Danyele 8 - Mukanda wa Nzambi Dihungila Dikulukulu ne Dihungila Dihia-dihia 2003

Tshikena Kumona tshia Tshimpanga ne Mpumbu

¹ Mu tshidimu tshisatu tshia bukokeshi bua mukelenge Beleshasâ tshikena kumona tshiakamueneka kundi meme Danyele, bu muakamuenekatshi kundi ku tshibangidilu.

² Nakamona malu â mu tshikena kumona; hanakâmona, nakamanya ne, Ndi mu Shushana, luhangu lunene lua mukelenge lua mu province wa Elama; mu tshikena kumona atshi nakadimona hehi ne musulu wa Ulai.

³ Nakabanduluka, nakatangila, ekumona, tshimpanga tshiakadi ne nsengu ibidi tshiakimana ku muelelu wa musulu. Nsengu ei yakadi mile, kadi lumue luakahita lukuabo bule, ne lusengu alu luhite bule luakamena ku nyima kua lukuabo.

⁴ Nakatangila tshimpanga tshituta nsengu ku luseke lua wesete, lua nôde ne lua sude; kakuakadi nyama mikuabo yakamanya kua kuimana ku mpala kuatshi, kakuakadi munga wakamanya mua kuhandishibua ku bukole buatshi; kadi tshiakenza bu muakasuatshi kuenza, tshiakadibandisha kabidi.

⁵ Hanakadi ngela meji a muanda eu, ekumona, mpumbu wa mbushi wakadi ufuma ku luseke lua wesete uhita ha mutu ha buloba buonso, kayi ubulenga. Mbushi eu wakadi ne lusengu lumueneka hatoke tô hankatshi ha mesu andi.

⁶ Hakafikeye kudi tshimpanga tshiakadi ne nsengu ibidi, tshinakamona tshimana ku muelelu wa musulu, wakaya lubilu bua kutshibunda ne tshiji tshikole.

⁷ Nakamumona ufika hehi ne tshimpanga, wakatshifuila tshiji tshikole, wakabunda tshimpanga, wakatshibula nsengu yatshi ibidi. Tshimpanga katshiakadi ne bukole kabidi bua kuimana ku mpala kuandi, kadi mpumbu wakatshituta hanshi, wakatshidiata. Kakuakadi munga wakamanya mua kuhandisha tshimpanga ku bukole bua mpumbu.

⁸ Mpumbu wa mbushi Wakenza malu mahite bunene; kadi hakahiteye bukole, lusengu alu lunene luakatshibuka, mikuabo mai yakamena mu muaba walu, mitangilangane ne mpehele inai ya mu diulu.

⁹ Lusengu lukuabo, lusengu lukese mene, luakahatuka ku lunga lusengu lua mu nsengu ai inai, luakadiunda tô ne hakahitalu bunene ku luseke lua sude, lua esete ne ku luseke lua buloba bulengele.

¹⁰ Luakalua lunene bu bintu bia mu diulu; luakela misumba mikuabo ya mitoto hanshi, luakayidiata muinshi mualu.

¹¹ E, luakadivuisha bunene bu Mukokeshi wa misumba ya ba mu diulu, luakamunyenga milambu yandi ya kuosha ya buatshia-buatshia, luakanyanga muaba wa tshitendelelu tshiandi.

¹² Bakafila musumba wa mu diulu ne mulambu wa kuosha wa buatshia-buatshia kudilu, bualu bua ditombokela Nzambi. Luakela malu a bushuwa hanshi, luakenza bu muakadilu lusue kuenza, luakatuta dikasa dimpe.

¹³ Hashishe, nakunvua mukuabo wa tshijila wakula; muibidi wa tshijila wakakonka wakadi wakula diambedi ne, Kumusha kua mulambu wa kuosha wa buatshia-buatshia, bualu bubi budi buvuisha kabutu, ne kufila kua tshitendelelu ne musumba wa mu diulu bua kudiatshibuabi muinshi mua makasa, malu â akamueneka mu tshikena kumona neikaleku musangu bule munyi?

¹⁴ Yeye wakamuitaba ne, Tô ne hahita matuku, dinda ne dilolo, binunu bibidi ne nkama isatu; hashishe nebalengeshe tshitendelelu.

¹⁵ Hashishe, meme Danyele, hanakatangila tshikena kumona etshi, nakadi nkeba kutshijingulula, ekumona, tshinfuanyi bu tshia muntu tshimana ku mpala kuanyi!

¹⁶ Nakunvua dî dia muntu difuma munkatshi mua musulu wa Ulai diamba ne, Gabaliele, jinguluila muntu eu tshikena kumona.

¹⁷ Yeye wakasemena ha buihi ne muaba unakimana. Hakafikeyeku, nakakuatshika buowa bukole, nakatua mpala wanyi hanshi. Kadi yeye wakangambila ne, Teleja, wewe muana wa muntu; tshikena kumona etshi tshidi tshikulesha malu a mu tshikondo tshia kunshikidilu.

¹⁸ Hakadiye wakula nʼanyi, nakashala mufue tshihuka, mutue mpala wanyi hanshi, kadi yeye wakandela tshianza, wakangimanyika kulu.

¹⁹ Wakamba biandi ne, Mona! Nenkumanyishe malu adi alua mu tshikondo tshia ndekelu wa tshiji tshikole tshia Nzambi, bualu bua tshikena kumona etshi tshidi tshilesha malu a mu tshikondo tshisungula tshia kunshikidilu.

²⁰ Bua tshimpanga tshiwakamona tshiakadi ne nsengu ibidi, nsengu ai idi bukelenge ba Bena Madai ne Bena Pelesa.

²¹ Mpumbu wa mbushi udi mukelenge wa Bena Gelika; lusengu lua hankatshi ha mesu andi ludi mukelenge wa kumudilu.

²² Bu muakatshibulabo lusengu alu ne bu muakamueneka nsengu mikuabo mai mu muaba walu, nunku kabidi, makelenge anai neabike mahatuke mu tshisamba tshiandi, kedi kaena ne bukole bu buandi.

²³ Mu tshikondo tshia kunshikidilu tshia makelenge â, havulangana malu mabi, mukelenge mukuabo udi ne mpala wa luonji wa disu dikole ne wa budimu neajuke.

²⁴ Yeye neikale ne bukokeshi bua bungi, kadi kena ubuheta ku bukole buandi nkayandi. Yeye neavuishe dibutuka didi ditamba bukole, neatute dikasa dimpe mu malu mabi adiye wenza neabutule bantu badi ne bukole ne bantu ba bansanto diatshimue.

²⁵ Bua budimu buandi neatutshishile bakuabo dikasa dimpe ku mashimi andi; neikale ne diambu mu mutshima wandi, neabutule bantu ba bungi badi kabayi banze kudimuka. Neatombokele Mukokeshi wa bakokeshi mene mene, kadi nebamutshibule bituha bituha, tshianza tshia muntu katshiyi tshimulenga.

²⁶ Tshikena kumona tshiakukuambilabo bua dilolo ne dinda tshidi tshia bushuwa, kadi wewe sokoka tshikena kumona etshi, bualu bua tshidi tshilesha malu a matuku a bungi atshidi ku mpala.

²⁷ Meme, Danyele, nakahungila nakadi ne disama matuku makuabo! Hashishe, nakajuka, nakakuatshila mukelenge mudimu wandi. Nakalubakana kabidi bua tshikena kumona etshi, hualu bua tshiakatshijingulula.