Bienzedi 5 - Mukanda wa Nzambi Dihungila Dikulukulu ne Dihungila Dihia-dihia 2003

Anania ne Sapila

¹ Muntu wakadiku, dina diandi Anania, ne mukashi wandi Sapila, wakahana tshintu tshiakadiye nʼatshi,

² wakasokoka tshituha tshia mushinga, mukashi wandi wakadi mumanye bualu ebu; Anania wakalua ne tshinga tshituha, wakatshiteka ku makasa a bapostolo.

³ Kadi Petelo wakamba ne, Anania, bualu kai Satana wakûsha mutshima webe tente bua wewe kudinga Nyuma Muimpe ne bua kusokoka tshituha tshia mushinga wa budimi?

⁴ Hakadi budimi mu tshianza tshiebe, kabuakadi buebe, anyi? Hawakubuhana mushinga wabu kawakadi webe, anyi? Wakuelelangana meshi a bualu ebu mu mutshima webe munyi? Kuakudinga bantu, wakudinga Nzambi.

⁵ Hakunvua Anania mei â, wakahona hanshi, wakahuola, muoyo wandi; buowa bunene buakakuata bantu bonso bakunvua bualu ebu.

⁶ Bansongalume bakabika, bakamunyengela bilulu, bakaluhuka ngandi, bakamujika.

⁷ Hakahita diba bu mpola Isatu, mukashi wandi wakabuela, kai mumanye bualu.

⁸ Petelo wakamukonka ne, Ungambile, nuenu nuakuhana budimi ku mushinga bungi kampanda, anyi? Yeye wakamba ne, Bulelela, ku mushinga bungi nunku.

⁹ Kadi Petelo wakamukonka ne, Nuakusangishila mei enu bua kuteta Nyuma wa Mukelenge munda tshinyi? Tangila, makasa a bakujika bayebe adi ku mbelu, nebaluhuke nʼebe.

¹⁰ Yeye wakahona hanshi lukasa ku makasa andi, wakahuola muoyo wandi; bansongalume bakabuela, bakamusangana mufue, bakaluhuka nʼandi, bakamujika hehi ne bayandi.

¹¹ Buowa bunene buakakuata bena ekelesia bonso; buakakuata bonso bakutuma malu â kabidi.

Bukole bua bantu ba Nzambi

¹² Ku bianza bia bapostolo bimanyinu bia bungi ne malu a kukema biakadi bienjibua munkatshi mua bantu; buonso buabo bakadi badisangisha mu mbalanda wa Solomo ne mutshima umue.

¹³ Kakuakadi muntu wa bakadi bashale wakadi ne bukitu bua kudisangisha nʼabo; kadi bantu bakadi babatumbisha;

¹⁴ bena kuitabusha bakasangishibua kudi Mukelenge, bisumbu bia balume ne bia bakashi, batambe ba diambedi bungi.

¹⁵ Bua bualu ebu bantu bakalua ne basame mu misesu ya musoko, bakabaladika ha malalu ne ha biata ne, Hahita Petelo, mundidimbi wandi ubuikile nasha mukuabo wabo.

¹⁶ Bantu ba bungi bafume ku misoko yakadi hehi ne Yelushalema bakadi badiunguisha, batuale basame ne bakadi batatshisha kudi nyuma ya bukoya; masama a buonso buabo akashika.

Badi bakengesha Bena Kilisto

¹⁷ Kadi muakuidi mimene wakabika ne bonso bakadi nʼandi (mba luseke lua Basadoke), bakadi bûle tente ne mukau;

¹⁸ bakakuata bapostolo, bakababuesha mu nsubu wa lukanu.

¹⁹ Kadi mu butuku muanjelo wa Mukelenge wakunzulula bibi bia nsubu wa lukanu, wakaluhuka nʼabo, wakabambila ne,

²⁰ Yai bienu, nuimane mu ntempelo, nuambile bantu mei onso a Muoyo eu.

²¹ Hakunvuabo dî edi, bakabuela mu ntempelo hatshiatshia, bakabanga kuyisha bantu. Kadi muakuidi mimene wakalua ne bakadi nʼandi, wakabikila balumbuludi ne bakulu bonso ba bana ba Isalele, wakatuma dî ku nsubu wa lukanu bua kuluabo nʼabo.

²² Kadi baka lua tuhalai, katuakabasangana mu nsubu wa lukanu; tuakahingana, tuakamba ne,

²³ Tuakusangana nsubu wa lukanu muinshila bimpe ne balami bimane ku bibi; kadi hatuakunzulula, katuakusanganamu muntu.

²⁴ Hakunvua kahita ka balami ba ntempelo ne bakuidi banene mei â, mitshima yabo yakalubakana ne, Bualu ebu nebuikale munyi?

²⁵ Muntu wakalua, wakabambila ne, Tangilai, banuakubuesha mu nsubu wa lukanu badi bimane mu ntempelo bayisha bantu.

²⁶ Hashishe kahita ka bulami ba ntempelo ne tuhalai bakaya, bakalua nʼabo, kabai babakoka ku bukole, bua bakadi batshina bantu ne, Nebatukume mabue.

²⁷ Hakaluabo nʼabo, bakabateka ku mpala kua balumbuludi. Muakuidi munene wakabakonka ne,

²⁸ Tuakunukandika bikole ne, Kanuyishi bantu mu dina edi; ne tangilai, nuenu nuakûsha Yelushalema tente ne diyisha dienu, nudi basue kuteka mashi a muntu eu hamʼbidi hetu.

²⁹ Kadi Petelo ne bapostolo bakandamuna ne, Butudi nʼabu mbua kutumikila mei a Nzambi ku mpala kua mei a bantu.

³⁰ Nzambi wa bankambua betu wakabisha Yesu unuakashiha mukudika ku mutshi mutshiamakane.

³¹ Nzambi wakamubisha ne tshianza tshiandi tshîa balume bua kuikaleye Mukelenge ne Musungidi, ne bua kuheye Isalele kukudimuna kua mitshima ne kujimisha kua mibi.

³² Tuetu tudi bamanyi ba malu â, ne Nyuma Muimpe kabidi, udi Nzambi muhe badi batumikila mei andi.

³³ Hakunvuabo dî edi, tshishi tshikole tshiakabakuata; bakasua kushiha bapostolo.

³⁴ Kadi muetu mukuabo, Mufalese, dinu diandi Gamaliele, muyishi wa mikenshi ya Mose, mutumbishibue kudi bantu bonso, wakimana mu tshilumbuluidi; wakamba ne, Bahatule bantu aba tshituha.

³⁵ Wakamba biandi ne, Nuenu Bena Isalele, nudimuke bua bualu bunukadi ha kuenzela bantu aba.

³⁶ Bualu bua ku mpala kua matuku â Teuda wakabika biandi, wakamba ne, Meme ndi muntu munene; bantu bu nkama inai bakadisangisha nʼandi; kadi yeye wakashihebua; bonso bakadi bamutumikila bakatangadishibua, bualu buabo buakalua tshianana.

³⁷ Ku nyima kua bualu ebu Yuda wa mu Galela wakabika mu matuku akadibo bafunda mena a bantu, wakalohesha bantu bakuabo ku nyima kuandi; yeye kabidi wakafua, bonso bakadi bamutumikila bakatangadishibua.

³⁸ Katataka ndi nuambila ne, Ehukai kudi bantu aba, kanubenzedi bualu; bualu bua bikala lungenyi elu anyi mudimu eu bia bantu, nebijimine;

³⁹ kadi bikala bualu ebu bua Nzambi, kanuena bamanye mua kubuhumbisha; nunku nebansangane nuluisha Nzambi nvita.

⁴⁰ Bakitabusha dî diandi; hakabikilabo bapostolo, bakabakuma, bakabakandika ne, Kanuambi bualu mu dina dia Yesu, bakabalekela.

⁴¹ Bakumuka ku mpala kua bena tshilumbuluidi basanka bualu bua bakabadibua ne, Mbakane bua kufuishibuabo bundu bualu bua Dina dia Yesu.

⁴² Ku dituku ku dituku, mu ntempelo ne mu nsubu yabo, kabakalekela kuyisha bantu ne kubambila lumu luimpe ne, Yesu udi Kilisto.