Bienzedi 23 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi ka mpata kua balumbuludi

¹ Paulo wakatangila balumbuludi talala, wakamba ne Bana betu, nakadi muikale ne mutshima muakane ku mesu kua Nzambi tô ne ku dituku edi.

² Muakuidi mimene wa Nzambi, dinu diandi Anania, wakambila bakadi bimane ha buihi ngandi bua kumukumabo ku mishiku.

³ Hashishe, Paulo wakamuambila ne, Nzambi neakukume, wewe tshimanu tshia nsubu tshidi tshitokesha; udi mushikame undumbuluisha bu mudi mukenshi, kadi wewe wakubangila bua kunkumabo bu mudi kamui mukenshi, munyi?

⁴ Bakadi bimane ha buihi ne Paulo bakamuebesha ne, Udi uhenda muakuidi mimene wa Nzambi, anyi?

⁵ Paulo wakamba ne, Bana betu, tshiakamanya ne, Yeye udi muakuidi manene wa Nzambi, bua bakafunda ne, Kuhendi mukokeshi wa tshisamba tshiebe.

⁶ Kadi hakamanya Paulo ne, Bakuabo mBasadoke, bakuabo mBafalese, wakela dî dikole ha tshilumbuluidi ne, Bana betu, Edi bianyi Mufalese, udi muana wa Mufalese; badi bandumbuluishila bua ditekemena ne bua dibika dia befue.

⁷ Hakambeye nunku, mpata yakajuka hankatshi ha Bafalese ne Basadoke, tshisumbu tshiabo tshiakatahuluka,

⁸ bualu bua Basadoke batu bamba ne, Kakuena dibika dia bafue anyi muanjelo anyi nyuma; kadi Bafalese badi bitabusha ne, Malu â onso adiku.

⁹ Diyoyo dia bungi diakajuka; bafundi bakuabo ba ku luseke lua Bafalese bakadi batayika bikole ne, Katuena bamone muntu eu ne bualu, ne nyuma wakumuambila dî, anyi ne muanjelo?

¹⁰ Hakajuka mpata minene nunku, kamanda wakatshina ne, Paulo neatuanyibue, wakambila masalayi bua kuyau kumumusha munkatshi muabo ku bukole ne bua kuluau nʼandi mu nsubu wa masalayi.

¹¹ Hakila butuku, Mukelenge wakimana ha buihi nʼandi, wakamba ne, Kolesha mutshima webe; bu muwakuamba bualu buanyi mu Yelushalema, nunku bûdi nʼabu mbua kubuamba mu Lomo kabidi.

Badi belela Paulo tshifufu bua kumushiha

¹² Hakatshiabu, Bena Yuda bakasangisha dî diabo, bakadiela mulau ne, Katuena tudia, katuena tunua, tô ne hatuashiha Paulo.

¹³ Bakadi bele tshifufu nunku bakadi batambe ha makumi anai.

¹⁴ Bakalua kudi bakuidi banene ba Nzambi ne kudi bakulu, bakamba ne, Tuakusangisha dî dietu, badiele mulau mukole, ne, Katuena tulabula tshintu, tô ne hatuashiha Paulo.

¹⁵ Katataka nuenu ne balumbuludi nuambile kamanda bua yeye kulua nʼandi kunudi, bu badi basue kumanya bualu buandi bimpe; tuetu tudi bamane kudilongolola bua kumushiha diambedi yeye kai muanze kulua ha buihi.

¹⁶ Kadi muana mulume wa muanʼabo ne Paulo mukashi wakunvua bualu bua kualamina kuabo, wakalua, wakabuela mu nsubu wa masalayi, wakambila Paulo.

¹⁷ Paulo wakabikila kapitene kakuabo kudiye, wakamuambila ne, Ya ne nsongalume eu kudi kamanda, bua yeye udi ne dî dia kumuambila.

¹⁸ Nunku kapitene wakamuangata, wakaya nʼandi kudi kamanda, wakamuambila ne, Paulo, muena lukanu, wakumbikila kudiye, wakungambila bua kulua ne nsongalume eu kûdi, udi ne dî dia kukuambila.

¹⁹ Kamanda wakamukuata ku tshianza, wakaya nʼandi ha nkayandi, wakabanga kumuebesha mu busokoko ne, Udi ne dî kai dia kungambila?

²⁰ Yeye wakamba ne, Bena Yuda bakasangisha dî diabo bua kukuebesha bua wewe kulua ne Paulo makelela ha tshilumbuluidi, bu wewe udi musue kumuebesha bualu buandi kabidi bimpe.

²¹ Kuitabushi dî diabo, bua balume batambe makumi anai ba munkatshi muabo badi bamualamine, bamane kusangisha dî ne kudiela mulau ne, Katuena tudia, katuena tunua, to ne hatuamushiha; katataka badi badilongolole, batekemene dî diebe.

²² Nunku kamanda wakatuma nsongalume, wakamuambila ne, Kuambidi muntu mukuabo bu muwakunsokoluela malu â.

Badi batuma Paulo kudi Felika

²³ Kamanda wakabikila tupitene tubidi, wakabambila ne, Nulongolole masalayi nkama ibidi bua kuyau tô ne ku Kaisalia, abike butuku ebu diba ha tshitema, ne masalayi adi enda ha tubalu makumi muanda mutekete, ne bena mafuma nkama ibidi;

²⁴ wakabambila kabidi bua kuangatabo tubalu tua kushikikahu Paulo bamufikishe bimpe kudi ngovena Felika.

²⁵ Yeye wakafunda mukanda, nunku ne,

²⁶ Kulaudio Lusia udi utumina ngovena wa butumbi Felika muoyo.

²⁷ Bena Yuda bakakuata muntu eu, bakamba kumushiha; kadi nakalua kudibo ne masalayi, nakamusungila, mumane kunvua ne, Udi Muena Lomo.

²⁸ Bualu bua nakasua kumanya bimpe tshiakamubandilabo, nakaya nʼandi ku tshilumbuluidi tshiabo.

²⁹ Nakamusangana mubandibue anu bua makonka a mikenshi yabo, kadi dibanda diandi kadiakadi dia mua kumushiha anyi kumuela mu lukanu.

³⁰ Hakandeshabo ne, Badi belela muntu eu tshifufu, nakumutuma kûdi lubilu; nakambila bamubandi kabidi bua kuyabo kumubandila ku mesu kuebe.

³¹ Nunku masalayi akangata Paulo, bu muakâmbilabo, akalua nʼandi mu butuku tô ne ku Antipati.

³² Kadi hakatshiabu, akashîa masalayi akadi ha tubalu bua kuyau nʼandi, akahingana ku nsubu wau.

³³ Hakalukau ku Kaisalia, Hakaluau mukanda kudi ngovena, akateka Paulo ku mesu kuandi.

³⁴ Hakaubaleye, wakakonka luseke luakadiye; hakamanyeye ne, Ngua ku Kilikia,

³⁵ wakamuambila ne, Nengunvue tshilumbu tshiebe bimpe, halua bakubanda wakamba bua kumulamabo mu nsubu munene wa Helode.