Bienzedi 26 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi udividila ka mpola kua Agipa

¹ Agipa wakambila Paulo ne, Udi mua kudiambila bualu buebe. Paulo wakolola tshianza, wakabanga kudividila ne,

² Mukelenge Agipa, ndi ne disanka bualu bua lelu ndi ngamba kudividila ku mesu kuebe bua malu onso anakubandibua kudi Bena Yuda;

³ ndi ntamba kusanka bua wewe udi mumanye bilele bia Bena Yuda ne malu abo bimpe; ndi nkutendekena bua wewe kutelesha dî dianyi ne lutulu.

⁴ Tshikadilu tshia muoyo wanyi ku buana buanyi, tshinakadi nʼatshi ku tshibangidilu munkatshi mua tshisamba tshianyi mene, ne ku Yelushalema, tshidi tshimanyibue kudi Bena Yuda bonso;

⁵ biasuabo kuamba dî dilelela badi banmanye ku tshibangidilu, bu munakadi Mufalese wa tshisumbu tshia bakatamba kulamata tshitendeledi tshietu.

⁶ Katataka udi muimane aha bua kulumbuluishibua bua ditekemena dia mulayi wakalaya Nzambi bankambua betu;

⁷ bisamba bietu dikumi ne bibidi bidi bitendelela Nzambi bikole butuku ne munya, bidi bitekemena ne, Netuhete mulayi au. Mukelenge, Bena Yuda badi bambandila bualu bua ditekemena edi.

⁸ Bimbisha Nzambi bafue, nudi numona bualu ebu bu bualu budi kabui bua kuitabushibua munyi?

⁹ Bulelela, meme kabidi nakadi ngelangana meshi ne, Bundi nʼabu mbua kuenza malu a bungi adi abihisha dina dia Yesu wa ku Nazaleta.

¹⁰ Nakenzenza bualu ebu kabidi mu Yelushalema; hanakangata bukole kudi bakuidi banene ba Nzambi, nakabuesha basanto ba bungi mu nsubu ya lukanu; hakimbabo kubashiha, nakitabusha.

¹¹ Misangu ya bungi nakadi mbakengesha mu nsunagoga yonso, nakakeba bua kubahendesha Nzambi; bualu bua nakadi nʼabo lukuna lutambe, nakabakengesha tô ne ku misoko ya bisamba bikuabo.

¹² Hanakadi ngenza nunku, nakadi ngenda mu nshila wa ku Damaseke ne bukole ne dî bia bakuidi banene;

¹³ bakafika diba munda munyi mukelenge, nakatangila munya mukole ufuma mu diulu mutambe dinkenka dia diba, wakuntemena meme ne bakadi benda nʼanyi.

¹⁴ Buonso buetu hatuakahona hanshi, nakunvua dî dingambila mu muaku wa Bena Ebelu ne, Shaula, Shaula, udi unkengesha meme tshinyi? Wewe udi udikengesha hautshidi usuba mikolo ku mutshi musonga.

¹⁵ Nakamukonka ne, Mukelenge, wewe udi nganyi? Mukelenge wakankudimuna ne, Ndi bianyi Yesu ûdi ukengesha;

¹⁶ kadi bika, wimane, bua bualu ebu nakumuenekela kûdi bua kukusungula bu muenji wa mudimu wanyi ne bu mumanyishi wa malu awakumona ne wa malu anamuenekela kûdi;

¹⁷ nenkusungile mu bianza bia bantu ne bia bisamba bia bende, bandi nkutuma kudibo,

¹⁸ bua wewe kubulula mesu abo, bakome nyima ku midima batangile ku munya, bakoma nyima ku bukole bua Satana batangile kudi Nzambi, bua bobo bahete dijimisha dia mibi yabo ne buhianyi munkatshi mua badi balengeshibue ku ditabusha didibo bangitabusha nʼadi.

¹⁹ Nunku, mukelenge Agipa, tshiakahidia kutumikila tshikena kumona tshia mu diulu,

²⁰ kadi nakambila ba mu Damaseke diambedi, ne ba mu Yelushalema, ne ba mu luseke luonso lua Yudaya, ne ba bisamba bia bende kabidi, bua kukudimunabo mitshima yabo, batshinguluke kudi Nzambi, benze malu adi makanangane ne dikudimuna dia mitshima yabo.

²¹ Bua bualu ebu mbuakankuatshila Bena Yuda mu ntempelo, bakeba kunshiha.

²² Bualu bua nakaheta dikuatshisha dia kudi Nzambi, ndi muimane tô ne lelu eu, nmanyisha bakese ne banene, tshi ngamba manga malu, anu akambabo kudi baprofete ne kudi Mose ne, Alualua.

²³ Ndi mbalesha bu mudi Kilisto mumanye mua kukenga, ne bu mudiye, wa kumudilu wa ku dibika dia bafue, wamba kumanyisha bantu ne bisamba bia bende bualu bua munya.

²⁴ Hakadiye udividila nunku, Festo wakela dî diandi bikole ne, Paulo wewe udi muhale, lungenyi luebe lua bungi ludi lukuhadisha.

²⁵ Kadi Paulo wakamba ne, Mukelenge Festo, tshiena muhale, kadi ndi ngamba mei a bushua ne a meshi.

²⁶ Mukelenge Agipa udi mumanye bua malu â; ndi muambilau ne dikima; bualu bua ndi ngitabusha ne, Kakuena bualu bumue bua mu malu â budi bumusokome, bua bualu ebu kabuakenjibua mu ditumba dia nsubu.

²⁷ Mukelenge Agipa, wewe udi witabusha mei a baprofete, anyi? Ndi mumanye ne, Udi muitabushe.

²⁸ Agipa wakambila Paulo ne, Wewe udi ukeba kungitabushisha ndue Muena Kilisto anu ne kalu kakese.

²⁹ Paulo wakamba ne, Nasha ne kalu kakese nasha ne bualu bunene, ndi ndomba Nzambi kambua wewe nkayebe kadi bua bonso badi bunvua mei anyi lelu kabidi, balue bu mundi emu, anu nkanu ei idishadile.

³⁰ Mukelenge wakabika ne ngovena no Bênike ne bakadi bashikame nʼabo.

³¹ Hakumukabo, bakambilangana ne, Muntu eu kena wenza bualu bua lufu anyi bua lukanu.

³² Agipa wakambila Festo ne, Bu muntu eu kai mulayidile kudi Kaisa, bakadi kumanya mua kumulekela.