Bienzedi 25 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi ka mpata kua Festo, udi wamba ne, Ndi ndayidila kudi Kaisa

¹ Nunku hakabuela Festo mu luseke luandi, hakahita matuku asatu, wakumuka mu Kaisalia, wakabanda ku Yelushalema.

² Bakuidi banene ba Nzambi ne bantu banene ba Bena Yuda bakabanda Paulo ku mesu kuandi; bakabanga kumutendekena,

³ bakamulomba diakalengele kudibo, diakabi kudi Paulo, ne, Utume dî bua kumubikila ku Yelushalema; bamane kuela tshifufu bua kumushihela mu nshila.

⁴ Kadi Festo wakandamuna ne, Badi balama Paulo ku Kaisalia, nkadi ha kuyaku tshituha tshihi;

⁵ badi ne bukokeshi munkatshi muenu bahueke nʼanyi; bikala muntu au ne bualu bubi, bamubande.

⁶ Hakalaleye munkatshi muabo matuku kâi mahite ha muanda mukulu anyi dikumi, wakahueka ku Kaisalia; hakatshiabu, wakashikama ha tshilumbuluidi, wakamba bua kuluabo ne Paulo.

⁷ Hakalueye, Bena Yuda bakadi bafume ku Yelushalema bakimana bamunyungulule, bakamubanda malu makole a bungi akadibo kabai bamanye mua kuashikika.

⁸ Kadi Paulo wakadividila ne, Tshiakenza bualu bubi bumue, nasha bua mikenshi ya Bena Yuda, nasha bua ntempelo, nasha bua Kaisa.

⁹ Bualu bua Festo wakasua kuikala ne diakalengele kudi Bena Yuda, yeye wakebesha Paulo ne, Wewe newitabushe bua kuya ku Yelushalema bua kukulumbuluishilaku bua malu â ku mesu kuanyi, anyi?

¹⁰ Kadi Paulo wakamba ne, Ndi muimane ku tshilumbuluidi tshia Kaisa, bundi nʼabu bua kulumbuluishibuaku; tshiakuenzela Bena Yuda bibi, bu mûdi wewe mene mumanye bimpe kabidi.

¹¹ Bingikala muenji wa bualu bubi, ne bingikala muenze bualu bua lufu, tshiena mpidia kufua; kadi hikala malu au onso adi bantu aba bambande kâi malelela, kakuena muntu udi mumanye mua kunfila kudibo bua kubasankisha. Ndi ndayidila kudi Kaisa.

¹² Hashishe, Festo wakasangisha dî ne bamukuatshishi ba bilumbu, wakamukudimuna ne, Wewe wakujidila kudi Kaisa, neuye kudi Kaisa.

¹³ Hakahita manga matuku, mukelenge Agipa ne Bênike bakalua ku Kaisalia bua kuela Festo muoyo.

¹⁴ Hakadibo balalaku matuku a bungi, Festo wakalesha mukelenge tshilumbu tshia Paulo ne, Muena lukanu mukuabo udiku, mushîa kudi Felika:

¹⁵ hanakadi ku Yelushalema, bakuidi banene ne bakulu ba Bena Yuda bakanmanyisha bualu buandi; bakandomba ne, Umuhishe.

¹⁶ Nakabakudimuna ne, Bena Lomo kabena ne tshilele tshia kufila muntu tshianana diambedi mubanda kai muanze kuikala ne bamubandi ku mpala kuandi, kai muanze kuikala ne tshikondo tshia kudividila bua bualu buakamubandabo.

¹⁷ Nunku hakadisangishabo kunoko, tshiakashanguluka; hakatshiabu, nakashikama ha tshilumbuluidi, nakamba bua kuluabo ne muntu eu.

¹⁸ Hakimana bamubandi, kabakadi bamubanda bualu bumue bua malu mabi anakadi ngela meshi;

¹⁹ kadi bakadi bamubanda bua malu makuabo a tshitendeledi tshiabo, ne bua kampanda au Yesu, wakamana kufua, kadi Paulo wakadi ukolesha dî diandi ne, Udi ne muoyo.

²⁰ Bualu bua nakadi ndubakana mua kukonka bua malu â, tshiakamanya mua kukosa tshilumbu etshi, nakamukonka ne, Wewe newitabushe bua kuya ku Yelushalema bua bakulumbuluishileku bua malu â, anyi?

²¹ Kadi bakalomba Paulo bua kumulamabo tô ne ku dikosa dia tshilumbu tshiandi kudi Augusto, nakabambila bua kumulamabo tô ne hanamanya mua kumutuma kudi Kaisa.

²² Agipa wakambila Festo ne, Meme kabidi nakadi musue kunvua dî dia muntu au. Festo wakamba ne, Makelela neunvue dî diandi.

²³ Hakatshiabu, Agipa ne Bênike bakahia ne kudilesha kunene, bakabuela mu muaba wa kunyua bilumbu, ne tumanda ne bantu banene ba musoko; hakamba Festo dî, bakalua ne Paulo.

²⁴ Festo wakamba ne, Mukelenge Agipa ne bonso badi nʼetu kunoko, nudi nutangila muntu eu wakabandabo kudi tshisumbu tshionso tshia Bena Yuda ku mesu kuanyi, ku Yelushalema ne kunoko kabidi, bela mbila ne, Kambimpe bia yeye ikale ne muoyo kabidi.

²⁵ Kadi meme nakamusangana kai muenze bualu bua kufueye; bua yeye nkayandi wakalayidila kudi Augusto, nakasungula bua kumutuma.

²⁶ Kadi tshiena ne dî dilelela dia bualu buandi dia kufundila mukelenge wanyi. Ebu mbualu bunakumubikidila ku mpala kuenu, ne kudi wewe mene, mukelenge Agipa, hakonkibueye tshilumbu tshiandi, nemmanye dî dia kufunda,

²⁷ bualu bua ndi mona ne, Kendungenyi luakane bua kutuma muena lukanu, tshi muambe tshiakamubandabo.