Bienzedi 14 - Mukanda wa Nzambi Dihungila Dikulukulu ne Dihungila Dihia-dihia 2003

Paulo ne Bânaba badi mu Ikonio

¹ Mu Ikonio bakabuela diakamue mu nsunagoga wa Bena Yuda, bakambila bantu dî diakitabushisha ba bungi, Bena Yuda ne Bena Gelika.

² Kadi Bena Yuda bakadi bahidia bakavundulula mitshima ya bantu ba bisamba bia bende, bakaivuisha mifike kudi bena kuitabusha.

³ Bakashalamu musangu mule, bakajukuila bantu dî mu Mukelenge, yeye wakajadika dî dia ngasa wandi, hakabaheye bimanyinu ne malu a kukema akenzelabo ne bianza biabo.

⁴ Kadi bantu ba mu musoko bakadi batahuluke; bakuabo bakadi ku luseke lua Bena Yuda, bakuabo ku luseke lua bapostolo.

⁵ Hakadisangisha bantu ba bisamba bia bende ne Bena Yuda ne bakelenge babo bua kubenzela bibi ne bua kubakuma mabue,

⁶ bakamanya bualu abu, bakanyemena ku misoko ya mu Lukaonia, mena ai Luseta ne Dêbe, ne ku luseke alu;

⁷ bakambaku lumu luimpe.

Paulo ne Bânaba badi mu Dêbe ne Luseta

⁸ Mu Luseta muakadi mushikame muntu ne makasa andi matekete, mamuʼandi wakamulela mulema nunku, kakanza kuenda.

⁹ Yeye wakunvua Paulo wakula; Paulo wakamutangila talala; hakamanyeye ne, Yeye udi ne ditabusha dia kukoleshibua,

¹⁰ wakela di diandi bikole ne, Imana ne makasa ebe Wakabika lukasa, wakenda.

¹¹ Hakatangila bantu bualu buakenza Paulo, bakela mbila, bamba mu muaku wabo wa luseke lua Lukaonia ne, Nzambi yakuhueka kutudi mifuane bantu.

¹² Bakidika Bânaba ne, Yupita; Paulo ne, Mêkulio, bua yeye wakadi muakuidi wa malu.

¹³ Tshitendelelu tshia Yupita tshiakadi ku mpala kua musoko, mubuki wa Yupita wakalua ne ngombe ne bilongo ku bibi bia musoko, yeye ne bantu bonso bakasua kubashihela nyama ai.

¹⁴ Kadi bapostolo Bânaba ne Paulo, hakunvuabo bualu abu, bakadihanda bivualu, bakaya lubilu munkatshi mua tshisumbu tshia bantu, bela dî bikole ne,

¹⁵ Balumiana, nudi nuenzela nunku tshinyi? Tuetu tudi bantu bafukibue bu nuenu, tudi banuvuile ne lumu luimpe, bua nuenu nulekele malu â a hatuhu, nulonde Nzambi wa muoyo, wakafuka diulu ne buloba ne mai manene ne bintu bionso bidimu;

¹⁶ mu bikondo bia ku nyima yeye wakitabusha bua bisamba bionso bia bende biende mu nshila yakadi mitshima yabo misue.

¹⁷ Kadi yeye kakashala kai ne ntemu; wakanuenzela bimpe, wakanuha nvula ne bidimu bia kuvudisha bia kudia bifume mu diulu, wakûsha mitshima yenu tente ne bidia ne disanka.

¹⁸ Hakashikishabo mei â, bualu buakadi bukole kudibo bua kukanda bantu ne, Kanutushihedi nyama.

¹⁹ Kadi Bena Yuda ba ku Antiokia ne Ikonio bakalua ka Luseta, bakashikila bantu, bakakuma Paulo ne mabue, bakamukoka bamuimasha kukala kua musoko, bela meshi ne, Udi mufue.

²⁰ Kadi hakadi bayidi bimane bamunguile, wakabika, wakaya mu musoko; hakatshiabu, wakaya ne Bânaba ku Dêbe.

²¹ Hakambilabo bena musoko au bualu bua lumu luimpe, hakavuishabo bantu ba bungi bayidi, bakahingana ku Luseta ne ku Ikonio ne ku Antiokia,

²² benda bakolesha mioyo ya bayidi, babasengelela ne, Nushale mu ditabusha dienu; bua tuetu kubuela mu bukelenge bua Nzambi, anu hawahitshila mu makenga a bungi.

Badi basungula bakulu ba Ekelesia

²³ Hakasungula Paulo ne Bânaba ekelesia ne ekelesia bakulu, hakatendelelabo Nzambi ne dijila dia bia kudia, bakabashia mu bianza bia Mukelenge wakitabushabo.

²⁴ Bakahitshila mu Pisidia, bakafika mu Pampulia.

²⁵ Hakashikishabo kuamba di mu Pêge, bakahueka ku Atalia.

²⁶ Bakumukaku mu bualu, bakasabuka ku Antiokia, kuakafidibuabo mu ngasa wa Nzambi bua mudimu wakushikishabo.

²⁷ Hakaluabo, hakasangishabo bena ekelesia, bakabalondela malu onso akenza nʼabo Nzambi, ne bua yeye wakunzuluila bisamba bia bende tshibi tshia ditabusha.

²⁸ Bakashalamu musangu mule ne bayidi.