Balombodi 2 - Mukanda wa Nzambi Dihungila Dikulukulu ne Dihungila Dihia-dihia 2003

Muanjelo wa Yehowa ku Bokima

¹ Muanjelo wa Yehowa wakafuma ku Gilegala, wakaya ku Bokima. Yeye wakamba ne, Nakanûmusha mu Ejipitu, nakalua nʼenu ku buloba bunakalaya bankambua benu; nakamba ne, Tshiena nshiha tshihungidi tshinakahunga nʼenu tshiendelele;

² nuenu kanuhungi tshihungidi ne bena buloba ebu; nutonkole bioshelu biabo. Kadi nuenu kanuakatumikila dî dianyi; nuakuenza nunku bua tshinyi?

³ Bua bualu ebu nakanuambila kahidi ne, Tshiena mbihata ku mpala kuenu, kadi bobo nebikale bu meba mu mbese yenu, ne nzambi yabo neyikale bu buteyi kunudi.

⁴ Hashishe bakambila muanjelo wa Yehowa Bena Isalele bonso mei â, bobo bakaha miadi, bakadila.

⁵ Nunku bakidika muaba au ne, Bokima; bakashihelaku Yehowa nyama.

Lufu lua Yoshua

⁶ Hashishe bakatuma Yoshua bantu, Bena Isalele bonso bakaya muntu ku buhianyi buandi muntu ku buhianyi buandi.

⁷ Bantu bonso bakakuatshila Yehowa mudimu matuku onso a Yoshua, ne a bakulu bakadi bashala ne muoyo ku nyima kua Yoshua, bakatangilaku malu manene onso akenzela Yehowa Bena Isalele.

⁸ Yoshua, muana mulume wa Nuna, muntu wa Yehowa, wakafua hakadiye ne bidimu lukama ne dikumi.

⁹ Bakamujika ku mukalu wa buhianyi buandi mu Timenatahelese, ku mikuna ya mu Efelayima, ku nôde kua mukuna wa Gasha.

¹⁰ Bantu bonso ba mu tshikondo atshi bakasangishibua kudi bankambua babo kabidi, ne ba mu tshikondo tshikuabo tshiakabalonda ku nyima kabakamanya Yehowa anyi mudimu munene wakenzeleye Bena Isalele.

Ditomboka dia Bena Isalele ne Mudimu wa Balumbuluishi

¹¹ Bena Isalele bakenza malu akadi mabi ku mesu kua Yehowa, bakakuatshila Bala mudimu;

¹² bakalekela Yehowa Nzambi wa batatuʼabo, wakafunda nʼabo mu buloba bua Ejipitu; bakalonda nzambi mikuabo, nzambi ya bantu bakadi ha buihi nʼabo, bakayinamina; bakafikisha Yehowa munda.

¹³ Bakalekela Yehowa, bakakuatshila Bala ne Ashatelota mudimu.

¹⁴ Tshiji tshia Yehowa tshiakadi kudi Bena Isalele, ne yeye wakabafila mu bianza bia bahandi, bakabahaula; yeye wakabahana kudi bena lukuna bakadi ha buihi nʼabo; kabakamanya mua kuimana ku mpala kua bena lukuna babo kabidi.

¹⁵ Kuonso kuakayabo tshianza tshia Yehowa tshiakadi kudibo bua kubenzela bibi bu muakamba Yehowa, ne bu muakaditshiha Yehowa kudibo; bakadi ne ntatu ya bungi.

¹⁶ Yehowa wakabisha balumbuluishi, bakabasungila mu bianza bia bakadi babahaula.

¹⁷ Bobo kabakunvuila balumbuluishi babo; kadi bakenza malu a masandi kudi nzambi yabo, bakayinamina; bobo bakasesuka lubilu mu nshila wakadi batatuʼabo bendamu hakadibo batumikila mikenji ya Yehowa; kadi bobo kabakenza nunku.

¹⁸ Hakababishila Yehowa mulumbuluishi, hashishe Yehowa wakadi ne mulumbuluishi eu, wakabasungila mu bianza bia bena lukuna babo matuku onso a mulumbuluishi eu; bualu bua Yehowa wakadi ukudimuna mutshima wandi bualu bua kutua kua mikemu yabo yakatuabo hakadibo babakengesha ne hakadibo babatatshisha.

¹⁹ Kadi hakafua mulumbuluishi, hashishe bobo bakalukila ku nyima, bakatamba batatuʼabo kuenza bibi, hakalondabo nzambi mikuabo bua kuyenzela mudimu ne bua kuyinamina; kabakalekela bienzedi biabo bibi anyi tshitshu tshiabo.

²⁰ Tshiji tshia Yehowa tshiakadi kudi Bena Isalele kabidi, ne yeye wakamba ne, Bualu bua tshisamba etshi tshiakashiha tshihungidi tshinakahunga ne batatuʼabo, kabakunvua dî dianyi,

²¹ meme kabidi tshiena ngihata bisamba bia bantu ku mpala kuabo, biakashiya Yoshua hakafueye:

²² bua meme kuteta nʼabo Bena Isalele bua kumanya ne bobo nebalamate nshila wa Yehowa bua kuendamu bu muakenza batatuʼabo.

²³ Nunku Yehowa wakashiya bisamba abi bia bantu mu buloba, kakabihata lubilu; yeye kabidi kakabafila mu tshianza tshia Yoshua.