Danyele 11 - Mukanda wa Nzambi Dihungila Dikulukulu ne Dihungila Dihia-dihia 2003

¹ Meme hanyi, mu tshidimu tshia kumudilu tshia bukokeshi bua Dayawesha, Muena Madai, nakimana bua kumukuatshisha ne kumukolesha.

Bakelenge ba ku Nôde ne ku Sude

² Katataka nenkuambile dî dia bushuwa. Tangila! Banfumu basatu bakuabo nebabike mu buloba bua Pelasa; hashishe, muinai neahite bakuabo bonso bubanji. Haheteye bukole bua bungi bua bubanji buandi, nênzeshe bantu bandi bonso bua kuyabo kuluangana ne ba mu bukelenge bua Bena Gelika.

³ Mukelenge wa bukitu neabike, neakokeshe ne bukokeshi bukole, nênze bu mudi mutshima wandi musue.

⁴ Hatantamaneye, nebanyenge bukelenge buandi, nebabutahulule tô ne ku mpehele inai ya mu diulu; kadi kabena babuhiana kudi bana bandi, kabuena buikala ne bukole buakadibu nʼabu hakadiye ubukokeshe; bualu bua nebabuangate, nebabuheshe banga bantu badi kabayi ba munkatshi mua bantu bandi.

⁵ Hashishe, mukelenge wa ku sude neikale ne bukole; kadi umue wa munkatshi mua tupitene tuandi neamuhite yeye bukole, neakokeshe bukelenge, bukokeshi buandi nebuhite bukole.

⁶ Hahita bidimu bikuabo, nebadie tshiovu; muana mukashi wa mukelenge wa ku sude neafidibue kudi mukelenge wa ku nôde bua kuvuisha ditalala hankatshi habo. Kadi mukashi eu kena wikala ne diboko dikole; mulume wandi kena ujalama ne diboko diandi kadiena ne bukole. Nebumushe mukashi eu diatshimue ne bamufidi ne muanʼandi ne wakamukolesha tshikondo atshi.

⁷ Mu matuku au muntu neabike mu muaba wa tatuʼandi bu lutonga lua ku miji yandi. Yeye nealue ne masalayi, neabuele mu musoko wa mukelenge wa ku nôde muasa ne ngumbu ya nvita, neamuenzele ne bantu bandi bu mudiye musue, neabahite bukole.

⁸ Neanyenge nzambi yabo, mpingu yakatulabo, ne malonga abo mimpe a argent ne a or, neaye nʼabi mu Ejipitu. Neadikande bidimu bikuabo bua kaluishi kabidi mukelenge wa ku nôde.

⁹ Hashishe, mukelenge eu neabuele mu bukelenge bua mukelenge wa ku sude, kadi neahingane ku buloba buandi.

¹⁰ Ku nyima bana bandi nebabishe nvita, nebasangishe tshisumbu tshia masalayi a bungi; umue wabo neaye ku mpala, neahitshile mu buloba bu musulu mûle ne mai mahasalala mahite mielelu yau; hashishe, nealukile ku nvita, nealuangane tô ne ku musoko wa mukelenge wa ku sude muasa ne ngumbu ya nvita.

¹¹ Mukelenge wa ku sude neakuatshike tshiji, neahatuke biandi, nealuangane ne mukelenge wa ku nôde. Mukelenge wa ku nôde neabishe tshisumbu tshinene tshia bena nvita, kadi tshisumbu etshi netshifidibue mu bianza bia mukelenge wa ku sude.

¹² Yeye neaye ne tshisumbu etshi, mutshima wandi neusanke, neahoneshe binunu makumi a bantu hanshi, kadi kena ubatamba bukole.

¹³ Mukelenge wa ku nôde nealukile kabidi, neakunguishe tshisumbu tshia bena nvita tshihite tshia diambedi bunene; haleha bidimu bikuabo, yeye nealue ne tshisumbu tshinene tshia bena nvita ne bintu bia bungi bidiye nʼabi bualu.

¹⁴ Mu tshikondo atshi ba bungi nebabike bua kuluangana ne mukelenge wa ku sude, ne bena tshimbambila ba munkatshi muenu nebatomboke bua kujadika tshikena kumona; kadi nebahange.

¹⁵ Hashishe, mukelenge wa ku nôde neafikeku, ne unguishe mishiki ya buloba, neanyenge musoko udi muasa ne ngumbu ya nvita. Bena nvita ba ku luseke lua sude ne bena nvita basungula bua bukitu buabo kabena bamanye mua kumutantamena.

¹⁶ Kadi yeye eu, udi ulua kuluisha mukelenge wa ku sude, nênze bu mudi mutshima wandi musue; kakuena muntu udi mua kumutantamena. Neimane biandi mu buloba bulengele, neabubutule ne tshianza tshiandi.

¹⁷ Yeye neatangishe mpala wandi bua kuyeye kudi mukelenge wa ku sude ne bukole buonso bua bukelenge buandi ne bua kuhunga nʼandi tshihungidi: neamuhe muanʼandi bu mukashi wandi bua kubutula buloba bua Ejipitu, kadi muanda udiye uhangidisha kawena ujalama ne kawena umulubulula.

¹⁸ Ku nyima kua bualu ebu yeye neatangishe mpala wandi ku maloba a ku muelelu wa mai manene, neanyenge a bungi, kadi kamanda kakuabo ka masalayi nekalekeshe mei a diambu adiye uhenda nʼau bakuabo; e, bulelela, neahingashe bihendu ebi kudiye.

¹⁹ Hashishe, yeye neatangishe mpala wandi ku misoko ya mu buloba buandi idi nuasa ne ngumbu ya nvita, kadi nealenduke, neadishinde hanshi, kabena bamusangana kabidi.

²⁰ Mukuabo neahingane mu muaba wandi; neatume mulambuishi bua kuhiteye ku luseke lua bukelenge ludi luhita bulengele; kadi hahita anu matuku mibi, yeye neumushibue kakuyi tshiji, kakuyi nvita.

²¹ Muntu udi bakuabo bahetula neahingane mu muaba wandi, wakadibo kabayi banze kunemeka bu mukelenge; yeye neamueneke mu tshikondo tshidi bantu basombe talalâ, neahete bukelenge ku mei andi a lubombo.

²² Bena nvita nebanyeme ku mpala kuandi bu mai mahasalale mahite mielelu ya musulu, nebabutudibue; mukelenge wa tshihungidi kabidi neabutudibue.

²³ Habunga nʼandi mukuabo tshihungidi, mu diba adi mene yeye neabange kuenza malu a kumudinga nʼau; nealue muntu mimene, muikale ne bantu babalê ku nyima kuandi.

²⁴ Mu tshikondo tshidi bantu basombe talalâ, nealue ku miaba ya mu province idi mihite bulengele, nênze malu adi ba tatuʼandi anyi bankambua bandi kabayi banze kuenza. Neabanyine ba munkatshi muabo bintu biakunyengeye, bintu biakuhauleye ne biuma bikuabo. E, neahangidishe malu adiye musue kuenzela misoko miasa ne ngumbu ya nvita, kadi nênze nunku anu hakumbana tshikondo.

²⁵ Tshisumbu tshinene tshia masalayi netshimukuatshishe, neikale ne bukole ne dikima bua kuluisha mukelenge wa ku sude. Mukelenge wa ku sude nealuangane nʼandi nvita ne tshisumbu tshia bena nvita tshihite bunene ne bukole, kadi neahange mu nvita bualu bua nebamuelele bifufu.

²⁶ Bushuwa, badi badia bia kudia biandi bishema nebamuhangishishe mu nvita, bena nvita bandi nebatangalake bu mudi mai a mu musulu mabasalale mahite mielelu yau; ba bungi nebahone hanshi bashihibue.

²⁷ Bakelenge aba babidi nebateke mitshima yabo ku malu mabi bua kuenza, nebambilangane mei a mashimi batshidibo bashikame ku mesa amue. Kadi muanda udibo bahangidisha kawena alubuluka, bualu bua nshikidilu wa malu au neafike anu mu tshikondo tshiakasungula Nzambi.

²⁸ Hashishe, neahingane mu buloba buandi ne bintu bia bungi; kadi mutshima wandi udi uhidia tshihungidi tshia tshijila, nênze bu mudi mutshima wandi musue, nealukile ku buloba buandi.

²⁹ Mu tshikondo tshiakasungulabo yeye neahingane ku luseke lua sude; kadi malu a mu tshikondo etshi kaena ikala bu muakadi malu a mu mbikondo tshia diambedi.

³⁰ Bualu bua matu a ku Kitima nealue kudiye ne nvita, ne mutshima wandi neuneme bujitu. Bua muanda eu neahidie tshihungidi tshia tshijila, nênze bu mudiye musue. Nealukile kuabo neunvuangane ne bantu aba badi bahidia tshihungidi tshia tshijila.

³¹ Bena nvita nehalue kudiye babatumineye mukenji, nebanyange tshitendelelu ne muaba muasa ne ngumbu ya nvita, nebalekeshe diosha dia mulambu wa kuosha wa buatshia-buatshia, nebajadike tshinyangu tshia dibutuka mu muaba wau.

³² Bua milayi yandi ya lubombo ne mashimi neanyange bantu aba badi bahidia tshihungidi; kadi bantu badi bamanye Nzambi wabo nebatantamane, nebenze malu makole.

³³ Ba munkatshi mua bantu badi ne meji nebayishe ba bungi lungenyi, kadi hahita matuku a bungi nebashihibue ne muele wa nvita ne kahia, nebaye mu buhika, nebabanyenge bintu.

³⁴ Hahonabo, bakuabo nebabakuatshishe ne dikuatshisha dikese, kadi ba bungi nebabalamate anu ne mei a lubombo.

³⁵ Bamue ba munkatshi mua badi ne meji nebahone bua kulengeshibua, bua kuvuishibua balengele ne bua kutokeshibua, tô ne hafika tshikondo tshia kunshikidilu. Bualu bua tshikondo tshiakasungulabo tshitshidi ku mpala.

³⁶ Mukelenge au nênze bu mudi mutshima wandi musue; neadinemeshe, neadibandishe ba mutu ba nzambi yonso, neadiule Nzambi wa nzambi ne mei adi matambe bubi. Neatute dikasa dimpe tô ne hashika tshiji tshia Nzambi, bualu bua malu akahangidisheye nênjibue.

³⁷ Yeye kena unemeka nzambi ya ba tatuʼandi, kena unemeka nzambi udi bakashi banyisha anyi nzambi yonso mukuabo; bualu bua yeye neaditumbishe ku mutu kua buonso buai.

³⁸ Kadi mu muaba wa nzambi ai neatumbishe nzambi wa misoko miasa ne ngumbu ya nvita. Neatumbishe nzambi wakadi hatatu bandi kabayi bamanye, neafile biamu bia or ne bia argent, mabue a mushinga mukole ne bintu bilengele kudiye.

³⁹ Yeye nealuangane ne misoko miasa ne ngumbu ya nvita mihite bukole, ku dikuatshisha dia nzambi wa ba bende. Neatumbishe bantu bonso hadi bamunemeka; neabahe bukokeshi ku mutu kua ba bungi, neababanyine buloba kabidi ku mushinga wamubabo.

⁴⁰ Mu matuku a kunshikidilu mukelenge wa ku Sude neamubunde; mukelenge wa ku nôde nealue kumuluisha bu nvunde, muikale ne makalu a nvita ne badi benda ha nyima ha tubalu tua nvita ne mu matu a bungi; neabuele mu matunga a bungi, uhita bu mudi musulu wa mai uhasalala.

⁴¹ Neabuele kabidi mu buloba bulengele, neabutule binunu makumi a bantu; kadi ba mu Edome, ba mu Moaba ne tshituha tshinene tshia Bena Amona nebahanduke mu bianza biandi.

⁴² Nealuishe ba mu makelenge makuabo; ba mu Ejipitu kabena bahanduka.

⁴³ Bintu bia or ne bia argent bia mu tshibutshilu ne bintu bionso bikuabo bia mushinga mukole bia mu Ejipitu nebikale biandi. Bena Libue ne Bena Atiopa kabidi nebakokeshibue kudiye.

⁴⁴ Kadi ngumu ya ku luseke lua esete ne lua ku nôde neyimukuatshishe buowa, neahatuke mûlangane ne tshiji tshikole bua kubutuleye ba bungi.

⁴⁵ Hashishe, neashimike ntenta yandi ya bukelenge hankatshi ha mai manene ne mukuna wa tshijila ne wa butumbi. Kadi neafike kunshikidilu kua muoyo wandi, kayi ne muntu wa kumukuatshisha.