Balombodi 12 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bena Efelayima bakadisangisha hamue, bakaya ku luseke lua ku node; bakambila Yefeta ne, Wewe wakasabuka bua kuluangana ne Bena Amona, kuakatubikila bua tuetu kuya nʼebe bualu kai? Netuoshe nsubu webe ne kahia ne wewe kabidi.

² Yefeta wakabambila ne, Meme ne bantu banyi tuakadi ne nvita mikole kudi Bena Amona, ne hanakanubikila, nuenu kanuakansungila mu bianza biabo.

³ Hanakatangila ne nuenu kanuakansungila, nakateka muoyo wanyi mu tshianza tshianyi, nakasa buka kudi Bena Amona, ne Yehowa wakabafila mu tshianza tshianyi; nuakalua kundi bua kunduisha lelu munyi?

⁴ Hashishe Yefeta wakasangisha Bena Gilada bonso, bakaluangana ne Bena Efelayima; Bena Gilada bakashiha Bena Efelayima, bualu bua bobo bakamba ne, Nuenu Bena Gilada nudi banyemi ba Efelayima ba munkatshi mua Bena Efelayima ne ba munkatshi mua Bena Manashe.

⁵ Bena Gilada bakanyenga malobo a Yadene akadi a Bena Efelayima. Nunku hakalua munyemi yonso wa munkatshi mua Bena Efelayima Wamba ne, Ndi musue kusabuka, Bena Gilada bakamukonka ne, Wewe udi Muena Efelayima, anyi? Biakitabeye ne, Nansha,

⁶ bobo bakamuambila ne, Wambe biebe ne, Shiboleta; ne yeye wakamba ne, Siboleta, bualu bua yeye kakadi mua kuamba dî adi bimpe; hashishe bakamukuata, bakamushihela ku malobo a Yadene. Ku tshikondo atshi Bena Efelayima binunu makumi anai ne bibidi bakafua.

⁷ Yefeta wakalumbulula Bena Isalele bidimu bisambombo. Hashishe Yefeta, Muena Gilada, wakafua, bakamujika mu umue wa misoko ya Bena Gilada.

Ibisana, Elone, ne Abidona, Balumbuluishi ba Isalele

⁸ Ku nyima kuandi Ibisana, Muena Beteleheme, wakalumbulula Bena Isalele.

⁹ Yeye wakadi ne bana balume makumi asatu, ne bana bakashi makumi asatu bakatumeye ha bula ku mabaka; yeye wakangata bana bakashi makumi asatu bakadi ha bula bu bakashi ba bana bandi balume. Yeye wakalumbulula Bena Isalele bidimu muanda mutekete.

¹⁰ Ibisana wakafua, bakamujika mu Beteleheme.

¹¹ Ku nyima kuandi Elona, Muena Zebuluna, wakalumbulula Bena Isalele; yeye wakalumbulula Bena Isalele bidimu dikumi.

¹² Elona, Muena Zebuluna, wakafua; bakamujika mu Ayalona mu buloba bua Zebuluna.

¹³ Ku nyima kuandi Abidona, muana wa Hilele, Muena Pilatona, wakalumbulula Bena Isalele.

¹⁴ Yeye wakadi ne bana balume makumi anai ne bikulu makumi asatu bakenda ha nyima ha bana ba nyama ya mpunda makumi muanda mutekete; yeye wakalumbulula Bena Isalele bidimu muanda mukulu.

¹⁵ Abidona, muana wa Hilele, Muena Pilatona, wakafua; bakamujika mu Pilatona mu buloba bua Efelayima, ku mikuna ya Bena Amaleka.