Bienzedi 12 - Mukanda wa Nzambi Dihungila Dikulukulu ne Dihungila Dihia-dihia 2003

Badi bela Petelo mu nsubu wa lukanu

¹ Mu matuku au mukelenge Helode wakakuata bena ekelesia bakuabo bua kubakengesha.

² Wakashiha Yakobo, muanʼabo ne Yone, ne muele.

³ Hakamoneye ne, Bualu ebu budi busankisha Bena Yuda, wakakuata Petelo kabidi. Matuku au akadi a bidia bidi kabi biela luevene.

⁴ Hakamukuateye, wakamuela mu nsubu wa lukanu, wakamufila mu bianza bia masalayi dikumi ne asambombo, bua kumulamau; wakasua kulua nʼandi ku mesu kua bantu hashika Kuhita kua Yehowa.

⁵ Nunku bakalama Petelo mu nsubu wa lukanu, kadi bena ekelesia bakamulombela Nzambi bikole.

⁶ Hakadi Helode wamba kulua nʼandi, butuku abu mene Petelo wakadi mulale hankatshi ha masalayi abidi, musuika ne nkanu ibidi; ku tshibi kuakadi balami balama nsubu wa lukanu.

⁷ Tangila, muanjelo wa Mukelenge wakimana ha buihi nʼandi, dinkenka diakatema mu nsubu; wakatuta Petelo ha mbale, wakamubisha ku tulu, wakamba ne, Juka lukasa. Nkanu yakadikohokela ku bianza.

⁸ Muanjelo wakamuambila ne, Suika mukaba webe, buesha bisabata. Petelo wakenza nunku. Wakamuambila kabidi ne, Ela tshivualu tshiebe hamʼbidi, undonde.

⁹ Wakaluhuka, wakamulonda; kakamanya ne, Budi muanjelo wenza mbulelela, wakelangana meshi ne, Tshinakumona ntshikena kumona.

¹⁰ Hakahitshilabo mu nsubu wa kumudilu ne mu nsubu muibidi, bakafika ku tshibi tshia tshiamu tshia ku mushiku wa mbelu wa nshila wa kuhatuka ku musoko, tshiakadiunzulukila; bakaluhuka; hakayilabo mu musesu umue, muanjelo wakamushîa lukasa.

¹¹ Hakamanya Petelo bualu ebu bimpe, wakamba ne, Bulelela, ndi mumanye katataka ne, Mukelenge wakutuma muanjelo wandi, wakunsungila mu bianza bia Helode ne mu malu onso akatekemena bantu ba Bena Yuda.

¹² Hakadiye welangana meshi a bualu ebu, Wakafika ku nsubu wa Malia, mamu wa Yone, wakadi ne dinga dine Mâko; mu nsubu muakadi ba bungi badisangishe, bakadi batendelela Nzambi.

¹³ Hakakokoleye ku tshibi tshia ku mbelu, mukashi muenji wa mudimu, dina diandi Loda, wakaya kuitaba.

¹⁴ Hakunvueye dî dia Petelo, kakunzulula tshibi bualu bua disanka, kadi wakanyema lubilu mu nsubu, wakamba ne, Petelo udi muimane ku tshibi.

¹⁵ Bakamuambila ne, Wewe udi muhale. Kadi yeye wakabambila bikole ne, Mbulelela. Bakamba ne, Udi muanjelo wandi.

¹⁶ Kadi Petelo wakadi ukokolakokola ku tshibi; hakunzululabo, bakamumona, bakakema.

¹⁷ Kadi yeye wakabahoha tshianza ne, Huai; wakabambila bu muakamumusha Mukelenge mu nsubu wa lukanu. Wakamba ne, Nuambile Yakobo ne bana betu ba mu Kilisto malu â. Wakumuka biandi, wakaya ku muaba mukuabo.

¹⁸ Hakatshiabu, masalayi akadi ahampakana bikole ne, Petelo udi hanyi?

¹⁹ Helode wakamukeba; hakahangeye kumumona, wakebesha balami, wakabalumbuluisha ne, Baye nʼabo bua kubashiha. Yeye wakumuka mu Yudaya, wakahueka ku Kaisalia, wakashikamaku.

Lufu lua Helode

²⁰ Bena Tulo ne Bena Sidona bakafikisha Helode munda bikole; hakakuatabo bulunda ne Bulasto, mulami wa bintu bia mukelenge, bakalua kudi Helode ne mutshima umue bua kulengesha nʼandi, bualu bua luseke lua mukelenge luakadi ludisha luseke luabo.

²¹ Hakafikila dituku diakasungulabo, Helode wakaluata bilulu bia bukelenge, wakashikama ha nkuasa wa butumbi, wakadi ubambila mei mimpe.

²² Bantu bakela mbila ne, Ndi dia nzambi, kandia muntu.

²³ Muanjelo wa Mukelenge wakamukuma lukasa, bualu bua yeye kakadi utumbisha Nzambi; tuishi tuakamudia, wakahuola muoyo wandi.

²⁴ Kadi dî dia Nzambi diakadiunda, diakavulangana.

²⁵ Hakashikishabo kufila bintu, Bânaba ne Shaula bakahingana, bafume ku Yelushalema; bakalua ne Yone, dinga dina Mâko.