Danyele 3 - Mukanda wa Nzambi Dihungila Dikulukulu ne Dihungila Dihia-dihia 2003

Balunda ba Danyele Badi Basungidibua mu Tshikutu tshia Kahia

¹ Mukelenge Nebukadenesâ wakenza luhingu lua tshiamu tshia or, bule bualu buakadi coudées makumi asambombo, butshiama bualu buakadi coudées isambombo. Wakaluimanyika ku mpata wa Dula mu province wa Babulona.

² Hashishe nfumu Nebukadenesâ wakatuma dî bua kusangishabo tuhita, miloho, ba-gouverneur, balumbuluishi, balami ba tshibutshilu, bena meji, bamanyi ba mikenji ne bakokeshi bonso ba mu province, balue biabo ku dijidila dia luhingu luakadi nfumu Nebukadenesâ muimanyike.

³ Hashishe, tuhita, miloho, ba-gouverneur, balumbuluishi, balama ba tshibutshilu, bena meji, bamanyi ba mikenji ne bakokeshi bonso ba mu province bakasangishibua ku dijidila dia luhingu luakadi mukelenge Nebukadenesâ muimanyike; bakimana ku mpala kua luhingu luakadi Nebukadenesâ muimanyike.

⁴ Messager wa nfumu wakela dî dikole ne, Badi banuelela mukenji eu, nuenu ba bisamba bionso ne miaku yonso ne,

⁵ Diba dinunvua tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, tuai mpala hanshi, tendelelai luhingu lua or ludi mukelenge Nebukadenesâ muimanyike.

⁶ Muntu yonso wabenga kutua mpala hanshi ne kulutendelela, mu diba adi mene nebamuele mu tshikutu tshia kahia kakole.

⁷ Nunku hakunvua bantu bonso tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, ba bisamba bionso ne ba miaku yonso bakatua mpala yabo hanshi, bakatendelela luhingu lua or luakadi mukelenge Nebukadenesâ muimanyike.

⁸ Mu diba adi Bena Kasada bakuabo bakasemena ha buihi, bakabanda Bena Yuda.

⁹ Bakambila mukelenge Nebukadenesâ ne, Wewe Mukelenge, wikale ne muoyo tshiendelele!

¹⁰ Wewe Mukelenge, wakuela mukenji ne, Hunvua muntu yonso tshiona tshia mpungi, tshia nshiba, tshia nzenze, tshia nkombe, tshia guitare, tshia tumama ne tshia biombelu bionso, budiye nʼabu mbua kutua mpala hanshi ne kutendelela luhingu lua or.

¹¹ Muntu yonso wabenga kutua mpala wandi hanshi ne kulutendelela, nebamuele mu tshikutu tshia kahia kakole.

¹² Bena Yuda bakuabo badiku bawakuteka ku mutu kua malu a mu province wa Babulona, menʼabo Shadalaka, Meshaka ne Abedenego. Bantu aba, mukelenge wetu, kabakukunemeka mene, kabena bakuatshila nzambi yebe mudimu, kabena batendelela luhingu lua tshiamu tshia or luwakuimanyika.

¹³ Bua mei â Nebukadenesâ wakafika munda ne wakakuata tshiji tshikole, wakela mukenji ne, Balue ne Shadalaka, Meshaka ne Abedenego. Nunku bakalua ne bantu aba ku mpala kua mukelenge.

¹⁴ Nebukadenesâ wakabebesha ne, Edi ndî dia bushuwa, anyi? Nuenu, Shadalaka, Meshaka ne Abedenego, kanuena nukuatshila nzambi yanyi mudimu, kanuena nutendelela luhingu lua or lunakuimanyika, anyi?

¹⁵ Katataka binuitabusha kutua mpala yenu hanshi ne kutendelela luhingu lunakuenza, hanunvua tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, mbimpe. Kadi binuikala kanuyi nutendelela, ha diba adi mene nebanuele munda mua tshikutu tshia kahia kakole; ne nzambi kai udi mua kunuhandisha mu bianza bianyi?

¹⁶ Shadalaka, Meshaka ne Abedenego bakakudimuna mukelenge dî ne, Mukelenge Nebukadenesâ, katuena ne bualu bua kukukudimuna dî mu muanda eu nansha.

¹⁷ Biasua Nzambi wetu utudi tukuatshila mudimu kutusungila, yeye neatuhandishe ku tshikutu tshia kahia kakole ne mu tshianza tshiebe kabidi, mukelenge.

¹⁸ Kadi bikaleye kayi musue kuenza nunku, Umanye biebe, mukelenge, ne katuena tukuatshila nzambi yebe mudimu, katuena tutendelela luhingu lua or luwakuimanyika.

¹⁹ Ha diba edi Nebukadenesâ wakulangana tente ne tshiji, ne mpala wandi wakakudimukila Shadalaka, Meshaka ne Abedenego. Nunku wakela dî diandi ne, Bahishe tshikutu ne kahia kadi kahita ka matuku makuabo misangu muanda mutekete.

²⁰ Wakambila bakuabo ba munkatshi mua bena nvita bandi bahite bukole bua kusuikabo Shadalaka, Meshaka ne Abedenego ne bua kubelabo mu tshikutu tshia kahia kakole.

²¹ Nunku bakasuika bantu aba bavuale binkutu biabo, bitambala biabo, bifulu biabo ne bivuala biabo bikuabo, bakabela mu tshikutu tshia kahia kakole.

²² Bualu bua mukenji wa mukelenge wakadi mukole ne bua tshikutu tshiakatamba kuhishibua, nunku ndimi ya kahia yakashiha bantu aba bakadi bambula Shadalaka, Meshaka ne Abedenego.

²³ Bantu aba basatu, Shadalaka, Meshaka ne Abedenego bakahona basuika mu tshikutu tshia kahia kakole.

²⁴ Hashishe, mukelenge Nebukadenesâ wakakuatshika buowa, wakajuka lukasa; wakakonka miloho yandi ne, Katuakuela bantu basatu basuika mu kahia, anyi? Bakandamuna mukelenge ne, Mbulelela, mukelenge.

²⁵ Yeye wakabakudimuna ne, Monai, ndi ntangila bantu banai basuluke, bendakana mu kahia, kabayi ne bualu. Tshinfuanyi tshia muinai tshidi bu tshinfuanyi tshia muana mukuabo wa nzambi.

²⁶ Hashishe, Nebukadenesâ wakaya ha buihi ne mushiku wa tshikutu tshia kahia kakole, wakela dî ne, Shadalaka, Meshaka ne Abedenego, nuenu bantu ba Nzambi Mutambe Bunene wa mu diulu, hatukai, luai kunoku. Shadalaka, Meshaka ne Abedenego bakaluhuka munkatshi mua kahia.

²⁷ Tuhita, miloho, ba-gouverneur, ne bena meji ba mukelenge, bamane kudisangishaku, bakatangila bantu aba, bakamona ne kahia kakakenza bualu hamʼbidi habo, nsuki ya ku mitu yabo kayakababuka, binkutu biabo kabiakanyanguka ne muhuya wa kahia kawakadi hamʼbidi habo,

²⁸ Nebukadenesâ wakamba kabidi ne, Batumbishe Nzambi wa Shadalaka, Meshaka ne Abedenego, wakutuma muanjelo wandi bua kuhandisha bantu bandi bakamueyemena. Bakahidia mukenji wa mukelenge, bakafila mibidi yabo ku lufu bua kabakuatshidi nzambi mukuabo mudimu, kabamutendeledi mu muaba wa Nzambi wabo mene.

²⁹ Nunku ndi ngela mukenji ne, Muntu yonso, wa tshisamba tshionso, anyi wa muaku wonso wadiula Nzambi wa Shadalaka, Meshaka ne Abedenego, nebamukose bituha bituha, nebavuishe nsubu wandi bu diala; bualu bua kakuena nzambi mukuabo udi mua kuhandisha bantu bu muakuenzeye.

³⁰ Hashishe, mukelenge wakahandisha Shadalaka, Meshaka ne Abedenego mu province wa Babulona.