Balombodi 11 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yefeta, Muena Gilada, wakadi muena nvita wa bukitu, wakadi muana wa mukashi wa masandi; Gilada wakalela Yefeta.

² Mukashi wa Gilada wakamulelela bana ba balume; hakakola bana ba mukashi wandi mene, bobo bakihata Yefeta, bakamuambila ne, Wewe kuena ne buhianyi mu nsubu wa tatu wetu, bualu bua wewe udi muana wa mukashi wa bende.

³ Hashishe Yefeta wakanyema ku mesu kua bana babo, wakashikama mu buloba bua Tobo; ne bantu ba hatuhu bakadisangishaku kudi Yefeta, bakaluhuka nʼandi.

⁴ Hakahita tshikondo, Bena Amona bakaluisha Bena Isalele nvita.

⁵ Hakaluangana Bena Amona ne Bena Isalele nunku, bakulu ba mu Gilada bakaya kuangata Yefeta ku buloba kua Tobo;

⁶ bakambila Yefeta ne, Lua biebe, wikale kapitene ketu bua tuluangane nvita ne Bena Amona.

⁷ Yefeta wakambila bakulu ba mu Gilada ne, Nuenu kanuakadi nʼanyi lukuna, kanuakungihata mu nsubu wa tatu wanyi, anyi? Nudi nulua kundi hanudi ne dikenga bualu kai?

⁸ Bakulu ba mu Gilada bakambila Yefeta ne. Bua bualu ebu mpindiu tuakuhingana kûdi kabidi bua wewe uye nʼetu bua kuluangana ne Bena Amona; wewe newikale mukelenge wetu wa Bena Gilada bonso.

⁹ Yefeta wakakonka bakulu ba mu Gilada ne, Binuaya nʼanyi kuetu kabidi bua kuluangana ne Bena Amona, ne biabafila Yehowa ku mpala kuanyi, nengikale mukelenge wenu, anyi?

¹⁰ Bakulu ba mu Gilada bakambila Yefeta ne, Yehowa ikale mumanyi wa bualu hankatshi hetu; bulelela, netuenze bu mu dî diebe.

¹¹ Hashishe Yefeta wakaya ne bakulu ba mu Gilada, ne bantu bakamuteka mukelenge ku mutu kuabo; Yefeta wakamba mei andi onso ku mpala kua Yehowa mu Misepa.

¹² Yefeta wakatumina mukelenge wa Bena Amona ba-messager, bamba ne, Udi nʼanyi bualu kai bûdi uluila kundi bua kuluangana mu buloba buanyi?

¹³ Mukelenge wa Bena Amona wakakudimuna ba-messager ba Yefeta dî ne, Bualu bua Bena Isalele bakanyenga buloba buanyi hakaluabo mu Ejipitu, ku musulu wa Ânona tô ne ku Yaboka ne ku Yadene; nunku utuhingishile maloba au kabidi talalâ.

¹⁴ Yefeta wakatumina mukelenge wa Bena Amona ba-messager bakuabo kabidi,

¹⁵ bakamuambila ne, Yefeta udi Wamba nunku: Bena Isalele kabakanyenga buloba bua Moaba anyi buloba bua Bena Amona;

¹⁶ kadi hakaluhukabo mu Ejipitu, ne Bena Isalele bakahitshila mu tshihela tô ne ku Dishiba Dikunze, bakafika ku Kadesha;

¹⁷ hashishe Bena Isalele bakatumina mukelenge wa Edome ba-messager, bamba ne, Tudi tukusengelela ne, Anji kuitabusha bua tuetu kuhitshila mu buloba buebe; kadi mukelenge wa Edome kakabunvuila. Bakatumina mukelenge wa Moaba ba-messager muomumue, kadi yeye kakitabusha; ne Bena Isalele bakashikama mu Kadesha.

¹⁸ Hashishe bakahitshila mu tshihela, bakanyunguluka buloba bua Edome ne buloba bua Moaba kabidi, bakayila ku esete kua buloba bua Moaba, bakashikama dishiya dia musulu wa Ânona; kadi kabakabuela mu mu-kalu wa Moaba, bualu bua Ânona wakadi mukalu wa Moaba.

¹⁹ Bena Isalele bakatumina Sihona, mukelenge wa Bena Amole, mukelenge wa mu Heshebona, ba-messager; Bena Isalele bakamuambila ne, Tudi tukusengelela ne, Witabushe bua tuetu kuhitshila mu buloba buebe, tuye ku buloba buetu.

²⁰ Kadi Sihona kakitabusha bua Bena Isalele bahitshile mu buloba buandi; kadi Sihona wakasangisha bantu bandi bonso, bakatula tshitudilu tshiabo mu Yahasa, bakaluangana ne Bena Isalele.

²¹ Yehowa, Nzambi wa Isalele, wakafila Sihona ne bantu bandi bonso mu bianza bia Bena Isalele, ne bobo bakabashiha; nunku Bena Isalele bakangata buloba bua Bena Amole, bantu ba ku luseke alu.

²² Bakangata buloba buonso bua Bena Amole ku mikalu yabo yonso, ku Ânona tô ne ku Yaboka, ne ku tshihela tô ne ku Yadene.

²³ Nunku Yehowa, Nzambi wa Isalele, wakumusha Bena Amole ku mpala kua bantu bandi Bena Isalele; ne wewe neubakokeshe, anyi?

²⁴ Kuena ukokesha buloba buakakuha Kamoshe, nzambi webe, bua kukokesha, anyi? Nunku bantu bonso badi Yehowa, Nzambi wetu, Wihata ku mpala kuetu, netubakokeshe mene.

²⁵ Katataka wewe udi uhita Balaka, muana wa Sipô, mukelenge wa Moaba, buimpe, anyi? Yeye wakalesha Bena Isalele, yeye wakaluangana nʼabo, anyi?

²⁶ Hakadi Bena Isalele bashikama mu Heshebona ne mu misoko yabo ne mu Aloê ne mu misoko yabo ne mu misoko yonso idi ku muelelu wa mai a Ânona bidimu nkama isatu, bualu kai kuakayangata musangu au?

²⁷ Nunku meme tshiakakuenzela bibi, kadi wewe udi ungenzela meme bibi bua kuluangana nʼanyi; Yehowa, Mulumbuluishi, ikale mulumbuluishi hankatshi ha Bena Isalele ne Bena Amona lelu.

²⁸ Kadi mukelenge wa Bena Amona kakunyua mei a Yefeta akamutumineye.

²⁹ Hashishe Nyuma wa Yehowa wakatulukila Yefeta, wakahitshila mu Gilada ne Manashe, ne Misepa wa Gilada; wakumuka ku Misepa wa Gilada, wakafika kudi Bena Amona.

³⁰ Yefeta wakaditshiha kudi Yehowa ne, Biwafila Bena Amona mu tshianza tshianyi,

³¹ hashishe tshionso tshidi tshiluhuka ku bibi bia nsubu wanyi bua kusangakena nʼanyi, hanahingana kudi Bena Amona ne ditalala, netshikale tshia Yehowa, nentshifile bu mulambu wa kuosha ha kahia.

³² Nunku Yefeta wakafika kudi Bena Amona bua kuluangana nʼabo, ne Yehowa wakabafila mu tshianza tshiandi.

³³ Yeye wakabashiha ku Aloê tô ne ku Minita, misoko makumi abidi mene, tô ne ku Abele-kelamima; wakashiha bantu ba bungi. Nunku Bena Amona bakateketa ku mpala kua Bena Isalele.

³⁴ Yefeta wakalua ku Misepa ku nsubu kuandi; ne muanʼandi wa bakashi wakaluhuka bua kusangakeneye nʼandi ne bisanji ne bena maja; yeye wakadi muana wandi umuehele, yeye kakadi ne muana wa balume anyi muana wa bakashi mukuabo.

³⁵ Hashishe, hakamutangileye, yeye wakadihanda bilulu biandi, wakamba ne, Aka! muanʼanyi, wewe wakatamba kumpuekesha, wewe udi umue wa munkatshi mua banutatshisha; bualu bua meme nakabulula mukana muanyi kudi Yehowa, tshiena mua kualukila ku nyima.

³⁶ Yeye wakamuambila ne, Tatu wanyi, wewe wakabulula mukana muebe kudi Yehowa, ungenzele bu mu dî diakahatuka mukana muebe, bualu bua Yehowa wakasombuela bena lukuna bebe, Bena Amona mene, bualu buebe.

³⁷ Yeye wakambila tatu wandi kabidi ne, Bangenzele bualu ebu; bandekele ngondo ibidi bua meme kuya ne balunda banyi ku mikuna bua kujinga matuku antshidi kamama.

³⁸ Yeye wakamuambila ne, Ya biebe. Yeye wakamutuma ha bule tô ngondo ibidi; yeye wakaya ne balunda bandi, bakajinga matuku akatshidiye kamama ku mutu kua mikuna.

³⁹ Hakahita ngondo ibidi, yeye wakahingana kudi tatu wandi, ne yeye wakamuenzela bu mu kuditshiha kuakaditshiheye; yeye kakadi mumanye mulume. Bakadi ne tshilele etshi mu Isalele,

⁴⁰ bua bana bakashi ba mu Isalele baye ku tshidimu ku tshidimu bua kujingabo muana mukashi wa Yefeta, Muena Gilada, tô matuku anai ku tshidimu ku tshidimu.