Bienzedi 27 - Mukanda wa Nzambi Dihungila Dikulukulu ne Dihungila Dihia-dihia 2003

Badi batuma Paulo ku Lomo

¹ Hakasungulabo bua tuetu kuya mu bualu ku Italia bakafila Paulo ne bakuabo bakadi mu nsubu wa lukanu mu bianza bia Yulio, kapitene ka mu tshisumbu tshia masalayi tshiakadibo babikila ne, Tshia Augusto.

² Hatuakabuela mu buatu bua ku Adulamutiona buakadi buamba kuya ku miaba yakadi kukala kua mai a luseke lua Asia, tuakaya; Alistâko, Muena Makedonia wa ku Tesalonike wakadi nʼetu.

³ Hakatshiabu, tuakafika ku Sidona; Yulio wakenzela Paulo bimpe, wakitabusha bua yeye kuya kudi balunda bandi bamukuatshishe.

⁴ Hatuakumukaku, tuakayila ku nyima kua Kupulio, bualu bua luhehele luakadi lutuhingisha.

⁵ Hatuakasabuka mai akadi hehi ne Kilikia ne Pampulia, tuakafika ku Mula, musoko wa mu luseke lua Lukia.

⁶ Kapitene wakasanganaku buatu bua Alesandelia buakadi buya ku Italia, wakatubueshamu.

⁷ Hatuakadi tuya matuku a bungi bitulu bitulu, tuakafika ha buihi ne Kinido, benda ne ditata dikole; bua luhehele luakadi lutuhumbisha bua kufikaku, tuakayila ku nyima kua Kulete hehi ne Salamone.

⁸ Hatuakahitshilaku ne ditata dikole, tuakafika ku muaba udibo babikila ne, Dilobo Dimpe; musoko wa Lasaya wakadi ha buihi.

⁹ Hakahita matuku a bungi, luendu lumane kutukuata buowa, bualu bua matuku a Dijila dia bia kudia akamana, kuhita, Paulo wakabanga kubadimusha:

¹⁰ wakabambila ne, Balumiana, udi mona ne, Luendu elu neluikale ne dibuluka ne dijimina dikole, kendia bintu ne buatu nkayabi, kadi ndia mioyo yetu kabidi.

¹¹ Kadi kapitene ka masalayi wakatamba kuitabusha dî dia muena yende ne dia muena buatu ku mpala kua mei akamba Paulo.

¹² Bualu bua dilobo adi kadiakadi diakane dia kushikishilaku ngondo ya mashika, bakadi batambe bungi bakamba ne, Tumukai kunoko, ne tuamanya mua kufika ku Foinike bua kushikishilaku ngondo ya mashika, aku kudi dilobo dikuabo dia Kulete, didi ditangila ku node-esete ne ku sude-esete.

¹³ Hakaheha luhehele lua ku Sude bitulu bitulu, bakelangana meshi ne, Tuakuheta butudi basue, bakabisha luongo, bakadi bayila ku muelelu wa mai wa Kulete.

¹⁴ Kadi hakahita tshituha tshihi, tshihuhu tshikole tshidibo babikila ne, Eulakulo, tshifuma ku mpata, tshiakatukuma.

¹⁵ Hakatutatshi ku buatu, kabuakamanya mua kutulama kuakadi kuvuila tshihuhu, tuakalekela kuita, luhehele luakatuendesha.

¹⁶ Hatuakafika ku nyima kua tshisenga tshikese, dina diatshi Kauda, tuakadi ne bualu bukole bua kuambula buatu bukese;

¹⁷ hakabubandishabu, bakanyengela buatu bunene mionshi ha nyima bua kubukuatakasha. Hakatshinabo ne, Luhehele nelutuele ha lusenga lua ku Suti, bakatulula tshilulu tshiakadi tshiendesha buatu, luhehele luakatuendesha.

¹⁸ Hatuakatata bikole ne tshihuhu, hakatshiabu, bakabanga kuela biakadibo batuala mu buatu mu mai;

¹⁹ hakafika dituku disatu, bakela bintu bikuabo bia mu buatu mu mai ne bianza biabo,

²⁰ Diba ne mitoto kabiakatutemena matuku a bungi, tshihuhu tshitambe bukole tshiakatukuata, katuakadi ne ditekemena kabidi ne, Netusungidibue.

²¹ Hakadibo kabai badie musangu mule, Paulo wakimana munkatshi muabo, wakamba ne, Balumiana, biakadi bimpe bia nuenu kunvua dî dianyi; bu nuenu benze nunku, kanuakadi kumuka ku Kuleta, kanuakadi kuikala ne bualu bukole ebu ne bua dibutuisha dia bintu.

²² Katataka ndi nusengelela ne, Koleshai mitshima yenu, bualu bua muoyo wa muntu umue wa munkatshi muenu kawena ujimina, anu buatu.

²³ Bualu bua muanjelo wa Nzambi wanyi, undi nkuatshila mudimu, wakuimana ha buihi nʼanyi butuku ebu;

²⁴ wakungambila ne, Paulo, kutshinyi; bûdi nʼabu mbua kuimana ku mpala kua Kaisa; ne mona, Nzambi wakukuha bonso badi benda nʼebe mu buatu.

²⁵ Nunku, bana betu, nukoleshe mitshima yenu; ndi ngitabusha Nzambi ne, Bualu nebuenjibue bu muakangambileye.

²⁶ Kadi butudi nʼabu mbua kuedibua mu tshianga.

²⁷ Hakalua butuku bua dikumi ne anai, hakadi luhehele lututambakasha mu mai manene a Adulia, mundankulu bena buatu bakelangana meshi ne, Tukadi ha kufika ha buihi ne buloba.

²⁸ Bakateta bule bua mai, bakabusangana maboko makumi abidi; bakayabo tshituha, bakabuteta kabidi, bakabusangana maboko dikumi ne atanu.

²⁹ Hakatshinabo ne, Netuedibue ha mabue, bakela luongo inai mu mai ku tshitaku tshia buatu, bakadi bajinga ne, Buatshiahu.

³⁰ Bena buatu bakamba kunyema, bakadi batulula buatu bukese mu mai, badinga ne, Tudi basue kuela luongo mikuabo ku mpala kua buatu.

³¹ Kadi Paulo, wakambila kapitene ka masalayi ne masalayi mene ne, Bikala bantu aba kabai bashale mu buatu, kanuena mua kusungidibua.

³² Hashishe masalayi akakosa mionshi ya buatu bukese, buakahona mu mai.

³³ Paulo wakadi ubasengelela buonso buabo tô ne hakamba butuku kutshia, bua kudiabo, wamba ne, Edi ndituku dia dikumi ne anai anuakadi bashale, bajile bia kudia kanui badie tshintu.

³⁴ Nunku ndi nusengelela bua nuenu kudia, bualu ebu nduhandu luenu, bualu bua lusuki lua ku mutu kua umue wenu kaluena lujimina.

³⁵ Hakambeye nunku, wakangata mutanda wa bidia, wakasakidila Nzambi ku mesu kua buonso buabo, wakautshibula, wakabanga kudia.

³⁶ Buonso buabo bakakolesha mitshima yabo, ne bobo bine bakangata bia kudia.

³⁷ Buonso buetu tuakadi mu buatu bantu nkama ibidi ne makumi muanda mutekete ne basambombo.

³⁸ Hakûkutabo, bakabanga kuhehesha buatu, bakela blé mu mai.

³⁹ Hakatshiabu, kabakadi bamanye buloba abu; bakatangila tshinkonya tshia mai tshiakadi ne lusenga, bakasangisha dî ne, Ne tuamanya mua kutuma buatu mu muaba wawa.

⁴⁰ Bakakosa, mionshi ya luongo, bakahisha mu mai ne mionshi; ha diba adi mene bakasulula mionshi ya bidimba; bakabandisha tshilulu tshia ku mpala bua kukuata tshi luhehele, bakabanga kuya balulame ku muelelu wa mai.

⁴¹ Kadi hakafikabo ha nsangilu ibidi ya mai, bakatua buatu ku lusenga; mpala wa buatu wakatua ku lusenga, wakashindama, kadi tshitaku tshiabu tshiakabanga kutshibuka bualu bua bukole bua mambuanka.

⁴² Lungenyi lua masalayi luakadi lua kushiha bena lukanu, bua umue wabo kombedi, kanyemi.

⁴³ Kadi bualu bua kapitene kau wakasua kusungila Paulo, wakâkesha; wakamba ne, Badi bamanye mua kuombela badiele mu mai, badianjile ku mpata,

⁴⁴ bakuabo bangate mabaya anyi bintu bikuabo bia mu buatu, baye ha mutu habi. Nunku buonso buabo bakafika ku mpata, bakahanduka.