Bienzedi 10 - Mukanda wa Nzambi Dihungila Dikulukulu ne Dihungila Dihia-dihia 2003

Kônelio udi umona tshikena kumona

¹ Mu Kaisalia muakadi muntu, dina diandi Kônelio, yeye wakadi kapitene ka tshisumbu tshia masalayi lukama, tshiakadibo babikila ne, Tshia Bena Italia.

² Yeye wakadi mutendeledi muakane, wakadi utshina Nzambi ne ba mu nsubu wandi bonso, wakadi uha bantu bintu bia luse bia bungi, wakadi utendelela Nzambi matuku onso.

³ Hakadi diba bu ha Isatu dilolo, yeye wakamona mu tshikena kumona ku buntu muanjelo wa Nzambi ubuela mudiye, umuambila ne, Kônelio.

⁴ Hakamujosheye, wakatshina, wakakonka ne, Mukelenge, ntshinyi? Wakamukudimuna ne, Mitendelelu yebe ne bintu biebe bia luse Mutu wahangana diakabanda ku mesu kua Nzambi bu tshivulukidi.

⁵ Katataka utume bantu ku Yopa, balue ne Simona, dinga dina Petelo;

⁶ yeye udi ulala mu nsubu wa Simona, mukuonyi wa biseba, nsubu wandi udi kukala kua mai.

⁷ Hakumuka muanjelo wakadi wakula nʼandi, wakabikila bena mudimu bandi babidi ba mu nsubu ne disalayi dimpe dia bakadi bamukuatshila mudimu matuku onso;

⁸ hakabalondaleye malu â onso, wakabatuma ku Yopa.

Petelo udi ulota tshilota tshia tshilulu tshikuata ku nzemba yatshi inai

⁹ Hakatshiabu, hakadibo baya mu nshila, hakambabo kufika ha buihi ne musoko, Petelo wakabanda ha mutu ha nsubu bua kutendelela Nzambi, diba diamba kufika munda munya.

¹⁰ Nsala yakamukuata, wakasua kudia; hakadibo balongolola bidia, wakalotakana,

¹¹ wakamona diulu dibuluke ne tshintu bu tshilulu tshinene tshihueka hanshi tshikuata ku nzemba yatshi inai;

¹² munda muatshi muakadi nyama yonso ya makama anai ne bintu bidi bidikoka hanshi ne nyunyu ya mulu.

¹³ Dî diakalua kudiye ne, Petelo, bika, shiha, udie.

¹⁴ Kadi Petelo wakamba ne, Nasha, Mukelenge; ku kale tô ne katataka tshiena muanze kudia bintu bia tshianana ne bidi tshijila.

¹⁵ Dî diakalua kudiye tshiakabidi ne, Kubikidi tshiakulengeshabo kudi Nzambi ne, Ntshia tshianana.

¹⁶ Bakenza nunku misangu isatu, tshintu bu tshilulu tshiakahingana lubilu mulu kabidi.

Petelo ne bakatumabo kudi Kônelio

¹⁷ Hakadi Petelo ulubakana mu mutshima wandi, ukeba kumanya bua tshikena kumona tshiakamoneye, tangila, bantu batumibue kudi Kônelio bakadi bimane ku tshibi, bamane kukonka nsubu wa Simona;

¹⁸ bebesha ne, Simona, udibo babikila ne, Petelo, udi emu, anyi?

¹⁹ Hakadi Petelo welangana meshi a tshikena kumona, Nyuma wakamuambila ne, Tangila, bantu basatu badi bakukeba.

²⁰ Bika, hueka munshi, uye nʼabo; kuedi mpata, bualu bua nakubatuma.

²¹ Petelo wakahueka munshi muakadibo, wakabambila ne, Meme eu unudi nukeba, nudi baluile tshinyi?

²² Bakamba ne, Kônelio, kapitene ka masalayi lukama, udi muntu muakane udi utshina Nzambi, lumu luandi ludi luimpe ku tshisamba tshionso tshia Bena Yuda; Nzambi wakamudimusha kudi muanjelo wa tshijila bua kukubikileye ulue mu nsubu muandi ne bua kunvueye mei ebe.

²³ Nunku wakababikila mu nsubu, wakabalesha ha kulala. Hakatshiabu, wakabika, wakaya nʼabo; bana babo bakuabo ba mu Kilisto ba mu Yopa bakaya kumufila.

Petelo udi uya kudi Kônelio

²⁴ Bakalala mu nshila; hakatshiabu, bakafika ku Kaisalia. Kônelio wakadi mubatekemene, mumane kubikila ba mu tshiota tshiandi ne balunda bandi.

²⁵ Hakabuela Petelo mu nsubu, Kônelio wakamuakidila, wakadihonena ku makasa andi, wakamukukuila.

²⁶ Kadi Petelo wakamubisha ne, Bika biebe, meme muine ndi anu muntu.

²⁷ Hakadiye wakula nʼandi, wakabuela munda mua nsubu, wakasanganamu bantu ba bungi badisangishe.

²⁸ Wakabambila ne, Nuenu nudi bamanye ne, Bualu bua Muena Yuda kusomba ne muntu wa tshisamba tshikuabo anyi kulueye ha buihi nʼandi budi tshijila; kadi Nzambi wakundesha ne, Kubikidi muntu mukuabo ne, Ngua tshianana, anyi ngua tshijila;

²⁹ ebu mbualu bunakuluila; hakumbikilabo, tshiakuela mpata. Ndi nukonka bunuakumbikidila.

³⁰ Kônelio wakamukudimuna ne, Kuakuata matuku anai, mpa diba edi mene ha isatu, nakadi utendelela Nzambi mu nsubu muanyi; tangila, muntu wakimana ku mpala kuanyi muluate bilulu biengelela,

³¹ yeye wakangambila ne, Kônelio, bakunvua kutendelela kuebe, Nzambi udi uvuluka bua bintu bia luse biutu wahangana.

³² Tuma dî ku Yopa, ubikile Simona udibo babikila ne, Petelo; yeye udi ulala mu nsubu wa Simona mukuonyi wa biseba udi hehi ne mai.

³³ Nunku nakukutumina dî lubilu; wakulua, wakuenza bimpe. Katataka buonso buetu tudi munemu ku mesu kua Nzambi bua kunvua malu onso akukuambila Mukelenge.

Petelo udi wambila bantu bualu bua luhandu luabo mu nsubu wa Kônelio

³⁴ Petelo wakabulula mukana muandi, wakamba ne, Bulelela, ndi njingulula ne, Nzambi kena ne kansungunsungu,

³⁵ kadi yeye udi witabusha wa mu tshisamba tshionso udi umutshina, udi wenza malu makane.

³⁶ Yeye kabidi wakatumina bana ba Isalele dî, wakabambidila lumu luimpe lua ditalala kudi Yesu Kilisto (yeye udi Mukelenge wa bantu bonso);

³⁷ nuenu mene nudi bamanye dî edi, diakutangalashabo mu nseke yonso ya Yudaya dibangila ku Galela ku nyima kua dibatiza diakambabo kudi Yone;

³⁸ nudi bamanye kabidi bualu bua Yesu wa mu Nazaleta bu muakamuela Nzambi Nyuma Muimpe ne bukole; yeye wakendakana wenza malu mimpe, wondaha ukolesha bonso bakadi bakengeshibua kudi diabolo, bua Nzambi wakadi nʼandi.

³⁹ Tuetu tudi bamanyi ba malu onso akenzeye mu luseke lua Bena Yuda ne mu Yelushalema; bakamushiha mukudika ku mutshi mutshiamakane.

⁴⁰ Nzambi wakamubisha hakahita matuku asatu; kakamumuenesha kudi bantu bonso,

⁴¹ kadi wakamumuenesha anu kudi bamanyi bakasungula Nzambi diambedi, batuetu aba, mbakadia nʼandi, mbakanua nʼandi hakabikeye ku lufu.

⁴² Yesu wakatuambila bikole ne, Nuambile bantu bualu ebu, nubamanyishe ne, Eu nyeye wakusungudibua kudi Nzambi bua kuikala Mulumbuludi wa badi ne muoyo ne wa bafue.

⁴³ Baprofete bonso badi bamba bualu buandi ne, Muntu yonso wamuitabusha neangate dijimisha dia dibi mu dina diandi.

⁴⁴ Hakatshidi Petelo wamba mei â, Nyuma Muimpe wakahuekela bonso bakunvua dî.

⁴⁵ Bena kuitabusha batengula bakadi balue ne Petelo bakakema, bualu bua bakuitshikishila bisamba bia bende kabidi kuha kua Nyuma Muimpe.

⁴⁶ Bakabunvua bakula mu miaku mikuabo, batumbisha Nzambi. Petelo wakakonka ne,

⁴⁷ Muntu kai udi mumanye mua kuhidia mai bua kubatijibuabo, bobo bamane kuangata Nyuma Muimpe bu mutudi bangate?

⁴⁸ Yeye wakamba ne, Babatijibue mu dina dia Yesu Kilisto. Hashishe bakamusengelela bua yeye kushala nʼabo matuku makuabo.