Balombodi 8 - Mukanda wa Nzambi Dihungila Dikulukulu ne Dihungila Dihia-dihia 2003

Gideona Udi Ukuata Bakelenge ba Midiyana

¹ Bena Efelayima bakamuambila ne, Bualu kai wakatuenzela nunku, kuakatubikila hawakaya kuluangana ne Bena Midiyana? Bakamutandisha bikole.

² Yeye wakabakonka ne, Bualu kai bunakuenza budi butamba bunuakuenza? Kuhuola kua tumuma tua nvinyo tua Efelayima kakuena kuhita kuhuola kua tumuma tua Abiezê buimpe, anyi?

³ Nzambi wakafila bana ba mukelenge wa Midiyana, Oleba ne Zêbe, mu bianza bienu; meme ndi mumanye mua kuidikisha bualu buanyi ne bualu buenu, anyi? Hakambeye dî edi, tshiji tshiabo tshiakashika kudiye.

⁴ Gideona ne bantu bandi nkama isatu bakadi nʼandi bakalua ku Yadene, bakasabukaku, bahungile, kadi bakatshidi babihata.

⁵ Yeye wakambila bantu ba mu Sukota ne, Ndi nnusengelela ne numpe mitanda ya bidia bua bantu badi nʼanyi. Bualu bua bobo badi bahungile ne ntshidi ngihata Zêba ne Salemuna, bakelenge ba Midiyana.

⁶ Bakelenge ba mu Sukota bakamuambila ne, Bianza bia Zêba ne Salemuna bidi mu bianza biebe katataka bua tuetu tukuhe bidia bua bena nvita bebe, anyi?

⁷ Gideona wakamba ne, Hashikisha Yehowa kufila Zêba ne Salemuna mu bianza bianyi, nenkande minyinyi yenu ne meba a mu tshihela ne mingonge.

⁸ Wakumukaku, wakaya ku Penuele; wakabambila muomumue; ne bakelenge ba mu Penuele bakamukudimuna anu di diakamba Bena Sukota.

⁹ Yeye wakambila bantu ba mu Penuele ne, hanahingana ne ditalala nenshimbule tshibumba etshi.

¹⁰ Zêba ne Salemuna bakadi mu Kakô, ne misumba yabo yakadi nʼabo, bu binunu dikumi ne bitanu, bonso bakadi bashala ba mu musumba wa bantu ba ku esete; bualu bua bena nvita bu binunu lukama ne makumi abidi bakahona bafue.

¹¹ Gideona wakabanda mu nshila udi uyila kudi badi bashikama mu ntenta ku esete kua Noba ne Yogebeha, wakashiha musumba wabo, bualu bua musumba wakadi mu muaba mukole.

¹² Zêba ne Salemuna bakanyema; yeye wakabihata, wakakuata Zêba ne Salemuna, bakelenge babidi ba Midiyana, wakatatshisha musumba wabo wonso.

¹³ Gideona, muana wa Yoasha, wakalua mufume ku nvita ku mukuna wa Helese.

¹⁴ Yeye wakakuata nsongalume wa Bena Sukota, wakamuebesha malu; yeye wakamufundila mena a bakelenge ba mu Sukota ne bakulu babo kabidi makumi muanda mutekete ne muanda mutekete.

¹⁵ Yeye wakalua kudi Bena Sukota, wakamba ne, Tangilai Zêba ne Salemuna banuakanseka ne, Bianza bia Zêba ne Salemuna bidi mu bianza biebe katataka bua tukuhe bidia bua bantu bebe badi bahungile, anyi?

¹⁶ Yeye wakakuata bakulu ba mu musoko ne meba a mu tshihela ne mingonge, yeye wakatuisha nʼabo Bena Sukota.

¹⁷ Yeye kabidi wakashehula tshibumba tshia mu Penuele, wakashiha bena musoko.

¹⁸ Hashishe yeye wakambila Zêba ne Salemuna ne, Bantu banuakashiha ku Tabô bakadi ba mushindu kai? Bakamukudimuna ne, Bakadi bu wewe mene; muntu ne muntu bakadi bafuanangana ne bana ba mukelenge.

¹⁹ Yeye wakabambila ne, Bobo bakadi bana betu, bana ba mamu wanyi mene. Bu mudi Yehowa ne muoyo, bu nuenu babashiye ne muoyo, meme tshiakadi kunushiha.

²⁰ Yeye wakambila Yetê, muanʼa bute wandi, ne, Bika, ubashihe. Kadi nsongalume kahatula muele wandi wa nvita, yeye wakatshina bualu bua yeye wakatshidi nsongalume.

²¹ Hashishe Zêba ne Salemuna bakamuambila ne, Bika biebe, unshihe, bualu bua bu mudi mulume mbu mudi bukole buandi kabidi. Gideona wakabika, wakashiha Zêba ne Salemuna; yeye kabidi wakangata bilenga biakadi mu nshingu ya tumelo tuabo.

²² Hashishe balume ba mu Isalele bakambila Gideona ne, Utukokeshe; ne wewe ne muanʼebe mulume, ne muana wa muanʼebe mulume kabidi; bualu bua wewe wakatusungila mu bianza bia Bena Midiyana.

²³ Gideona wakabambila ne, Tshiena nnukokesha ne muana wanyi kena unulesha; Yehowa neanuleshe.

²⁴ Gideona wakabambila ne, Ndi musue kunulomba tshintu, muntu ne muntu bampe tukanu tua ku matshu tuakanyengabo mu nvita. (Bobo bakadi ne tukanu tua or ku matshu bualu bua bobo bakadi Bena Yishemaele.)

²⁵ Bobo bakamukudimuna ne, Netukuhetu ne disanka. Bakadisha tshilulu hanshi ne muntu ne muntu bakelamu tukanu tuakanyengabo mu nvita.

²⁶ Bujitu bua or ya tukanu tua ku matshu tuakalombeye buakadi nshekele ya or tshinunu tshimue ne nkama muanda mutekete; ku mutu kua bintu ebi kuakadi bilenga bia ku mitu ya bantu ne tukanu tua ku matshu ne bilulu bifike biakaluatabo kudi bakelenge ba Midiyana ne nkanu ya biamu yakadi mu nshingu ya tumelo tuabo.

²⁷ Gideona Wakenza efoda ne bintu ebi, wakamuteka mu Ofela, musoko wandi; Bena Isalele bonso bakendaku masandi; nunku efoda eu wakalua bu buteyi kudi Gideona ne ba mu nsubu wandi.

²⁸ Nunku Bena Midiyana bakadi batambibue bukole kudi Bena Isalele, kabakabisha mitu yabo kabidi. Buloba buakadi talalâ bidimu makumi anai mu matuku onso a Gideona.

²⁹ Yelubâla, muana wa Yoasha, wakaya, wakashikama mu nsubu muandi.

³⁰ Gideona wakadi ne bana balume makumi muanda mutekete bakaleleye, bualu bua yeye wakadi ne bakashi ba bungi.

³¹ Mukashi, muhika wandi wakadiye mubake, wa mu Shekeme, wakamulelela muana wa balume kabidi, wakamuidika dina ne Abimeleke.

³² Gideona, muana wa Yoasha, wakafua biandi ku bununu buandi, bakamujika mu majambu a tatu wandi Yoasha mu musoko wa Ofela wa Bena Abiezê.

³³ Hakafua Gideona, Bena Isalele bakalukila ku nyima, bakalonda malu a masandi kudi Babala, ne bakavuisha Bâla-belita nzambi wabo.

³⁴ Bena Isalele kabakavuluka Yehowa, Nzambi wabo, nguakabasungila mu bianza bia bantu bakadi nʼabo lukuna bonso ba ku nseke yonso;

³⁵ kabakalesha ba mu nsubu wa Yelubâla, udi Gideona mene, luse bu malu mimpe akalesheye Bena Isalele.