Bienzedi 22 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi wamhila bantu muakakudimuneye mutshima wandi

¹ Bana betu ne batatu, unvuai divila dianyi dindi musue kunuambila katataka.

² Hakamunvuabo ubambila dî mu muaku wa Bena Ebelu, bakatamba kuhua talala. Yeye wakamba ne,

³ Ndi bianyi Muena Yuda, nakaledibua mu Tâso wa mu Kilikia, kadi nakakolela mu musoko eu, ku makasa a Gamaliele; bakanyisha bu mudi tshilele mene tshia mikenshi ya bankambua betu, muikale ne lukunukunu lua bualu bua Nzambi bu munudi nʼalu buonso buenu lelu.

⁴ Nakakengesha Nshila eu tô ne ku lufu, nsuika balume ne bakashi, mbabuesha mu nsubu ya lukanu.

⁵ Muakuidi munene wa Nzambi udi udidila ne bakulu bonso; nakangata mikanda kudibo mitumine bana betu, nakadi ngenda mu nshila wa ku Damaseke bua kusuika bakadiku mu nkanu, ne bua kulua nʼabo ku Yelushalema bua kubakengeshabo.

⁶ Hanakadi ngenda nunku, hanakafika ha buihi ne Damaseke, hakadi diba munda munya, munya mukole wa mu diulu wakantemena lukasa.

⁷ Nakahona hanshi, nakunvua dî dingambila ne, Shaula, Shaula, udi unkengesha meme tshinyi?

⁸ Nakamukudimuna dî ne, Mukelenge, wewe udi nganyi? Yeye wakungambila ne, Ndi bianyi Yesu wa ku Nazaleta ûdi ukengesha.

⁹ Bakadi nʼanyi bakatangila munya bulelela, kadi kabakajingulula dî dia wakadi wakula nʼanyi.

¹⁰ Nakamukonka ne, Mukelenge, nengenze tshinyi? Mukelenge wakangambila ne, Bika, uye mu Damaseke, nebakuambilemu malu onso akukusunguilabo bua wewe kuenza.

¹¹ Hanakadi tshi mumanye mua kutangila bualu bua bukole hua munya au, bakadi nʼanyi bakankuata ku tshianza balombola, nunku nakafika ku Damaseke.

¹² Muntu mukuabo wakadimu, dina diandi Anania, wakadi mutendeledi muakane utumikile mikenshi ya Mose, lumu luandi luakadi luimpe munkatshi mua Bena Yuda bonso bakadi bashikamemu;

¹³ yeye wakalua kundi, wakimana ba buihi nʼanyi, wakangambila ne, Muanʼetu Shaula, tabala. Ha diba adi mene nakatabala, nakamumona.

¹⁴ Yeye wakamba ne, Nzambi wa bankambua betu wakakusungula bua wewe kumanya budiye musue, ne bua wewe kutangila Udi Muakane, ne bua wewe kunvua dî dia mukana muandi.

¹⁵ Bua wewe newikale mumanyishi wandi kudi bantu bonso wa malu awakutangila ne awakunvua.

¹⁶ Udi ushangulukila katataka tshinyi? Bika ubatijibua, uvuibue ku mibi yebe, Ubikila dina diandi.

¹⁷ Hanakahingana ku Yelushalema, hanakadi ntendelela Nzambi mu ntempelo, nakalotakana,

¹⁸ nakamumona ungambila ne, Umuka mu Yelushalema lubilu, bua kabena bitabusha dî diudi wamba bua bualu buanyi.

¹⁹ Nakamba ne, Mukelenge, bobo badi bamanye munakadi mbuesha bakakuitabusha mu nsubu wa lukanu ne munakadi mbakuma mu nsunagoga yonso;

²⁰ hakadibo bamatshisha mashi a Stefano, mumanyishi wa bualu buebe, meme kabidi nakadi ngimana ba buihi, ngitabusha buala ebu, ndama bivualu bia bamushiha

²¹ Yeye wakangambila ne, Umuke munemu, bualu bua nenkutume kuakua kule kudi bisamba bia bende.

Ponto udi ubamanyisha ne, Ndi Muena Lomo

²² Bakadi bamutelesha tô ne hakambeye dî edi; hashishe bakabandisha mei ne, Bumusha muntu eu ha buloba, kabiakadi bimpe bia yeye kuikala ne muoyo.

²³ Hakadibo bela mbila bikole, bakavula bivalu, bakela buloba mulu.

²⁴ Hakadibo benza nunku, kamanda ka masalayi wakamba bua kuluabo nʼandi mu nsubu wa masalayi, wakamba kabidi bua kumukumabo alonde bua kumanyeye buakamuelelabo mbila nunku.

²⁵ Hakamusuikabo mionshi, Paulo wakebesha kapitene ka masalayi lukama wakadi muimane ha buihi ne, Nudi ne bukole bua kukuma muntu udi Muena Lomo, kabai banze kumuhisha, anyi?

²⁶ Hakunvua kapitene dî edi, wakaya kudi kamanda, wakamuambila ne, Udi wamba kuenza tshinyi? Muntu eu udi Muena Lomo.

²⁷ Kamanda wakalua, wakamukonka ne, Ungambile, udi Muena Lomo, anyi? Yeye wakitaba ne, E.

²⁸ Kamanda wakamuambila ne, Nakasumba budishikaminyi ebu ku mushinga mukole. Paulo wakamuambila ne, Biadi meme nakaledibua Muena Lomo.

²⁹ Bakadi bamba kumutondesha ku kukole bakumuka kudiye lubilu; ne kamanda kabidi wakatshina hakamumanyeye ne, Udi Muena Lomo, ne bua hakadiye mumusuike.

³⁰ Kadi hakatshiabu, bualu bua wakasua kumanya bimpe tshiakamubandilabo kudi Bena Yuda, kamanda wakamusulula, wakamba bua bakuidi banene ba Nzambi ne balumbuludi bonso kudisangishabo, wakahueka ne Paulo, wakamushikika ku mpala kuabo.