Bienzedi 21 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi ka Tulo

¹ Hatuakumuka ne buatu, bamane kuhanduluka nʼabo, tuakaya balulame tô ne ku Kosa; hakatshiabu, nakafika ku Lodo; tuakumukamu, nakuya ku Palala.

² Hatuakasangana buatu bukuabo bukadi ha kusabuka ku Foinike, nakabuelamu, nakaya.

³ Hatuakatangila Kupulio, tuakamushîa ku tshianza tshia luboko; tuakasabuka ku Sulia, nakahueka ku Tulo bua bena buatu bakasua kuhatulaku bintu.

⁴ Hatuakamona bayidi, tuakalalamu matuku muanda mutekete. Bantu aba, bamane kumanyishibua kudi Nyuma, bakambila Paulo ne, Kubandi ku Yelushalema.

⁵ Hatuakashikisha kulalamu matuku, nakumuka, tuakaya ku luendu luetu; buonso buabo, ne bakashi ne bana, bakatushindikila tô ne hatuakahatuka mu musoko; hatuakatua binu kukala kua mai, nakatendelela Nzambi, tuakalayangana nʼabo.

⁶ Tuakabuela mu buatu, kadi bobo bakahingana kuabo.

Paulo udi mu nshila wa ku Yelushalema

⁷ Hatuakashikisha luendu lutuakafuma nʼalu ku Tulo, tuakafika ku Tolemai, nakelangana ne bana betu muoyo, tuakalala nʼabo difuku dimue.

⁸ Hakatshiabu, tuakumuka tuakalua ku Kaisalia. Hatuakabuela mu nsubu wa Filipo, muambi wa Lumu Luimpe umue wabo wa bulami muanda mutekete, tuakalala kuandi.

⁹ Yeye wakadi ne bana bakashi banai bakatshidi tumama, bakadi bamba malu akadi kâi manze kulua.

¹⁰ Hatuakadi balalemu matuku makuabo, muprofete, dina diandi Agabo, mufume ku Yudaya, wakahueka ku Kaisalia.

¹¹ Hakalueye kutudi, wakangata mukaba wa Paulo, wakadisuika nʼau ku makasa ne ku bianza, wakamba ne, Nyuma Muimpe udi wamba ne, Bena Yuda ba mu Yelushalema nebasuike muena mukaba eu nunku, nebamufile mu bianza bia bantu ba bende.

¹² Hatuakunvua malu â, tuetu ne bena ha muaba au tuakadi tumusengelela ne, Kubandi ku Yelushalema.

¹³ Kadi Paulo wakatuebesha ne, Nudi nuenzela nunku tshinyi, nudila numpandisha mutshima wanyi? Ndi mumane kudilongolola, kembua kusuikibua nkayaku, kadi bua kufua kabidi ku Yelushalema bua dina dia Mukelenge Yesu.

¹⁴ Hakahidieye kuitabusha, tuakalekela, tuakamba ne, Bualu budi Mukelenge musue buenjibue.

Paulo udi ma Yelushalema

¹⁵ Hakashika matuku â, tuakalongolola bintu bietu, tuakabanda ku Yelushalema.

¹⁶ Ba munkatshi mua bayidi ba mu Kaisalia bakabanda nʼetu, balue ne Nasona, Muena Kupulio, muyidi wa kale, muena kuandi kutuaya kulala.

¹⁷ Hatuakafika mu Yelushalema, bana betu la mu Kilisto bakatusankidila.

¹⁸ Hakatshiabu, Paulo wakaya nʼetu kudi Yakobo; bakulu bonso bakadiku.

¹⁹ Hakabeleye muoyo, wakabalondela bualu ne bualu akenza Nzambi munkatshi mua bisamba bia bende ku mudimu wandi.

²⁰ Hakunvuabo bualu abu, bakatumbisha Nzambi, bakamuambila ne, Muanʼetu, wewe udi utangila bungi bua mbombo ya ba munkatshi mua Bena Yuda badi bamane kuitabusha; kadi buonso buabo badi ne lukunukunu lua mikenshi ya Mose.

²¹ Bakunvua lumu luebe ne, Wewe udi uyisha Bena Yuda bonso badi munkatshi mua bisamba bia bende bua kulekelabo Mose; udi ubambila ne, Kanutengudi bana benu, kanuenji bilele bia diambedi.

²² Nunku netuenze tshinyi? Nebunvue bulelela ne, Wewe wakulua.

²³ Ka, enza bualu ebu bu mutudi tukuambila: Tudi ne balume banai badi baditshiha;

²⁴ ubangate, udilengesha nʼabo, ubafutshile bua bobo bamanye mua kubeya nsuki yabo; nunku, bonso nebamanye ne, Malu atuakunvua bua bualu buebe kêna malelela, kadi wewe udi wenda mululame, udi wenza mikenshi ya Mose.

²⁵ Kadi bualu bua bantu ba bisamba bia bende bakamana kuitabusha, tuakabatumina mukanda, bahunge dî dietu ne, Nulekele bintu bidi bishihela mpingu, nulekele kabidi mashi, ne nyama mifiekela mu nshingu ha kuishiha, ne masandi.

²⁶ Hashishe Paulo wakangata bantu aba, hakatshiabu wakadilengesha nʼabo, wakabuela mu ntempelo, umanyisha bakuidi ba Nzambi bua dishika dia matuku a kudilengesha kuabo; wakashalamu tô ne hakafilabo mulambu wa muntu ne muntu.

Bena Yuda badi bakuata Paulo mu ntempelo

²⁷ Hakamba matuku au muanda mutekete kushika, Bena Yuda ba mu Asia, hakamumonabo mu ntempelo, bakashikila tshisumbu tshionso tshia bantu, bakamukuata,

²⁸ bela mbila ne, Bena Isalele, nutukuatshishe, kayeu muntu udi uyisha bantu bonso kuonso bua kuhidiabo tshisamba tshietu ne mikenshi ya Mose ne muaba eu; bualu bukuabo, yeye wakulua ne Bena Gelika mu ntempelo, wakona muaba eu wa tshijila.

²⁹ Bualu bua bakumumona diambedi wenda mu musoko ne Tofimo, muena Efeso, bakela meshi ne, Paulo wakulua nʼandi mu ntempelo.

³⁰ Diyoyo diakadi mu musoko mujima, bantu bakunguila, bakakuata Paulo, bakabanga kumumusha ku bukole mu ntempelo, bibi biakinshidibua lukasa.

³¹ Hakadibo bakeba kumushiha, lumu luakafika kudi kamanda ka tshisumbu tshia masalayi ne. Musoko mujima wa Yelushalema udi mujikuka ne mutoyi.

³² Yeye wakangata masalayi ne tupitene lubilu, wakanyema kudibo. Hakamonabo kamanda ne masalayi, bakalekela kukuma Paulo.

³³ Hashishe kamanda wakasemena hehi, wakamukuata, wakamba bua kumusuikabo ne nkanu ibidi, wakabanga kubebesha ne, Udi nganyi? Wakuenza tshinyi?

³⁴ Bakuabo ba mu tshisumbu bakela mbila, mukuabo dî dikuabo mukuabo dî dikuabo; hakahangeye kujingulula bimpe bualu bua diyoyo, wakamba bua kuluabo nʼandi mu nsubu wa masalayi.

³⁵ Hakafikeye ha tshibandilu, masalayi akamuambula, bualu bua luonji lua bantu,

³⁶ bua tshisumbu tshia bantu bakadi babalonda bela mbila ne, Bamumushe.

³⁷ Hakambabo kubuela mu nsubu wa masalayi ne Paulo, yeye wakebesha kamanda ne, Nkuambile dî, anyi? Kamanda wakamukonka ne, Ahu udi mumanye muaku wa Bena Gelika, anyi?

³⁸ Wewe ke Muena Ejipitu wakajudisha ditomboka mu matuku a diambedi, mulombole bantu binunu binai ba Batahianganyi mu tshihela, anyi?

³⁹ Kadi Paulo wakamba ne, Ndi Muena Yuda wa ku Tâso wa mu Kilikia, ndi bianyi wa musoko udi kawi wa hatuhu. Ndi nkutendekena bua meme kuambila bantu aba dî.

⁴⁰ Hakitabusheye, Paulo wakimana ha tshibandilu, wakahoha bantu tshianza; hakahuabo talala, yeye wakabambila di mu muaku wa Bena Ebelu, wakamba ne,