Bienzedi 16 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi usangana Timote

¹ Yeye wakalua kabidi ku Dêbe ne Luseta. Mu Luseta muakadi muyidi, dina diandi Timote, muana wa Muena Yuda mukashi wakadi muena kuitabusha, kadi tatu wandi wakadi Muena Gelika.

² Yeye mene wakadi ne lumu luimpe lumanyibua kudi bana babo ba mu Kilisto ba mu Luseta ne mu Ikonio.

³ Paulo wakasua aye nʼandi. Wakamuangata, wakamutengula, bualu bua Bena Yuda bakadi mu nseke ai; bua bantu bonso bakamanya ne, Tatu wandi wakadi Muena Gelika.

⁴ Hakadibo bendakana mu misoko, bakafila mikenshi yakelabo kudi bapostolo ne bakulu ba mu Yelushalema bua kuitumikilabo.

⁵ Nunku ekelesia yakakoleshibua mu ditabusha, yakadi ivulangana ku dituku ku dituku.

Nyuma Muimpe udi ubalesha nshila. Tshikena kumona tshia ku Makedonia

⁶ Hakabakanda Nyuma Muimpe bua kuamba di dia Nzambi mu Asia, bakahitshila mu luseke lua Fugia ne Galatia.

⁷ Hakafikabo ha buihi ne Musia, bakakeba kuya mu Bitunia, kadi Nyuma wa Yesu kakitabusha.

⁸ Hakahitalu hehi ne Musia, bakahueka ku Toa.

⁹ Tshikena kumona tshiakamueneka kudi Paulo butuku: Muntu wa ku Makedonia wakadi muimane, umutendekena ne, Lua biebe mu Makedonia, utukuatshishe.

¹⁰ Hakamoneye tshikena kumona, ha diba adi tuakakeba kuya mu Makedonia, tuelangana meshi ne, Nzambi wakumbikila bua tuetu kubambila lumu luimpe.

Paulo ne Sila badi mu Filipoi

¹¹ Hatuakumuka mu Toa, tuakasabuka, baye balulame ku Samotaka; hakatshiabu, tuakafika ku Neapoli;

¹² tuakajukamu, tuakaya ku Filipoi, musoko wakadi muhite yonso mikuabo ya mu luseke alu lua Makedonia; musoko eu wakadi nkolonyi wa Bena Lomo; tuakadi tulala mu musoko au matuku.

¹³ Hakalua dituku dia Lumingu tua Bayuda, tuakahatukila ku tshibuelelu tshia musoko, tuakaya ku muelelu wa musulu, ha muaba utuakela meshi ne, Ngua kutendelela; tuakashikama hanshi, tuakayikila ne bakashi bakadi badisangisheku.

¹⁴ Mukashi wakadiku, dina diandi Ludia, wakadi biandi musumbishi wa bilulu bikunze wa ku musoko wa Tuatila, yeye wakadi mutendeledi wa Nzambi, wakunvua dî dietu; Nzambi wakabulula mutshima wandi bua kutumikileye malu akambabo kudi Paulo.

¹⁵ Hakamubatizabo ne bakadi mu nsubu muandi, yeye wakatendekena ne, Binuanjingulula ne, Meme udi muena ditabusha mulelela wa Mukelenge, nulue mu nsubu muanyi nushalemu. Wakatuenzesha ne disengelela diandi.

¹⁶ Hatuakadi tuya ku muaba wa kutendelela, nsongakashi muhika wakasangakana nʼetu, wakadi ne nyuma mubi wakadi umubukisha, wakamuenesha banfumuʼandi bintu bia bungi bualu bua lubuku luandi.

¹⁷ Wakatulonda, tuetu ne Paulo, wela mbila ne, Balume aba mbahika ba Nzambi Mutambe Bunene wa mu diulu, badi banuambila bua nshila wa luhandu.

¹⁸ Wakadi wenza nunku matuku a bungi. Kadi hakatata Paulo bikole, wakatshinguluka, wakambila nyuma mubi ne, Ndi nkuambila mu dina dia Yesu Kilisto, umuke munda muandi. Ha diba adi mene wakaluhuka.

¹⁹ Kadi hakatangila banfumuʼandi ne, Ditekemena dia luhetu luetu diakumuka, bakakuata Paulo ne Sila, bakakakoka mu tshisalu kudi bantu banene ba musoko.

²⁰ Hakaluabo nʼabo kudi balumbuludi, bakamba ne, Bantu aba mBena Yuda, badi babisha diyoyo dia bungi mu musoko wetu,

²¹ badi bambila bantu bilele bitudi katu! bamanye mua kuitabusha anyi kuenza, bua tudi Bena Lomo.

²² Tshisumbu tshiabo tshionso tshiakabahungulukila, balumbuludi bakabavula bilulu biabo, bakamba ne, Bubakume ne nkodi.

²³ Hakabakumabo mikumu ya bungi, bakababuesha mu nsubu wa lukanu, bakambila mulami bikole ne, Ubalame bimpe.

²⁴ Hakunvueye muakamuambilabo nunku, wakababuesha mu nsubu wakadi munda mua nsubu munene, wakabuesha makasa abo mu miomba.

Mulami wa nsubu wa tukanu udi ukudimuna mutshima wandi

²⁵ Kadi bakalua bu mundankulu, Paulo ne Sila bakadi batendelela, bakadi bambila Nzambi misambu, bena lukanu bakadi batelesha;

²⁶ buloba buakakanka bikole, bishimikidi bia nsubu wa lukanu biakanyunga, bibi bionso biakunzuluka lukasa, nkanu ya bantu bonso yakadibo babasuike nʼai yakasuluka.

²⁷ Mulami wa nsubu wakatabala; hakamoneye bibi bia nsubu biunzuluke, wakatula muele wandi, wakamba kudishiha, wela meshi ne, Bena lukanu bakunyema.

²⁸ Kadi Paulo wakela dî diandi bikole ne, Kudienzedi bibi, buonso buetu tudiku.

²⁹ Mulami wakalombesha minda, wakabuela mu nsubu uzakala ne buowa, wakahona ku mpala kua Paulo ne Sila,

³⁰ wakabaluhula, wakamba ne, Bakelenge, bundi nʼabu mbua kuenza tshinyi bua kusungidibua?

³¹ Bakamba ne, Itabusha Mukelenge Yesu, neusungidibue ne ba mu nsubu muebe.

³² Bakamuambila dî dia Mukelenge ne bonso bakadi mu nsubu muandi.

³³ Yeye wakabangata ha diba adi mene butuku, wakabuvua ha mibundabunda yabo; bakamubatiza lukasa ne bantu bandi bonso.

³⁴ Wakabanda nʼabo mu nsubu muandi, wakabalongoluela mesa, wakatamba kusanka ne nsubu wandi yonso, bamane kuitabusha Nzambi.

³⁵ Hakatshiabu, balumbuludi bakatuma mpoloto ne dî ne, Balekele bantu aba.

³⁶ Mulami wa nsubu wa lukanu wakamanyisha Paulo mei â ne, Balumbuludi bakutuma bua kunulekela; nunku nuluhuke mpindiu, nuye talala.

³⁷ Kadi Paulo wakabambila ne, Bakatukuma, tuetu Bena Lomo, ku mesu kua bantu; kabai banze kutuhisha mu tshilumbu, bakutubuesha mu nsubu wa lukanu; ne katataka badi basue kutumusha mu busokoko, anyi? Nasha kakese; bobo nkayabo badiluile bua kutuluhula.

³⁸ Mpoloto yakambila balumbuludi mei â; bakatshina, hakunvuabo ne, Badi Bena Lomo;

³⁹ bakalua, bakabatendekena; hakabaluhulabo, bakabasengelela bua kumukabo mu musoko.

⁴⁰ Hakaluhukabo mu nsubu wa lukanu, bakabuela mu nsubu wa Ludia. Hakamonabo bana babo ba mu Kilisto, bakabakolesha mitshima, bakaya.