Balombodi 20 - Mukanda wa Nzambi Dihungila Dikulukulu ne Dihungila Dihia-dihia 2003

Badi Baluisha Bena Benyamina

¹ Hashishe Bena Isalele bonso bakaluhuka bafume ku Dana tô ne ku Bê-sheba ne ba mu buloba bua Gilada, bakadisangisha bu muntu umue kudi Yehowa ku Misepa.

² Bakelenge ba bantu ba mu bisamba bionso bia Bena Isalele bakamueneka ku disangisha dia bantu ba Nzambi, bena nvita ba miele bakadi benda ku makasa binunu nkama inai.

³ Hashishe Bena Benyamina bakunvua lumu ne, Bena Isalele bakadisangisha ku Misepa. Bena Isalele bakamba ne, Nutuambile ne, Bualu ebu bubi buakalua munyi?

⁴ Muena Lewi, bayandi wa mukashi wakashihabo, wakabakudimuna ne, Nakalua ku Gibea wa mu buloba bua Benyamina, meme ne mukashi muhika unakabaka, bua kulalaku.

⁵ Bena Gibea bakadisangisha kundi, bakanyunguluka nsubu unakadi butuku; bakasua kushiha meme, bakakuata mukashi wanyi muhika ku bukole, ne yeye wakafua.

⁶ Nunku nakangata mukashi wanyi muhika, nakamukosolola bituha, nakabituma ku maloba onso a mahianyi a Bena Isalele; bualu bua bobo bakadi benza bualu bua bundu ne bua buhote mu Isalele.

⁷ Monai, nuenu Bena Isalele, buonso buenu, leshai meji enu, lumbululai.

⁸ Bantu bonso bakabika bu muntu umue bamba ne, Katuena tuya, muntu mu ntenta muntu mu ntenta yetu, ne katuena tuahuka, muntu ku nsubu wandi muntu ku nsubu wandi.

⁹ Kadi ebu mbualu butuenzela Bena Gibea; netubelele nshobo bua kuluangana nʼabo;

¹⁰ neusungule bantu dikumi ku lukama lua bantu ba mu bisamba bionso bia Bena Isalele, ne lukama ku tshinunu tshia bantu, ne tshinunu tshimue ku binunu dikumi bia bantu, bua kutuadilabo bantu bia kudia; ne hafikabo ku Gibea wa Benyamina, bobo nebabenzele bu mudi bualu buhote buonso buakenzabo mu Isalele.

¹¹ Nunku Bena Isalele bonso bakadisangisha ku musoko ne mitshima yabo miakanangane bu muntu umue.

¹² Bisamba bionso bia Bena Isalele biakatuma bantu munkatshi mua tshisamba tshionso tshia Bena Benyamina, bamba ne, Bualu ebu bubi buakuenjibua munkatshi muenu budi tshinyi?

¹³ Nunku nufile balume, bantu balembakane, ba mu Gibea kutudi, bua tuetu tubashihe, neamushe bubi ebu mu Isalele. Kadi Bena Benyamina kabakunvua dî dia bana babo, Bena Isalele.

¹⁴ Bena Benyamina bonso bakadisangisha bafume ku misoko yabo yonso, bakaya ku Gibea bua kuluanganabo ne Bena Isalele.

¹⁵ Bakabala Bena Benyamina ku dituku adi ba ku misoko yabo bu bantu binunu makumi abidi ne bisambombo bakadi ne miele ya nvita, ku mutu kua Bena Gibea nkama muanda mutekete bakasungulabo.

¹⁶ Munkatshi mua bantu aba bonso muakadi bantu nkama muanda mutekete hasungula bakadi ne luboko; muntu yonso wakadi mumanye mua kuela mabue mu disoka, kâyi eku ne eku bu ntanta wa bunene bua lusuki, kayi uhanga.

¹⁷ Bakabala bena nvita bakadi ne miele mu Isalele ku mutu kua Bena Benyamina bantu binunu nkama inai; bonso aba bakadi bena nvita.

¹⁸ Bena Isalele bakabika, bakaya ku Betele, bakebesha Nzambi bualu bua kuenzabo; bakamba ne, Ba kutudi badianjile kuluisha Bena Benyamina mbanganyi? Yehowa wakamba ne, Bena Yuda nebadianjile kuya.

¹⁹ Bena Isalele bakabika ne dinda, bakatula tshitudilu tshiabo hehi ne Gibea;

²⁰ Bena Isalele bakaluhuka bua kuluangana ne Bena Benyamina; Bena Isalele bakela mualu wa nvita kudibo ku Gibea.

²¹ Bena Benyamina bakaluhuka ku Gibea, bakashiha Bena Isalele, bahele hanshi dituku adi, bantu binunu makumi abidi ne bibidi.

²² Bena Isalele bakakolesha mitshima yabo, bakela mualu wa nvita ku muaba wakelabo mualu wa nvita diambedi.

²³ Bena Isalele bakaya, bakadila ku mpala kua Yehowa tô ne dilolo; bakebesha Yehowa ne, Netuhingane bua kuluangana ne bana betu Bena Benyamina kabidi, anyi? Yehowa wakabambila ne, Nubaluishe.

²⁴ Bena Isalele bakasemena ha buihi ne Bena Benyamina dituku dibidi.

²⁵ Bena Benyamina bakaluhuka kudibo ku Gibea dituku dibidi, bakashiha Bena Isalele, bahele hanshi, bantu binunu dikumi ne muanda mukulu; aba bonso bakadi ne miele.

²⁶ Hashishe Bena Isalele bonso ne bantu bonso bakaya ku Betele, bakadila, bakashikamaku ku mpala kua Yehowa, bakajila bia kudia dituku adi tô ne dilolo; bakasaku milambu ya kuosha ha kahia ne milambu ya kubavuisha nʼai ditalala kudi Yehowa.

²⁷ Bena Isalele bakakonka Yehowa (bualu bua mushete wa tshihungidi tshia mei a Yehowa wakadiku mu matuku au,

²⁸ ne Pinehasa, muana wa Eleazâ, muana wa Alona, wakadi muimane ku mpala kua mushete mu matuku au), bamba ne, Netuye bua kuluangana ne bana betu Bena Benyamina kabidi, anyi nealekele? Yehowa wakabambila ne, Yai bienu, bualu bua nembafile mu bianza bienu makelela.

²⁹ Bena Isalele bakateka balaminyi banyunguluke Gibea.

³⁰ Bena Isalele bakaya kudi Bena Benyamina dituku disatu, bakela mualu wa nvita ku Gibea bu muakenzabo misangu mikuabo.

³¹ Bena Benyamina bakaluhuka bua kuluangana ne bantu, bakumuka ku musoko basemena kule; bakabanga kubashiha bu muakenzabo misangu mikuabo mu nshila minene, nshila umue udi ufuma ku Betele ne nshila mukuabo udi ufuma ku Gibea, ne mu tshisuku kabidi; bakashiha Bena Isalele bu makumi asatu.

³² Bena Benyamina bakambilangana ne, Tudi tubashiha bu mutuakenza diambedi. Kadi Bena Isalele bakambilangana ne, Tunyeme bietu, tubasemeshe kule ne musoko, baluile mu nshila minene.

³³ Bena Isalele bonso bakabika ku miaba yabo, bakela mualu wa nvita ku Bâla-tamâ; balaminyi ba Bena Isalele bakabika ku miaba yabo ya ku Mâle-geba.

³⁴ Binunu dikumi bia bantu hasungula munkatshi mua Bena Isalele bonso bakalua ku Gibea, bakaluangana nvita mikole; Bena Benyamina kabakadi bamanye ne, Bualu bubi bukadi ha kutukuata.

³⁵ Yehowa wakashiha Bena Benyamina ku mpala kua Bena Isalele; Bena Isalele bakashiha Bena Benyamina dituku adi bantu binunu makumi abidi ne bitanu ne lukama lumue; buonso buabo bakadi bena nvita bakadi ne miele.

³⁶ Bena Benyamina bakamanya ne, Bakatuhita bukole; ne Bena Isalele bakashila Bena Benyamina muaba, bualu bua bobo bakadi beyemena balaminyi bakatekabo ku Gibea.

³⁷ Balaminyi bakabika, bakaya ku Gibea lubilu; balaminyi bakela mualu wa nvita, bakashiha bena musoko bonso ku miele ya nvita.

³⁸ Tshimanyinu tshia Bena Isalele ne balaminyi tshiakahungabo tshiakadi muishi wa kahia munene ujuka mu musoko.

³⁹ Bena Isalele bakatshunguluka mu nvita, ne Bena Benyamina bakabanga kubashiha, bantu bu makumi asatu, bamba ne, Bulelela, tudi tubashiha bu mutuakenza diambedi.

⁴⁰ Kadi hakabanga muishi wa kahia kujuka mu musoko, Bena Benyamina bakatangila ku nyima kuabo; ne monai, musoko mujima wakahia, ne muishi wakadi ubanda mu diulu.

⁴¹ Bena Isalele bakatshunguluka, ne Bena Benyamina bakatua mikemu, bakamanya ne, Bualu bubi buakutukuata.

⁴² Nunku bakela Bena Isalele nyima, bakamba kuya mu tshihela; kadi nvita mikole yakabalonda; bakashiha kabidi bantu bakadi baluhuka mu misoko mu muaba eu mene.

⁴³ Bakela Bena Benyamina munkatshi, bakabihata, bakabadiata ku miaba yakambabo kuikisha tô ne ku Gibea kudi kuhatukila diba.

⁴⁴ Bakashiha Bena Benyamina binunu dikumi ne muanda mukulu; bonso aba bakadi bena bukitu.

⁴⁵ Bakâhuka, bakanyema ku tshihela ku dibue dia Limona; balongolola bantu binunu bitanu mu nshila minene; bakananukila kubihata tô ne ku Gidoma; bakashiha bantu binunu bibidi.

⁴⁶ Nunku bonso ba mu Benyamina bakafua dituku adi bakadi binunu makumi abidi ne bitanu; buonso buabo bakadi ne miele, bakadi bena bukitu.

⁴⁷ Bantu nkama isambombo bakâhuka, bakanyema ku tshihela ku dibue dia Limona, bakalalaku ngondo inai.

⁴⁸ Bena Isalele bakatshunguluka kudi Bena Benyamina kabidi, bakabashiha ne miele ya nvita, ne bena musoko bonso ne bimuna biabo ne bionso biakasanganabo; ne misoko yonso yakasanganabo, bakayosha.