Dibadika 12 - Mukanda wa Nzambi Dihungila Dikulukulu ne Dihungila Dihia-dihia 2003

Mîyama ne Alona Badi Batontolola Mose

¹ Mîyama ne Alona bakasonguela Mose bua mukashi wa Bena Kushi wakabakeye, bualu bua yeye wakadi mubake mukashi wa Bena Kushi.

² Bakamba ne, Bulelela, Yehowa wakasomba anu ne Mose, anyi? Yeye kena usomba nʼetu kabidi, anyi? Yehowa wakunvua.

³ Muntu eu Mose wakadi ne kalolo be, wakatamba bantu bonso ba ha buloba ne kalolo.

⁴ Tshituha tshibi Yehowa wakambila Mose ne Alona ne Miyama ne, Busatu buenu nulue mu ntenta wa kusambakena Busatu buabo bakaluamu.

⁵ Yehowa wakahueka mu difutu, wakimana ku mbelu kua Ntenta, wakabikila Alona ne Mîyama, bobo bakaluhuka.

⁶ Yeye wakamba ne, Unvuai mei anyi, bikala muprofete munkatshi muenu, meme Yehowa nendimanyishe kudiye mu tshikena kumona, meme nensombe nʼandi mu tshilota.

⁷ Muntu wanyi Mose kena nunku, yeye udi wenza mudimu wandi bimpe mu nsubu wanyi wonso,

⁸ meme nensombe nʼandi mukana ha mukana, ne mei adiye mumanye, tshiena nsomba nʼandi ne nsumuinu, neatangile mundidimbi wa Yehowa nunku kanuakutshina bua kusonguela mundi wanyi Mose munyi?

⁹ Tshiji tshia Yehowa tshiakabakuata, yeye wakumuka.

¹⁰ Difutu diakumuka ku mutu kua Ntenta, ne tangila, Miyama wakadi mûle tente ne disama dia nsudi mitoke to Alona wakatangila ne Mîyama wakadi mûle tente ne nsudi.

¹¹ Alona wakambila Mose ne, Mukelenge wanyi, kuteki bualu bubi kutudi, bualu bua tuetu tuakuenza buhote, tuakuenza bualu bubi.

¹² Kuitabusha bua yeye kuikala bu muntu mufue udi ne tshituha tshia mubidi mubole hamulelabo.

¹³ Mose wakadila kudi Yehowa ne, Ndi nkusengelela ne, Nzambi, umuondahe.

¹⁴ Yehowa wakambila Mose ne, Bikala tatu wandi mumutuile lute ku mesu, yeye wakadi kushala ne bundu matuku muanda mutekete, nansha? Bamuteke ku butshika bua tshitudilu matuku muanda mutekete, ne ku nyima nebamuhingishe kabidi.

¹⁵ Mîyama wakashala ku butshika bua tshitudilu matuku muanda mutekete, bantu kabakaya ku luendu to ne hakaluabo ne Mîyama kabidi.

¹⁶ Hashishe bantu bakumuka ku Haselota, bakashikama mu tshihela tshia Palana.