tshisumbu tshonso tshiji bua bubi bua mundi umue, anyi?

²³ Yehowa wakambila Mose ne,

²⁴ Wambile tshisumbu tshonso ne, Umukai ku nsubu wa tshitendelelu wa Kola ne Datana ne Abilama.

²⁵ Mose wakabika, wakaya kudi Datana ne Abilama, ne bakulu ba mu Isalele bakamulonda ku nyima.

²⁶ Yeye wakambila tshisumbu tshia bantu ne, Umukai, ndi nnusengelela, ku ntenta ya bantu aba babi, kanulengi tshintu tshiabo tshianza, kabanushihi bua mibi yabo.

²⁷ Nunku bakumuka ku nsubu wa tshitendelelu wa Kola ne Datana ne Abalama ku nseke yonso: ne Datana ne Abilama bakaluhuka, bakimana ku mbelu kua ntenta yabo ne bakashi babo ne bana babo balume ne bana babo bakese.

²⁸ Mose wakamba ne, Nenumanye ne Yehowa wakatuma bua kuenza malu au onso, tshiakadienzela bualu bua mutshima wanyi.

²⁹ Biafila balume aba bu mudi bantu bonso bafue, anyi biabakuata bualu bu mudibu bukuata bantu bonso, nunku Yehowa kena muntume.

³⁰ Kadi bikala Yehowa wenza bualu buhia-buhia, ne buloba bubulula mukana muabu bubamina ne bantu bonso hadibo nʼabo, ne bobo baya ku Muaba wa Bafue hatshidibo ne muoyo, nunku nenumanye ne bantu aba bakalengulula Yehowa.

³¹ Hakashikisheye kubambila mei a onso, buloba buakahandika muinshi mua makasa abo,

³² buloba buakubulula mukana muabu, buakabamina ne bantu bonso ba mu nsubu yabo ne bantu bonso bakalamata Kola ne bintu biabo bionso.

³³ Nunku bobo ne bantu bonso bakalamata kudibo bakaya mu Muaba wa Bafue hakadibo ne muoyo, ne buloba buakabuikila mukana muabu ku mutu kuabo, ne bobo biakajimina munkatshi mua tshisumbu.

³⁴ Bena Isalele bonso bakadi ha buihi habo bakanyema hakunvuabo muadi wabo, bobo bakamba ne, Buloba kabutuminyi.

³⁵ Kahia bakahatuka kudi Yehowa, kakosha balume nkama ibidi ne makumi atanu bakadi bafila musenga wa manananshi.

³⁶ Yehowa wakambila Mose ne,

³⁷ Wambile Eleazâ, muana mulume wa Alona muakuidi, bua yeye angate malonga munkatshi mua kahia, ne wewe utangalashe kahia kuaka ebi mbintu bia tshijila,

³⁸ malonga a bantu aba babi bakadijinushila mioyo yabo, wenze nʼau tshibuikilu tshia tshioshelu bobo bakâfila ku mpala kua Yehowa, nunku adi bintu bia tshijila, neikale bu tshivulukidi kudi Bena Isalele.

³⁹ Eleazâ muakuidi wakangata malonga a tshiamu tshia mitaku akatuabo, bakâtula bu tshibuikilu tshia tshioshelu,

⁴⁰ bua kuikalau tshivulukidi kudi Bena Isalele ne kubamanyisha ne, Muntu udi kayi muana wa Alona, kalu ha buihi bua kuosheye musenga wa manananshi ku mpala kua Yehowa, kenji bu Kola ne bantu bandi, bu muakambila Yehowa Mose.

⁴¹ Kadi hakatshiabu Bena Isalele bonso bakatontolola Mose ne Alona ne, Nuenu nuakushiha bantu ba Yehowa.

⁴² Hashishe bakadisangisha tshisumbu tshia bantu bua kuelangana ne Mose ne Alona, baka tangila ku ntenta wa kusambakena, ne monai, difutu diakamubuikila ne butumbi bua Yehowa buakamueneka,

⁴³ Mose ne Alona bakatua ku mbelu kua ntenta wa kusambakena.

⁴⁴ Yehowa wakambila Mose ne,

⁴⁵ Umuka biebe munkatshi mua tshisumbu etshi tshia bantu, nenubashihe mu tshituha tshihi. Bobo bakahaula mpala yabo hanshi.

⁴⁶ Mose wakambila Alona ne, Angata dilonga dia kahia, tekahu kahia ka ku tshioshelu, tekahu musenga wa manananshi, uye biebe lubilu kudi tshisumbu tshia bantu, bua kubabuikidila bubi buabo, bualu bua tshiji tshiakumana kuhatuka kudi Yehowa, disama dikole diakumana kubanga.

⁴⁷ Alona wakangata dilonga diandi bu muakamba Mose, wakaya lubilu munkatshi mua tshisumbu tshia bantu, ne monai, disama dikole diakamana kubanga munkatshi mua bantu, yeye wakatekahu musenga wa manananshi bua kubuikidila bantu bubi buabo.

⁴⁸ Wakimana biandi hankatshi ha bantu bafue ne bantu bakatshidi ne muoyo, ne disama diakashika.

⁴⁹ Bungi bua bantu bakafua ku disama edi bakadi binunu dikumi ne binai ne nkama muanda mutekete, ha mutu ha bantu bakafua bua bualu bua Kola.

⁵⁰ Alona wakahingana kudi Mose ku mbelu kua ntenta wa kusambakena, disama diakashika.