Bienzedi 3 - Mukanda wa Nzambi Dihungila Dikulukulu ne Dihungila Dihia-dihia 2003

Badi bakolesha njeku

¹ Petelo ne Yone bakadi babanda ku ntempelo hakadi diba dia kutendelela Nzambi, diba ha Isatu.

² Muntu mulume mulela njeku wakadi mutuala kudi bantu, bakadi bamuteke ku dituku ku dituku ku tshibi tshia ntempelo tshidibo babikila ne, Tshimpe, bua kulombeye bakadi babuela mu ntempelo bintu.

³ Hakamoneye Petelo ne Yone bamba kubuela mu ntempelo, wakabalomba tshintu.

⁴ Petelo wakamutangila talala, ne Yone kabidi, wakamba ne, Ututangile.

⁵ Yeye wakabunvuila, utekemena ne, Nebampe tshintu.

⁶ Kadi Petelo wakamba ne, Tshiena ne argent ne ngolo, kadi tshindi nʼatshi, nenkuhetshi. Mu dina dia Yesu Kilisto wa ku Nazaleta, enda biebe.

⁷ Wakamukuata ku tshianza tshia balume, wakamubisha; makasa andi ne tuhombo biakakola lubilu.

⁸ Wakajuka lukasa, wakimana, wakabanga kuenda, wakabuela nʼabo mu ntempelo, wenda, utuhika, utumbisha Nzambi.

⁹ Bantu bonso bakamumona wenda utumbisha Nzambi;

¹⁰ bakamumanya ne, Nyeye wakadi ushikama ku Tshibi Tshimpe tshia ntempelo ulomba bintu; bakatamba kukema bua bualu buakalua kudiye.

Petelo udi wambila bantu bualu bua Yesu

¹¹ Hakadi ujeka uhukila Petelo ne Yone, bantu bonso bakabunguila mu mbalanda udibo babikila ne, Wa Solomo, batamba kukema,

¹² Hakamona Petelo bualu ebu, wakambila bantu ne, Nuenu Bena Isalele, bualu ebu budi bunukemesha munyi? Nudi nututangidila talala tshinyi, bu tuetu mbakuendesha muntu eu ku bukole buetu anyi ku buimpe buetu?

¹³ Nzambi wa Abalahama ne wa Isaka ne wa Yakoba, Nzambi wa bankambua betu, yeye wakatumbisha Muana wandi Yesu, unuakufila, ne unuakuhidia ku mesu kua Pilato, hakasueye kumulekela.

¹⁴ Nuenu nuakuhidia Udi wa Tshijila ne Muakane, nuakulomba bua kunuhabo muntu mushihianganyi;

¹⁵ nuakushiha Mukelenge wa muoyo, wakabishabo ku lufu kudi Nzambi, tuetu tudi bamanyi ba bualu ebu.

¹⁶ Bualu bua ditabusha dia mu dina diandi, dina diandi diakukolesha muntu eu unudi nutangila ne unudi bamanye; bulelela, ditabusha diakufuma kudiye ndiakumuha bukole ku mesu kua buonso buenu.

¹⁷ Bana betu, ndi mumanye ne, Nuenu nuakuenza bualu ebu mu dituhakana dienu, bu inuakuenza badi ku mutu kuenu.

¹⁸ Kadi malu akamba Nzambi diambedi mukana mua baprofete bandi bonso ne, Kilisto wanyi neakenge, yeye wakashikisha nunku.

¹⁹ Kudimunai mitshima yenu, andamukai kabidi, bua mibi yenu Ijimishibue; bua bikondo bia kunukankamasha bifume ku mesu kua Mukelenge,

²⁰ ne bua yeye atume Kilisto wakunusunguileye, Yesu mene.

²¹ Budiye nʼabu mbua kushala mu diulu tô ne halua bikondo bia kujadikabo tshiakabidi malu onso akamba Nzambi mukana mua baprofete bandi ba tshijila kale kale tô ne katataka.

²² Mose mene wakamba ne, Mukelenge Nzambi neanubishile muprofete wa munkatshi mua bana benu, bu muakambisheye meme; nenutumikile mei andi onso anuambileye.

²³ Muntu yonso wahidia kutumikila mei a muprofete au nebamubutule munkatshi mua bantu.

²⁴ Bulelela, baprofete bonso, ku Samuele tô ne ku bakamulonda, bungi buabo bakadi bamba, bakamba bua matuku â kabidi.

²⁵ Nuenu nudi bana ba baprofete, ne ba dihungila dia Nzambi diakahungeye ne bankambua benu, wambila Abalahama ne, Bisamba bionso bia ha buloba nebisanke bualu bua tunkanuniuna tuebe.

²⁶ Nzambi mumane kubisha Muana wandi diambedi, wakamutuma kunudi bua kunusankisheye, hanumusheye muntu ne muntu ku mibi yandi.