Bienzedi 11 - Mukanda wa Nzambi Dihungila Dikulukulu ne Dihungila Dihia-dihia 2003

Petelo udi udibingisha ku mesu kua bapostolo bakuabo

¹ Bapostolo ne bana babo ba mu Kilisto bakadi mu Yudaya bakunvua ne, Bisamba bia bende kabidi biakuangata dî dia Nzambi.

² Hakalua Petelo ku Yelushalema, bakadi batengula bakela nʼandi mpata ne,

³ Wewe wakubuelakana ne bantu bakadi kabai batengula, wakadia nʼabo.

⁴ Petelo wakabanga kubalondoluela ne,

⁵ Nakadi mu musoko wa Yopa ntendelela Nzambi; mu kulotakana nakumona tshikena kumona, ntshintu tshihueka bu tshilulu tshinene tshifuma mulu tshikuata ku nzemba yatshi inai, tshiakuhuekela kundi mene.

⁶ Hanakutshitangila, nakutshijingulula bimpe, nakumona nyama ya makama anai ya ha buloba ne nyama ya mu tshisuku ne bintu bidi bidikoka hanshi ne nyunyu ya mulu.

⁷ Nakunvua kabidi dî diakungambila ne, Petelo, bika, shiha, udie.

⁸ Kadi nakuamba ne, Nasha, Mukelenge; tshintu tshia tshianana anyi tshia tshijila katshiena tshianze kubuela mukana muanyi.

⁹ Kadi dî diakufuma mulu tshiakabidi ne, Kivuishi tshidi tshilengesha kudi Nzambi ne, Ntshianana.

¹⁰ Bakenza nunku misangu isatu, bakakoka bintu bionso mulu kabidi.

¹¹ Ha diba adi mene bantu basatu bakadi bimane ku mpala kua nsubu utuakadi, buntumina ku Kaisalia.

¹² Nyuma wakungambila ne, Ya nʼabo, kuedi mpata. Bana betu aba to mu Kilisto basambombo bakuya kunfila, luakubuela mu nsubu wa muntu au.

¹³ Yeye wakutuambila bu muakamoneye muanjelo muimane mu nsubu muandi, umuambila ne, Tuma bantu ku Yopa, balue ne Simona, dinga dina Petelo,

¹⁴ yeye neakuambile mei a kukusungila nʼau ne ba mu nsubu webe bonso.

¹⁵ Hanakubanga kuakula, Nyuma Muimpe wakabahuekela bu muakutuhuekeleye ku tshibangidilu.

¹⁶ Nakuvuluka dî dia Mukelenge diakambeye ne, Bulelela, Yone wakabatiza bantu ne mai, kadi nuenu nenubatijibue mu Nyuma Muimpe.

¹⁷ Bikala Nzambi mubahe kuha kuakutuheye hatuakuitabusha Mukelenge Yesu Kilisto, ahu meme nakadi nganyi wa kufuilangana ne Nzambi?

¹⁸ Hakunvuabo malu â, bakahua, bakatumbisha Nzambi ne, Nzambi wakuha bisamba bia bendekabidi kukudimuna kua mutshima bua kuikalabo ne muoyo.

Ku Antiokia badi babanga kubikila bena kuitabusha ne, Bena Kilisto

¹⁹ Bakadi batangadike bualu bua dikenga diakajuka bua lufu lua Stefano bakaya tô ne ku Foinike ne ku Kupulio ne ku Antiokia, bambila anu Bena Yuda dî.

²⁰ Kadi bakuabo bakadi Bena Kupulio ne Bena Kulene, hakafikabo ku Antiokia, bakabanga kuambila Bena Gelika kabidi lumu luimpe lua Mukelenge Yesu.

²¹ Tshianza tshia Nzambi tshiakadi nʼabo; bantu ba bungi bakitabusha, bakakudimuna mitshima yabo kudi Mukelenge.

²² Lumu luabo luakafika ku matshu a bena ekelesia ba mu Yelushalema; bakatuma Bânaba tô ne ku Antiokia.

²³ Hakafikeye, hakamoneye ngasa wa Nzambi, wakasanka; wakakolesha mitshima ya buonso buabo ne, Nunanukile kushala hehi ne Mukelenge ne disuminyina mu mitshima.

²⁴ Bualu bua yeye wakadi muntu muimpe, wakadi mûle tente ne Nyuma Muimpe ne ditabusha; ba bungi bakasangishibua kudi Mukelenge.

²⁵ Bânaba wakaya ku Tâso bua kukeba Shaula.

²⁶ Hakamumoneye, wakalua nʼandi ku Antiokia. Bakadi badisangisha ne bena ekelesia tô tshidimu tshijima, bakayisha bantu ba bungi; mu Antiokia muakabangabo kubikila bayidi ne, Bena Kilisto.

Bena Ekelesia ba mu Antiokia badi bakuatshisha ba mu Yelushalema

²⁷ Mu matuku â baprofete ba ku Yelushalema bakalua ku Antiokia.

²⁸ Mukuabo, dina diandi Agabo, wakabika biandi, Nyuma mumane kumumanyisha, wakamba ne, Tshiole tshinene netshilue ha buloba buonso. Bulelela, tshiakalua hakadi Kulaudio mu bukelenge.

²⁹ Bayidi bonso, muntu ne tshiakadiye nʼatshi muntu ne tshiakadiye batshi, bakahangidisha bua kukuatshisha nʼabi bana babo ba mu Kilisto ba mu Yudaya;

³⁰ bakenza nunku, bakabituma kudi bakulu mu bianza bia Bânaba ne Shaula.