Balombodi 13 - Mukanda wa Nzambi Dihungila Dikulukulu ne Dihungila Dihia-dihia 2003

Kuledibua kua Shimishona

¹ Bena Isalele bakenza malu mabi ku mesu kua Yehowa kabidi, ne Yehowa wakabafila mu bianza bia Bena Peleshete bidimu makumi anai.

² Muntu mukuabo wa mu Solea, wa mu diku dia Bena Dana, wakadiku, dina diandi Manoa; mukashi wandi wakadi nkumba, kakadi mulele.

³ Muanjelo wa Yehowa wakamueneka kudi mukashi, wakamuambila ne, Tangila, wewe udi nkumba, kuena muanze kulela; kadi wewe newimite difu, neulele muana wa balume.

⁴ Nunku udimuke biebe, ndi nkusengelela, kunu nvinyo anyi maluvu makole, kudi tshintu tshidi katshiyi tshimpe;

⁵ mona, wewe newimite difu, neulele muana wa balume; dihaya kadibeyi ku mutu kuandi; bualu bua muana eu neikale Munazi kudi Nzambi ku difu dia mamu wandi; yeye neabange kusungila Bena Isalele mu bianza bia Bena Peleshete.

⁶ Hashishe mukashi wakalua, wakambila bayandi ne, Muntu wa Nzambi wakalua kundi, mpala wandi wakadi mufuane mpala wa muanjelo wa Nzambi, wakuntshinyisha; meme tshiakumuebesha kuakafumeye ne yeye kakungambila dina diandi;

⁷ kadi yeye wakungambila ne, Mona, wewe newimite difu, neulele muana wa balume; nunku kunu nvinyo anyi maluvu makole, kudi tshintu tshidi katshiyi tshimpe; bualu bua muana eu neikale Munazi kudi Nzambi ku difu diebe, tô ne ku dituku dia lufu luandi.

⁸ Hashishe Manoa wakasengelela Yehowa, wakamba ne, Mukelenge, ndi nkusengelela ne, Witabushe bua muntu wa Nzambi uwakatuma alue kutudi kabidi bua kutuyisha tshibidi mua kuenzela muana utualela.

⁹ Nzambi wakunyua dî dia Manoa, ne muanjelo wa Yehowa wakalua kudi mukashi kabidi hakadiye mushikame mu budimi, kadi Manoa bayandi kakadi nʼandi.

¹⁰ Mukashi wakaya lubilu, wakamanyisha bayandi ne, Mona, muntu au wakalua kundi dituku dikuabo wakumueneka kundi.

¹¹ Manoa wakabika, wakalonda mukashi wandi, wakalua kudi muntu eu, wakamuebesha ne, Wewe udi muntu wakadi uyikila ne mukashi eu, anyi? Yeye wakamba ne, Mmeme.

¹² Manoa wakamba ne, Bualu buenjibue bu mu dî diebe; nendiundishe muana munyi, netumuenzele tshinyi?

¹³ Muanjelo wa Yehowa wakambila Manoa ne, Mukashi adimuke bua mei onso anakamuambila.

¹⁴ Kadi tshintu tshiakadiunda ku muonshi wa tumuma tua nvinyo, kanu nvinyo anyi maluvu makole, kadi tshintu tshidi katshiyi tshimpe; enze biandi malu onso anakamuambila.

¹⁵ Manoa wakambila muanjelo wa Yehowa ne, Ndi nkusengelela, anji kushala kunoko, tukulongoluele kana ka mbushi.

¹⁶ Muanjelo wa Yehowa wakambila Manoa ne, Biwangindisha, tshiena ndia bidia biebe, ne biwalongolola mulambu wa kuosha, bûdi nʼabu mbua kûfila kudi Yehowa. Bualu bua Manoa kakamanya ne, Yeye udi muanjelo wa Yehowa.

¹⁷ Manoa wakakonka muanjelo wa Yehowa ne, Dina diebe nganyi, bua tuetu tukutumbishe hashika mei ebe?

¹⁸ Muanjelo wa Yehowa wakamuebesha ne, Udi unkonka dina dianyi bualu kai? Mona, didi bualu bua dikema.

¹⁹ Nunku Manoa wakangata kana ka mbushi ne mulambu wa bukula, wakabifila kudi Yehowa ha mutu ha dibue; ne muanjelo wakenza malu a kukema; Manoa ne mukashi wandi bakatangila.

²⁰ Bualu bua hakabanda ludimi lua kahia mulu lufume ku tshioshelu, muanjelo wa Yehowa wakabanda mu ludimi lua kahia lua ku tshioshelu; Manoa ne mukashi wandi bakatangila, bakatua mpala yabo hanshi.

²¹ Kadi muanjelo wa Yehowa kakamueneka kudi Manoa anyi kudi mukashi wandi kabidi. Hashishe Manoa wakamanya ne, Yeye wakadi muanjelo wa Yehowa.

²² Manoa wakambila mukashi wandi ne, Netufue bulelela, bualu bua tuakumona Nzambi.

²³ Kadi mukashi wandi wakamuambila ne, Bu Yehowa musue kutushiha, yeye kakadi kuitabusha mulambu wa kuosha ne mulambu wa bukula ku bianza bietu, ne yeye kakadi kutulesha malu â onso kabidi, ne yeye kakadi kubambila malu â ku tshikondo etshi.

²⁴ Mukashi wakalela muana wa balume, wakamuidika dina ne, Shimishona. Muana wakadiunda, ne Yehowa wakamusankisha.

²⁵ Nyuma wa Nzambi wakabanga kumuenzesha mu Mahane-dana, hankatshi ha Solea ne Eshetaola.